பெருவுடையார் கோயில், தஞ்சாவூர்.

பெருவுடையார் கோயில்,       தஞ்சாவூர்.              

 *மூலவர்:

பெருவுடையார், பிரகதீசுவரர்

*தாயார்:

பெரியநாயகி, பிரகன்நாயகி

*தல விருட்சம்:

வன்னி மரம்

*தீர்த்தம்:

சிவகங்கை தீர்த்தம்

 

*இது திருவிசைப்பா பாடல் பெற்ற தலம்.  பாடியவர் :கருவூரார் 

*தஞ்சாவூரில் காவிரியின் தென்கரையில் அமைந்திருக்கும் இந்தக் கோயில், ராஜராஜேச்சரம், பெருவுடையார் கோயில், பிரஹதீஸ்வரர் ஆலயம் என பல பெயர்களில் குறிப்பிடப்படுகிறது. 

*10-ஆம் நூற்றாண்டில் புகழ் பெற்ற தமிழ் சோழ பேரரசர் முதலாம் இராசராச சோழன் இக்கோயிலைக் கட்டுவித்தார். 1003-1004 ஆம் ஆண்டு தொடங்கி 1010 ஆம் ஆண்டு கட்டி முடிக்கப்பட்டது.  2010 ஆம் ஆண்டில், இந்தக் கோவில் கட்டி முடிக்கப்பட்டு 1000 ஆண்டுகள் நிறைவடைந்தன. இதை கொண்டாடும் வகையில், இந்திய அரசு சிறப்பு அஞ்சல் தலை மற்றும் நாணயங்களை வெளியிட்டது. 

*இந்தக் கோயில், திராவிடக் கோயில் கலையின் உன்னதமான சான்றாகக் கருதப்படுகிறது.    

 *காவிரிச் சமவெளியில் கற்களே இல்லாத பகுதியில், முற்றிலும் கருங்கற்களைக் கொண்டு இக்கோவில் கட்டப்பட்டது.            

*985 முதல் 1070 வரை சோழர் கலை உயர்வடைந்து உச்ச நிலையில் இருந்தது.  ஏராளமான கோயில்கள் கட்டப்பட்டன. பரந்து கிடந்த சோழப் பேரரசு எங்கும் கோயில்கள் கட்டும் பணி தொடர்ச்சியாக நடந்தது.              

"உலகப் பாரம்பரியச் சின்னம்: இக்கோயில், கங்கைகொண்ட சோழபுரம் மற்றும் தாராசுரம் ஐராவதேஸ்வரர் கோயில் ஆகியவற்றுடன் சேர்த்து, Great Living Chola Temples என்ற பெயரில் யுனெஸ்கோ, உலகப் பாரம்பரியச் சின்னமாக 1987 ஆம் ஆண்டு அறிவித்தது.  

*இந்தக் கோயில், இந்தியத் தொல்லியல் துறையால் பராமரிக்கப்படுகிறது.   

  

*பிற்காலக் கோயில்களில் 

கோபுரங்கள் உயரமாக அமைந்திருக்கும் நிலையில், இந்தக் கோவிலில் விமானம் மிக உயரமாக அமைக்கப்பட்டுள்ளது.              

*தஞ்சை பெரிய கோயிலின் சில பகுதிகள் பிற்காலப் பாண்டியர்கள், விஜயநகர மன்னர்களால் கட்டப்பட்டன. முன்தாழ்வாரம், நந்தி மண்டபம், அம்மன் சன்னிதி, சுப்ரமணியர் சன்னிதி போன்ற இந்தப் பகுதிகளைத் தவிர கோயிலின் மற்ற பகுதிகள் ராஜராஜ சோழன் காலத்திலேயே கட்டப்பட்டவை.           

*விமானத்தின் உச்சியில் கலசத்திற்கு கீழே உள்ள பகுதி ஒரே கல்லால் ஆனது என்றும், விமானத்தின் நிழல் தரையில் விழாது என்றும் கூறப்பட்டாலும் அது உண்மையல்ல.                            

*பெருவுடையார் என்று அழைக்கப்படும் மூலவர் சிவபெருமான் லிங்க வடிவில் உள்ளார். இந்த மூலவரை இராசராச சோழன், இராசராசீச்சரமுடையார் என்ற பெயரில் வழிபட்டுள்ளார். 

*கருவறையில் உள்ள சிவலிங்கம் உலகிலேயே  பெரியதாக திகழ்கிறது. ஆறு அடி உயரமும் 54 அடி சுற்றளவு உள்ள ஆவுடையாரின் மேல் 13 அடி உயரமும் 23 அரை அடி சுற்றளவு உள்ள லிங்கம் பிரம்மாண்டமாய்  இருக்கின்றது.

*பெரியநாயகி அம்மனுக்கு தனி சந்நிதி உள்ளது.

*இக்கோவிலில் கருவூர் சித்தருக்கென தனி சந்நிதி அமைந்துள்ளது.

*வராகி அம்மன் சந்நிதி சோழர் கால கட்டுமானமாக இருக்க வேண்டும் என்றே கருதப்படுகிறது. வேறெங்கிலும் இல்லாத வகையில் இந்த திருவுருவிற்கு இரண்டு கரங்கள் மட்டுமே இருப்பது வியக்கத்தக்கது.   

*ஒரே கல்லில் அமைக்கப்பட்டுள்ள நந்தி 20 டன் எடையும், இரண்டு மீட்டர் உயரம், ஆறு மீட்டர் நீளம், இரண்டரை மீட்டர் அகலமும் கொண்டது.                            

*"நாம் கொடுத்தனவும், நம் அக்கன் கொடுத்தனவும், நம் பெண்டுகள் கொடுத்தனவும், கொடுப்பார் கொடுத்தனவும் இந்த கல்லிலே வெட்டி அருள்க...."

என்று  ராஜராஜசோழன்

தன்னுடைய பங்களிப்பு மட்டுமன்றி மற்ற எல்லோரின் பங்களிப்பையும் ஆவணப் படுத்தியது வியத்தகு ஒன்று. 

*இக்கோயிலின் தலைமைச் சிற்பியாக குஞ்சர மல்லன் ராஜராஜப்பெருந்தச்சன் என்ற பெயர் கோயிலின் கல்வெட்டுகளில் குறிப்பிடப்படுகிறது. 

*தஞ்சை பெரிய கோவில், வெறும் வழிபாட்டுத் தலமாக மட்டுமல்லாமல், சோழர் காலத்தின் கலை, அறிவியல், மற்றும் சமூக வாழ்க்கையின் ஒரு முழுமையான பிரதிபலிப்பாகவும் திகழ்கிறது.          

*தரணி போற்றும் தஞ்சை பெரிய கோவில் இன்னும் எத்தனை ஆண்டுகள் ஆனாலும் நிலைத்து நின்று தமிழனின் பெருமையை பறைசாற்றி கொண்டு இருக்கும்.   

ஓம் நமசிவாய 

படித்து பகிர்ந்தது

 இரா இளங்கோவன் 

நெல்லிக்குப்பம்.