குழந்தைகளுக்கு வித்யாரம்பம் : எப்படி செய்வது?

குழந்தைகளுக்கு வித்யாரம்பம் : எப்படி செய்வது? பலன்கள் என்ன?!*

வித்யாரம்பம் சடங்கு:

குழந்தை ஓரிரண்டு வார்த்தைகள் பேசத் தொடங்கியவுடன் இந்த சடங்கு மேற்கொள்ளப்படுகின்றது. 'அக்ஷராப்பியாசம்" என்பதற்கு தமிழில் 'எழுத்தறிவித்தல்" என்று பொருள் கொள்ளலாம். அதாவது பிறந்து 2 வயதிற்கு மேலான குழந்தைகள் முறையான பள்ளி கல்வி கற்பதற்கு முன்பு செய்யப்படும் ஒரு சடங்காகும். இதை 'வித்யாரம்பம்" என்றும் கூறுவர்.

இந்து மதத்தவர்கள் செய்ய வேண்டிய 16 வகையான முக்கியமான சம்ஸ்காரம் எனப்படும் சடங்குகளில் இந்த வித்யாரம்பம் சடங்கும் ஒன்று. பொதுவாக இந்த வித்யாரம்பம் சடங்கு கோயில்களில் விநாயகர், சரஸ்வதி தேவி தெய்வங்களை பூஜித்து வேதமறிந்த அந்தணர்கள் கொண்டு செய்யப்படுகின்றன. இந்த வித்யாரம்பம் சடங்கு எப்படி செய்வது என்பதை பற்றி பார்க்கலாம்.

எந்த நாளில் செய்யலாம்?

உங்களின் குழந்தைகளுக்கு வித்யாரம்பம் சடங்கு செய்ய நவராத்திரி காலத்தில் வரும் 'விஜயதசமி அல்லது சரஸ்வதி பூஜை" தினங்களே மிகவும் சிறப்பானது. வசந்த பஞ்சமி, தமிழ் புத்தாண்டு, குரு பூர்ணிமா, ஆவணி பௌர்ணமி ஆகிய தினங்களும் வித்யாரம்பம் செய்வதற்கு சிறந்த தினங்களாகும்.

எப்படி செய்வது?

வித்யாரம்பம் செய்யும் தினத்தில் அதிகாலையிலேயே எழுந்து உங்கள் குழந்தையை நீராட செய்து, புத்தாடை உடுத்த வேண்டும். பூஜைக்கு தேவையான மஞ்சள், குங்குமம், தேங்காய், சந்தனம், பத்தி, கற்பூரம், மலர்கள், மலர்மாலை, 1 கிலோ அரிசி, வெற்றிலை, பாக்கு, நைவேத்தியத்திற்காக சர்க்கரை பொங்கல் அல்லது பாயாசம், குழந்தை எழுதுவதற்கான பலகை, பல்பம், நோட்டு புத்தகம், பேனா போன்றவற்றை தயார் செய்து கோயிலுக்கு பூஜை ஆரம்பிக்கும் நல்ல நேரம் தொடங்குவதற்கு முன்பாக முடிந்த அளவு சீக்கிரமாக செல்வது நல்லது.

கோயிலுக்கு சென்று வித்யாரம்பம் சடங்கு மேற்கொள்ளும் இடத்தில் நீங்கள், உங்கள் குழந்தை மற்றும் உறவினர்கள் சென்று அமர்ந்து கொள்ள வேண்டும். ஒரு தட்டில் அரிசியை முழுவதுமாக தூவி வைக்க வேண்டும்.

பிறகு கோவிலில் உள்ள குரு குழந்தையின் காதில் சரஸ்வதி மற்றும் பிரணவ மந்திரத்தை ஓதி, அக்குழந்தைகளின் கையை பிடித்து அரிசி நிறைந்திருக்கும் பலகையில் 'ஓம்" என்கிற எழுத்தை எழுத வைத்து ஆசீர்வதித்து அனுப்புவார்.

கோயிலில் செய்ய முடியாத பட்சத்தில் வீட்டில் குழந்தையை அப்பா, தாத்தா அல்லது தாய்மாமாவின் மடியில் உட்கார வைத்துக்கொள்ள வேண்டும். அரிசியை முழுவதுமாக தூவி தட்டில் குழந்தையின் கையைப் பிடித்து 'அ" எனும் முதல் எழுத்தை எழுதி பயிலலாம். பிறகு அடிப்படையான எழுத்துக்களையும், எண்களையும் கற்றுத் தரலாம்.

எவ்வாறு வந்தது?

குழந்தைகள் பிறந்தது முதலே இந்த உலகில் தாம் காண்பவற்றைக் கற்று வருகின்றன. கல்வியாக நாம் வீட்டில் சின்னச் சின்னப் பாடல்கள், கதைகள், எழுத்துக்களை உச்சரித்தல் என்று சொல்லித் தருவோம். ஆனால், குழந்தை ஐந்து வயதைத் தொட்டதும் அதற்கு முறையான கல்வியைத் தொடங்க வேண்டும்.

அவ்வாறு தொடங்கும் கல்வி அதன் வாழ்நாள் முழுவதும் துணை நிற்கும். எனவே முதன்முதலில் கல்வி கற்கத் தொடங்கும்போது இறைவனை வழிபட்டுத் தொடங்குவது சிறப்பானது. அவ்வாறு செய்வதன் மூலம் குழந்தைக்கு இறைபக்தி உண்டாகும். கற்கும் கல்வியும் இறைவடிவமே என்பதை உணரும். இதற்காகவே வித்யாரம்பம் என்னும் எழுத்தறிவித்தலை நம் முன்னோர்கள் கடைபிடித்தனர்.

பலன்கள் :

இச்சடங்கை குழந்தைகளுக்கு செய்வதால் கல்வி கடவுளான சரஸ்வதி தேவியின் அருள் குழந்தைகளுக்கு கிடைக்கப்பெற்று, அவர்கள் கல்வி மற்றும் கலைகளில் சிறந்தவர்களாக பரிணமிக்க செய்கிறது. விநாயக பெருமானின் அருளால் குழந்தைகள் எதிர்காலத்தில் சிறந்த கல்வி மற்றும் செல்வம் பெற்று வாழ்வில் மேன்மையடைகின்றனர்.

ஓம் நமசிவாய

 படித்து பகிர்ந்தது 

இரா இளங்கோவன் 

நெல்லிக்குப்பம். 

ஐப்பசி மாத காவிரி துலா ஸ்நானம்

ஐப்பசி மாத காவிரி துலா ஸ்நானம் 

பற்றிய தகவல்கள்...

*எண்ணத்தை ஈடேற்றித்* *தரும் ஐப்பசி மாத* *காவிரி துலா* *ஸ்நானம்*

ஐப்பசி மாதம் முழுவதும் துலாமாதம் எனப்படும். 

இந்தக் காலங்களில் சூரியோதயத்தில் செய்யும் புனித ஸ்நானம் துலா ஸ்நானம் என்று போற்றப்படுகிறது. 

திருச்சி, தஞ்சை திருவாரூர் முதலான மாவட்டங்களில் ஐப்பசி மாதம் சூரியோதயத்தில் செய்யும் புனித ஸ்நானத்தை *துலா காவிரி ஸ்நானம்*என்றே அழைப்பார்கள்.

இந்தப் பூவுலகில், அறுபத்தாறு கோடி தீர்த்தங்கள் உள்ளன எனச் சொல்கிறது புராணம். 

துலாமாதமான ஐப்பசியில் உலகிலுள்ள அறுபத்தாறு கோடி தீர்த்தங்களும் காவிரியில் சங்கமமாகின்றன என்பது ஐதீகம்.

அவை மட்டுமா?

பதினான்கு லோகங்களிலுள்ள புண்ணிய தீர்த்தங்களின் தேவதைகளும் காவிரி நதியில் சங்கமமாவதால், ஐப்பசி மாதத்தில் காவிரியில் நீராடுவது மகத்தான பலன்களை வழங்கும் என்கிறார்கள். 

பொதுவாகவே நதி நீராடுதல் என்பது விசேஷம். 

அதிலும் காவிரியில் நீராடுவது இன்னும் விசேஷம். 

அதைவிட மகா புண்ணியம்... ஐப்பசியில் காவிரியில் நீராடுதல்!

துலா மாதத்தில் காவிரியில் நீராடினால், நம்முடைய எல்லாவிதமான

விருப்பங்களும் நிறைவேறும். 

இறுதிக்காலத்தில் எமவாதனையின்றி 

முக்தியும் அடையலாம் என சாஸ்திரங்கள் கூறுகின்றன.

ஐப்பசி மாதத்தில் இரவு 

நேரமும் பகல் நேரமும் 

சமமாக இருப்பதால், இதற்கு ‘துலா(தராசு) மாதம் என்று பெயர்.

‘ஐப்பசி முதல் தேதி அன்று காவிரியில் நீராடுவது புண்ணியம்’ என்கின்றன ஞான நூல்கள். 

துலா மாதத்தில் இதர நதிகளும் புண்ய தீர்த்தங்களும் காவேரியில் சேர்ந்து விளங்குகின்றன. 

ஆதலால் அப்போது ஸ்நானம் செய்பவர்கள் பஞ்ச மகா பாதகங்களிலிருந்தும் விடுபடுகின்றனர். 

அதில் ஸ்நாநம் செய்தவர்கள் அச்வமேத யாகம் செய்த பலனையும் அடைகின்றனர்.

துலா மாதத்தில் காவேரிக் கரையில் எவனோருவன் பித்ருக்களை உத்தேசித்து ச்ராத்தம், பிண்டதானம், தர்ப்பணம் இவற்றைச் செய்கிறானோ அப்படிச் செய்யப்பெற்ற அவை கல்ப கோடி வர்ஷபர்யந்தம் பித்ருக்களை த்ருப்தி செய்விக்க வல்லவையாகின்றன. 

பிரம்மா முதலான ஸகல தேவர்களும், ஸரஸ்வதி, கெளரி, லக்ஷ்மி, இந்த்ராணி முதலியவர்களும் அப்ஸர ஸ்த்ரீகளும் துலா மாதத்தில் காவிரியில் ஸ்நானம் செய்ய விரும்பி வருகின்றனர். 

காவேரிக் கரைகளில் 

பிறந்து வளர்ந்த பசு பக்ஷி முதலானவையும் அதன் காற்றினால் பரிசுத்தங்களாக ஆகி, மோக்ஷத்தை அடைகின்றன என்றால் 

பக்தி ச்ரத்தையுடன் ஸ்நானம் செய்தவர்கள் அடையும் பலனைப் பற்றிச் சொல்லவும் வேண்டுமா?

மேலும் மஹான்களின் பெருமை, துளஸியின் மஹிமை, கங்கையின் ப்ரபாவம், துளஸியைக் கொண்டு செய்யப்படும் அர்ச்சனையின் வைபவம், ஸாளக்ராமத்தின் ஆராதன மஹிமை, காவேரியின் பெருமை இவற்றை உபதேசிக்கக் கேட்பவர்கள் மஹாபாக்கியசாலிகள். 

ஐந்மாந்தரங்களில் புண்யம் செய்தவர்களே காவேரியைக் காணும் பாக்கியத்தையும் அதில் ஸ்நாநம் செய்ய யோக்யதையையும் பெற்றவர்களாக ஆகின்றனர். 

ஸாமான்யமானவர்களுக்கு இது கிட்டாது. 

நதிகளில் மஹாவிஷ்ணுவின் திருவடியிலிருந்து உண்டான கங்கை எப்படி உயர்ந்ததோ, புஷ்பங்களில் துளஸி எவ்வாறு மேற்பட்டதோ, வ்ரதங்களுக்குள் ஏகாதசி வ்ரதம் எப்படி உயர்ந்ததாக உள்ளதோ, க்ருஹஸ்தர்கள் செய்ய வேண்டிய கர்மாக்களுள் 

பஞ்ச மஹாயஜ்ஞங்கள் எவ்வாறு உயர்ந்தவையோ, சுத்திகளுக்குள் மனசுத்தி எப்படி உயர்ந்ததோ, தேவதைகளுள் ஸ்ரீமந்நாராயணன் 

எவ்வாறு உயர்ந்தவராக விளங்குகிறாரோ,

அக்ஷரங்களுக்குள் ஓங்காரம் எவ்வாறு உயர்ந்ததோ, வேதங்களுள் ஸாமவேதம் எப்படி உயர்ந்ததாகக் கருதப் பெறுகிறதோ, பதினோரு ருத்ரர்களுக்குள் சங்கரம் எப்படி உயர்ந்தவராக உள்ளாரோ, ப்ராஹ்மண ஸ்த்ரீகளுள் அருந்ததி எவ்வாறு மேம்பட்டவளோ, ஸ்த்ரீகளுக்குள்மஹாலக்ஷ்மி எப்படி உயர்ந்தவளோ, தானங்களுக்குள் அன்னதானம் எப்படி உயர்ந்ததோ அதேபோல் நதிகளுக்குள் உயர்ந்தது காவேரி நதி என்று புராணங்கள் கூறுகின்றன.

ஐப்பசி முதல் நாளன்று திருப்பராய்த்துறையிலும் ஐப்பசி கடைசி நாள் மயிலாடுதுறையிலும் நீராடுவது விசேஷமாகக் கருதப்படுகிறது.

துலா மாதமாகிய ஐப்பசியில் பிரம்ம முகூர்த்தத்தில் காவிரி நதியில் நீராடினால், மகாவிஷ்ணுவின் அருள் கிட்டும்.

துலா மாதத்தில் சூரிய உதயத்திற்கு சுமார் ஒன்றரை நேரத்திற்குமுன் காவிரியில் மும்மூர்த்திகளும், முப்பது முக்கோடி தேவர்களும், 

68 ஆயிரம் ரிஷிகளும், முனிவர்களும் சித்தர்களும் நீராடுவதாக சாஸ்திரம் குறிப்பிடுகிறது.

துலா மாதத்தில் காவிரியில் நீராடுவது புனிதமானது என்று சாஸ்திரம் சொல்லும் அதே வேளையில் இயலாத நிலையில் ‘கடைமுகம்’ என்று சொல்லப்படும் ஐப்பசி 

30ந் தேதி நீராடி பலன் பெறலாம். 

அன்றும் நீராட முடியாதவர்கள், ‘முடவன் முழுக்கு’ என்று சொல்லப்படும் கார்த்திகை முதல் தேதி நீராடினாலும்

புனிதம் பெறலாம் என்று ஞான நூல்கள் கூறுகின்றன.

‘ஐப்பசி மாதத்தில் காவிரியில் நீராடுவது காசியில் ஓடும் கங்கை நதியில் நீராடுவதற்கு சமம்’ என்று புராணங்கள் கூறுகின்றன. 

ஏனெனில் ஐப்பசி மாதமானது துலா மாதத்தில் கங்கை, யமுனை, சரஸ்வதி முதலான பாரதத்தில் ஓடும் நதி தேவதைகள் அனைத்தும் காவிரியில் நீராடி, தங்களிடம் மானிடர்கள் கரைத்துச் சென்ற பாபக்கறைகளைப் போக்கிக் கொள்கின்றது என்று காவிரி மகாத்மியம் என்னும் நூல் கூறுகிறது.

மக்கள் தங்களுடைய பாவங்களை போக்க கங்கையில் நீராடி நீராடி கங்கைக்கே பாவம் அதிகமாக சேர்ந்து தோஷம் ஏற்பட தன் பாவங்கள் தீர என்ன செய்ய வேண்டும்? என்று விஷ்ணு பகவானிடம் கேட்டாள் கங்கை. 

அதற்கு ஸ்ரீமகாவிஷ்ணு, “நீ காவேரி நதியில் நீராடு. உன் பாவம் நீங்கும்” என்றார்.

அன்ய க்ஷேத்ரே க்ருதம் பாபம் புண்யக்ஷேத்ரே விநச்யதி |

புண்ய க்ஷேத்ரே கிருதம் பாபம் வாரனாச்யாம் விநச்யதி |

வாரனாச்யாம் க்ருதம் பாபம் கும்பகோனே விநச்யதி |

கும்பகோனே க்ருதம் பாபம் காவேரி ஸ்நானே விநச்யதி |

என்று காவேரி ஸ்நானத்தின் மகிமையை வேதம் போற்றுகிறது.

அதன்படியே ஒவ்வொரு ஆண்டும் ஐப்பசி மாத அமாவாசையன்று கங்காதேவி காவேரியில் நீராடி மக்கள் தன்னிடம் கரைத்த பாவங்களைப் போக்கிக் கொள்கிறாள் என்று 

புராண இதிகாசங்களில் போற்றப்படுகின்றது

துலா மாதத்தில் காவிரியில் ஒருமுறை நீராடுபவன் ஸ்ரீமன் நாராயணனாக மாறுகிறான். 

மற்ற விரதங்களில் ஏதாவது சிறு தவறு ஏற்பட்டாலும் அதற்கு பிராயச்சித்தம் செய்ய வேண்டும். 

ஆனால், காவிரி துலா ஸ்நானத்திற்கு அப்படி எதுவுமில்லை.

‘மக்களுக்கு புத்தியும் முக்தியும் அளிக்கும் துலா மாதத்தில் காவிரியில் நீராடுபவர்கள் தன்னையும், தங்கள் குடும்பத்தினரையும், முன்னோர்களின் பாபங்களையும் போக்கிக் கொள்வதுடன் வளமான வாழ்வு காண்கிறார்கள்’ என்று ஞான நூல்கள் கூறுகின்றன.

‘துலா காவிரி நீராடல் அழகு, ஆயுள், ஆரோக்கியம், செல்வம், கல்வி, மாங்கல்ய பாக்கியம், குழந்தைப்பேறு, வலிமை ஆகியவற்றை தரும். 

எனவே, காவிரியை நினைத்தாலும், சிறப்பைக் கேட்டாலும், பாபங்கள் விலகும்’ என்றார் பிரம்மா, நதி தேவதைகளிடம்.

ஐப்பசி மாதத்தில் 

காவிரியில் நீராடி 

நீர்க்கடன் செலுத்துவோரின் முன்னோர்கள் சொர்க்கத்தை அடைகிறார்கள். 

காவிரி தேவியை வணங்கி துதிப்பவர்கள் சொர்க்க லோகம் செல்லும் பாக்கியத்தைப் பெறுகிறார்கள். 

தன்னில் நீராடுபவர்களின் வேண்டுதல்களை நிறைவேற்றி வளமான வாழ்வு தருபவள் என்கிறது காவிரி புராணம்.நதி தேவதைகளும்,

தேவர்களும், மானிடர்களும் துலா மாதத்தில் காவிரியில் நீராடி தங்களிடம் உள்ள பாபங்களைப் போக்கிக்கொண்டதும், 

அந்தக் கறைகள் அனைத்தையும் காவேரி போக்கிக்கொள்ள திருமங்கலக்குடி திருத்தலத்திலும், 

மாயூரத்தில் (மயிலாடுதுறை) உத்தர வாகினியாக (தெற்கிலிருந்து வடக்கு நோக்கிப் பாய்வது) இருந்து காவிரி போக்கிக்கொள்கிறாள் என்பது ஐதீகம்.

ஸ்ரீரங்கம் திருத்தலத்தில் அருள்புரியும் ரங்கநாதருக்கு ஐப்பசியில் தங்கக்குடங்களில் ஸ்ரீரங்கத்தின் தென்பகுதியில் உள்ள அம்மா மண்டபம் காவிரி நதிக்கரைப் படித்துறையிலிருந்து புனிதத் தீர்த்தத்தை சேகரித்து யானை மீது எடுத்து வந்து அபிஷேகம் செய்வர். 

மற்ற மாதங்களில் ஸ்ரீரங்கத்தின் வடக்கில் உள்ள கொள்ளிடத்தில் இருந்து வெள்ளிக் குடங்களில் தீர்த்தம் கொண்டுவந்து அபிஷேகம் செய்வார்கள்.

துலா காவேரி மஹாத்மியம்:

ஆதியில் உமாதேவிக்கு ஸ்ரீ பரமேச்வரன் சொன்ன காவேரி மகாத்மியத்தை, தேவ வன்மன் என்ற அரசனுக்கு,சுமத்திரங்கி என்ற ரிஷி சொல்லத் தொடங்குகிறார். 

ஒரு சமயம் பார்வதி-பரமேச்வரர்கள் 

ஒரு நந்தவனத்தில் தங்கியிருந்தபோது அங்கு பறவைகள் வடிவில் வந்த நதி தேவதைகள், துலா மாதத்தில் காவேரியில் ஸ்நானம் செய்துவிட்டு அவ்விருவரையும் தரிசிக்க வந்தன. 

அவர்கள் வேண்டிய வரங்கள் எல்லாவற்றையும் தந்த ஈச்வரன், மேலும் கூறலானார்:

“கங்கைக்கு நிகரான காவிரியில் நீராடினாலும், தரிசித்தாலும், அதனை பக்தியுடன் தொட்டாலும் அதன் கரையில் தானம், தர்ப்பணம் செய்தாலும் எல்லா பாவங்களும் விலகி, புண்ணியம் கிட்டும். 

இதன் கரைகளில் காசிக்கு சமமான ஸ்தலங்களும் இருக்கின்றன. 

நினைத்ததைத் தரும் சிந்தாமணியான காவேரியின் பெருமையை இன்னும் சொல்கிறேன் கேள்” என்றார். 

அஸ்வமேத யாகம் செய்யத் தொடங்கிய அரிச்சந்திர மகாராஜாவை, முனிவர்கள், பிராயச்சித்தமாக துலா மாதத்தில் காவிரியில் நீராடிவிட்டு வரச்சொன்னார்கள்.

நாதசந்மா என்பவன், பரம பதிவ்ரதையான அனவித்யை என்பவளுடன் காவேரி ஸ்நானம் செய்வதற்காகவும் இருவரும் மோக்ஷ சாம்ராஜ்யத்தைப் பெற வேண்டியும், கௌரி மாயூர க்ஷேத்திரத்தை நோக்கி வந்தான். 

முனிவர்கள், தங்கள் பத்தினிகளுடனும், புத்திரர்களுடனும் தங்கி, ஹோமாக்னி செய்து, பலவித தானங்களை செய்துவரும் அந்த மோக்ஷ புரியில் நாமும் தங்கி நற்கதி பெறுவோம் என்றான் நாதசன்மன். 

அப்படியானால். காவேரி, 

மற்ற எல்லா தீர்த்தங்களை 

விட எவ்வாறு உயர்ந்தது 

என்று, அனவித்யை கேட்க, 

நாத சந்மனும் கூறத்தொடங்கினான்.

காவிரி உருவான கதை:

காவேரன் என்ற அரசன், தனக்குப் புத்திர பாக்கியம் இல்லாததால் பிரம்மாவைக் குறித்துத் தவம் செய்தான். 

பிரம்மாவானவர், “உனக்குப் புத்திர பாக்கியம் இல்லாவிட்டாலும், ஒரு குழந்தையை அளிக்கிறேன்” என்று கூறி, தன மனத்தால் 

ஒரு பெண் குழந்தையை உண்டாக்கி அவனிடம் அளித்தார். 

காவேரி என்ற பெயரில் அவனிடம் வளர்ந்த அப்பெண், தகுந்த கணவனை வேண்டித் தவம் செய்யலானாள். 

பின்னர்,அகஸ்த்திய முனிவரைக் கண்ட காவேரியானவள், இவரே 

தனது மணாளர் ஆவார் என்று நினைத்து, லோபாமுத்ரா என்ற பெயருடன் அவரை திருமணம் செய்துகொண்டவுடன், அவள் விரும்பியபடியே, நதி ரூபமாகி, பிற நதிகளுக்கும் மனிதர்களுக்கும் ஏற்பட்ட பாவங்களை நீக்கவும், மோக்ஷத்தை அளிக்கவும் 

மறு அம்சமாகத் திகழுமாறு, அகஸ்திய மஹரிஷி அருளினார்.

துலாக் காவேரியின் நீர்த்திவலைகள் ஒவ்வொன்றும் புண்ணிய தீர்த்தமாகும். அதிலுள்ள மணல்கள் எல்லாம் தேவதைகள். 

அதனால்தான் உலகிலுள்ள புனித நதிகள் அனைத்தும் துலா மாதத்தில் காவேரியில் நீராடி, மக்கள் தங்களிடம் கரைத்த பாவக் கறைகளைக் கழுவி புனிதமடைகின்றன.

துலா மாதத்தில் காவேரியில் நீராடுபவர்கள், தங்கள் குடும்பத்தினரையும் 

சேர்த்து, மூன்று கோடி உறவினர்களையும் கடைத்தேற்றுகிறார்கள்.

துலா மாதத்தில் காவேரியில் நீராடி, முன்னோர்களுக்கு பிதுர்பூஜை செய்து அன்னதானம், ஆடை தானம் அளித்தால் பித்ருக்கள் மகிழ்ந்து வாழ்த்துவார்கள்.

அழகு, ஆயுள், ஆரோக்கியம், சொல்வளம், கல்வி, வாழ்வில் சுகம் என எல்லாம் கிட்டு மென்று துலாக் காவேரி மகாத்மியம் கூறுகிறது.

ஆதி, இடை, கடை என்னும் மூன்று அரங்கங்களையும் தன்னகத்தே கொண்டு, சதாசர்வ காலமும் இறைவன் நாராயணனின் திருவடியைத் தழுவி வணங்கும் காவேரியின் பேறும் பெருமையும் தன்னிகரற்றது.

தட்சிணகங்கை என்று போற்றப்படும் காவேரிக்கு பொன்னி, விதிசம்பூதை, கல்யாணி, சாமதாயினி, கலியாண தீர்த்தரூபி, உலோபமுத்ரா, சுவாசாஸ்யாமா, கும்பசம்பவ வல்லவை, விண்டுமாயை, கோனிமாதா, தக்கணபதசாவணி என பல பெயர்கள் உள்ளன.

காவேரியில் துலா ஸ்நானம் செய்து ஸ்ரீரங்கநாதரை வழிபட்டதன் பலனாக சந்தனு மகாராஜா பீஷ்மரை புத்திரனாக அடைந்தார்;

அர்ச்சுனன், துலா ஸ்நானம் செய்து ஸ்ரீரங்கநாதப் பெருமாளை துதித்து சுபத்ராவை மணம் புரிந்தான் என்று புராணம் கூறுகிறது.

முரன் முதலான அசுரர்களை அழித்ததால் மகாவிஷ்ணுவிற்கு

பற்றிய “வீரஹத்தி’ தோஷம் போக்க, காவேரியில் ஐப்பசி மாதம் நாக சதுர்த்தியன்று 

துலா ஸ்நானம் செய்து, தோஷம் நீங்கப்பெற்றார் 

என்று துலாக் காவேரி மகாத்மியம் கூறுகிறது

ஐப்பசி முதல் தேதி திருச்சிக்கு அருகிலுள்ள திருப்பராய்த்துறையிலும், இரண்டாவது நீராடலை ஸ்ரீரங்கம் அம்மா மண்டபம் படித்துறையிலும்,

கடைசி தேதியன்று மயிலாடுதுறை நந்திக் கட்டத்திலும் முழுக்குப் போட வேண்டும் என்பது ஐதீகம்.

தலைக்காவேரி, ராமபுரம், ஸ்ரீரங்கம், திருப்பராய்த்துறை, திருவானைக்காவல், சப்தஸ்தானம், திருவையாறு, புஷ்பாரண்யம், திருச்சாய்க்காடு, திருவெண்காடு, மயிலாடுதுறை, கும்பகோணம், திருவிடைமருதூர் முதலிய காவேரி நீர்த்துறைகள் துலா மாதத்தில் நீராட சிறந்தவையாகக் கருதப்படுகின்றன.

துலாக் காவேரி ஸ்நானம் செய்பவர்கள், காவேரி நதிக்குப் பூஜை செய்து வழிபடுவதுடன், அருகில் அரசமரம் இருந்தால் அதற்கு நீர் வார்த்து, அதை வலம்வந்து வணங்குவது புண்ணிய பலன் தரும்.

காவேரிக் கரையில் கோமாதா பூஜை செய்தால் மேன்மேலும் புனிதம் கிட்டும்.

ஓம் நமசிவாய 

படித்து பகிர்ந்தது 

இரா இளங்கோவன் 

நெல்லிக்குப்பம். 

திருக்கோடிக்காவல் திருக்கோடீஸ்வரர்

திருக்கோடிக்காவல் திருக்கோடீஸ்வரர் திருத்தலம். நவக்கிரகத் தலங்களில் சுக்கிரன் தலமான கஞ்சனூருக்குக் கிழக்கே சுமார் 3 கி.மீ. தொலைவிலிருக்கிறது இந்தத் திருக்கோயில்.

திருக்கோடீஸ்வரர் ராஜகோபுரம்

திருக்கோடீஸ்வரர் ராஜகோபுரம்

திருஞானசம்பந்தர், சுந்தரர், திருநாவுக்கரசர் ஆகியோரால் தேவாரம் பாடப் பெற்ற சிவத்தலம் இது. இவ்வூர் வேத்ரவனம் எனப் புராணத்தில் அழைக்கப்பட்டுள்ளது. இத்தலம் பெரிய கோயில் எனவும் அழைக்கப்படுகிறது. தேவாரப் பாடல் பெற்ற மற்றும் சோழநாடு காவிரி வடகரைத் தலங்களில் அமைந்துள்ள 37ஆவது தலம் இது.

இத்தலத்தின் தலவிருட்சமாகப் பிரம்பும் தீர்த்தமாக சிருங்கோத்பவ தீர்த்தமும் மற்றும் காவிரி நதியும் உள்ளன. இத்தலத்தின் இறைவன் - கோடீஸ்வரர், கோடிகாநாதர்.

கோயில் அமைப்பு

கொடிமரம்

கொடிமரம்

கோயிலின் உள்ளே நுழையும்போதே அழகான சிற்பங்கள் இரு புறமும் காணப்படுகின்றன. இடதுபுறம் அகஸ்தீசுவரர் சன்னதி உள்ளது. கொடிமர கணபதி, பலிபீடம், நந்தியைக் கடந்து உள்ளே சென்றால் பஞ்சமூர்த்தி அலங்கார மண்டபம், திரிபுரசுந்தரி அம்மன் சன்னதிகள் உள்ளன. எதிரே நர்த்தன விநாயகர் உள்ளார். அம்மன் சன்னதியின் வலப்புறம் ஆடிப்பூர அம்மன் அமைந்துள்ளார். இடப்புறம் பள்ளியறை உள்ளது. அடுத்து நடராஜர் சன்னதி அமைந்துள்ளது.

இந்தக் கோயிலையும் தரிசிக்கலாமே: ராகு - கேது தோஷம் நீக்கும் காளஹஸ்தி திருக்காளத்தீசுவரர் திருக்கோயில்

உள் மண்டபத்தில் வலப்புறம் சித்திரகுப்தரும், இடப்புறம் எமதர்மனும் உள்ளனர். மூலவர் சன்னதிக்கு முன்பாக நந்தியும், பலி பீடமும் இருக்கின்றன. இரு புறமும் துவாரபாலகர்கள் உள்ளனர். வெளித்திருச்சுற்றில் சம்பந்தர், அப்பர், சுந்தரர், பரவை நாச்சியார், சங்கிலியார், கணபதி, நாகர், விசுவநாதர் விசாலாட்சி, ஏகாம்பரேசுவரர் காமாட்சி, வள்ளி தெய்வானையுடன் கூடிய சண்முகேசர் சன்னதிகள், கரையேற்று விநாயகர் சன்னதிகள் ஆகியவை உள்ளன.

திருக்கோடீஸ்வரர் கோயில்

திருக்கோடீஸ்வரர் கோயில்

அடுத்து ரிக்வேத லிங்கம், யஜுர் வேத லிங்கம், சாமவேத லிங்கம், அதர்வண வேத லிங்கம் ஆகியவை உள்ளன. தொடர்ந்து கஜலட்சுமி, க்ஷேத்ரபாலகர்கள், வடுக பைரவர், சூரியன், சந்திரன், நாகேசுவரர், சண்டபீடேசுவரர், கஹானேசுவரர் உள்ளனர். பால சனீஸ்வரர் சன்னதி தனியாக உள்ளது. கருவறை கோஷ்டத்தில் நடராஜர், சிவகாமி, கணபதி, தட்சிணாமூர்த்தி, லிங்கோத்பவர், பிரம்மா, பிட்சாடனர், அஷ்டபுஜ துர்க்கை, அர்த்தநாரீஸ்வரர், சூரிய மண்டல பிரம்மா ஆகியோர் உள்ளனர். அருகே சண்டிகேசுவரர் சன்னதி உள்ளது.

ஸ்ரீ அஷ்டபுஜ துர்க்கை

ஸ்ரீ அஷ்டபுஜ துர்க்கை

இந்தக் கோயிலையும் வலம் வரலாம்: சனி தோஷம் நீக்கும் நள்ளாற்று நாயகன் - திருநள்ளாறு திருக்கோவில்

பிற சிறப்புகள்

இத்தலம் மூன்று கோடி முனிவர்களால் வழிபடப்பட்டது. இக்கோயில் கண்டராதித்த சோழன் மனைவி செம்பியன் மாதேவியால் கற்றளியாக்கப்பட்டது. பஞ்ச(கா) தலங்களில் ஒன்றான, திருக்கோடிக்கா தலத்தில் எழுந்தருளியுள்ள சுயம்பு மூர்த்தியான அருள்மிகு கரையேற்று விநாயகர் மிகச் சிறப்புடையவர். இத்தலத்து விநாயகப் பெருமானை முதலில் வழிபடுவது மரபு.

உள் மண்டபம்

உள் மண்டபம்

ஈசனால் சம்ஹாரம் செய்யப்பட்ட எமனை உயிர்பெறச் செய்வதில் இத்தலத்து விநாயகர் பேருதவி செய்ததால் ஸ்ரீ கரையேற்று விநாயகர் எனப் பெயர் பெற்றிருக்கிறார். திருக்கடையூரில், கால சம்ஹாரம் நடந்த பிறகு, யமதர்மன் தன்னுடைய அனைத்து சக்திகளையும் இழந்து, அனைத்தும் சிவத்திற்குள் அடக்கம் என்ற நிலையுணர்ந்து, பிரம்புக் காட்டினுள் உறைந்துள்ள திருகோடிக்காவல் ஈசனுக்குள் ஐக்கியமாகி அசைவற்றுக் கிடந்தார். காலன் இயக்கமற்றுவிட்டதால், பூலோகத்தில் மரணம் நின்றுவிட்டது.

இதனால் பூமி தன் பாரம் தாங்காமல், பூமாதேவி செயல்பட முடியாமல் சகல பூலோக காரியங்களும் முரண்பட்டு, நிலை தடுமாறியது. விபரீதத்தை உணர்ந்த இந்திராதி தேவர்கள் சிவபெருமானிடம் முறையிட எண்ணி, திருக்கோடிக்காவல் நோக்கி ஓடி வந்தனர்.

உள்பிரகாரம்

உள்பிரகாரம்

அப்போது கங்கைக்குச் சமமான, உத்தரவாஹினியாகிய காவிரி நதியைக் கடக்க எண்ணுகையில், திடீரென காவிரியில் வெள்ளம் பெருக்கெடுத்துச் சுழலில் சிக்கி மீள முடியாது தவித்தனர். ஈசனைச் சந்திக்கும் அவசர கதியில் முதற்கடவுளாம் விநாயகரைப் பூஜிக்காது, வந்ததனால் ஏற்பட்ட சோதனை இது என்பதை உணர்ந்தனர்.

ஸ்ரீ கரையேற்று விநாயகர்

ஸ்ரீ கரையேற்று விநாயகர்

உடனே ஆற்று மணலிலேயே விநாயகப் பெருமானது உருவத்தைச் சிருஷ்டி செய்து, அவரிடத்தே பிழை பொறுத்துக் காக்க வேண்டினர். இதனால் மனமிரங்கிய விநாயகரும் ஆற்று வெள்ளத்தைத் தணித்துத் தேவர்களைக் கரையேற்றினார். அப்போது முதல், இத்தலத்து விநாயகர் 'கரையேற்று விநாயகர்' என்ற நாமம் தாங்கி அருளி வருகிறார் என்கிறது தல வரலாறு.

இந்தக் கோயிலுக்கும் சென்றுவரலாம்: குழந்தைப் பேறு அருளும் வேதாரண்யம் திருமறைக்காடர் திருக்கோயில்

ஆற்று மணலினால் ஆன திருமேனி என்பதால், விஸ்தாரமான அபிஷேகாதிகள் இவருக்குச் செய்யப்படுவதில்லை என்பதும் குறிப்பிடத்தக்கது. இதுதவிர, திருக்கோடிக்காவல் தலமானது யம வாதனை இல்லா பூமி. ஜன்ம வினைகள் நசிந்து, உயிர்கள் கடைத்தேற அருளுபவர் என்பதாலும், இவர் 'கரையேற்று விநாயகர் என்று போற்றப்படுகிறார். வாழ்வில் பிரச்னைகளால் தத்தளிப்போர் இத்தலத்து விநாயகரை வணங்கி வழிபட்டால் நலம் பெறலாம் என்கின்றனர் பக்தர்கள்.

சாபம் நீக்கிய தலம்

திரிகோடி என்றால் மூன்று கோடி என்று அர்த்தம். மூன்று கோடி மந்திர தேவதைகளுக்கு ஏற்பட்ட சாபம் இந்தத் தலத்தில் நீங்கியதால் திருகோடிகா என்று பெயர் உண்டாயிற்று. முக்தி வேண்டி மூன்று கோடி மந்திர தேவதைகள் இங்கே தவம் இருந்தனர். அப்போது காவிரியில் வெள்ளம் பெருக்கெடுத்து ஓட, அனைவரும் விநாயகரைத் துதித்து வேண்டினர். அவரும் அவர்களைக் கரையேற்றி அருள் பாலித்தார். அகத்தியர் மந்திர தேவதைகளுக்கு உபதேசித்து மணலால் விநாயகரைப் பிடித்துவைத்து பிரதிஷ்டை செய்தார்.

திருக்கோடீஸ்வரர் - திரிபுரசுந்தரி (உற்சவ மூர்த்தி)

திருக்கோடீஸ்வரர் - திரிபுரசுந்தரி (உற்சவ மூர்த்தி)

முக்கோடி மந்திர தேவதைகள் இந்த விநாயகரை சஹஸ்ர நாமத்தால் (ஆயிரம் திருப்பெயர்களால்) அர்ச்சனை செய்து பூஜித்தனர். கரையேற்று விநாயகர் இத்திருக்கோயிலில் தென்மேற்குத் திசையில் அருள்பாலிக்கிறார். இவருக்கு ஆயிரம் மலர்களால் சஹஸ்ரநாம அர்ச்சனை செய்து வழிபட, எல்லாவிதமான சாபங்களும் தோஷங்களும் நீங்கும். இங்கே மூன்று கோடி தேவதைகள் நந்தியின் கொம்பால் உண்டான சிருங்கோத்பவ தீர்த்தத்தில் நீராடி இறைவனை வழிபட்டனர். அப்போது அங்கிருந்து கிளம்பிய திவ்ய ஒளிப்பிழம்பில் அனைவரும் ஐக்கியமாகிவிட்டதாகத் தல புராணம் விவரிக்கிறது.

இந்தக் கோயிலையும் தரிசிக்கலாமே: கோள்களின் குற்றம் நீக்கிய திருக்குவளை கோளிலிநாதர் - நவ கிரகங்களின் தோஷம் அகலும்

எமபயம் இல்லை

சிவபுராணத்தில் பன்னிரெண்டாவது அத்தியாயத்தில் விவரிக்கப்படும் மற்றொரு நிகழ்ச்சி, இத்தலத்தின் மகிமைக்கு மேலும் சிறப்பூட்டுவதாக அமைந்திருக்கிறது. தன் கணவனைக் கொன்றுவிட்டு, நெறி தவறி தன் வாழ்க்கையை நடத்தி வந்த லோககாந்தா என்ற பெண்மணி, வாழ்க்கையின் இறுதிக் காலத்தில், திருக்கோடிக்கா வந்து தங்க நேர்ந்தது. அவள் மரணமடைந்ததும், எமன், அவளைத் தண்டிக்க, நரகலோகம் அழைத்துச் செல்கிறான். சிவ தூதர்கள், இதை வன்மையாகக் கண்டிக்கின்றனர். எமதர்மராஜன், சிவபெருமானிடம் வந்து முறையிடுகிறார்.

திரிபுரசுந்தரி அம்மன்

திரிபுரசுந்தரி அம்மன்

தமது தலமான திருக்கோடிக்காவோடு, சம்பந்தப்பட்டவர்களைத் தண்டிக்க எமனுக்கு அதிகாரம் இல்லை என்றும், காலதேச வர்த்தமானங்களால், இங்கு வந்தவர்களை எமன் கண்ணெடுத்தும் பார்க்கக் கூடாது என்ற ஒலியைக் காதால் கேட்டவர்களைக் கூட தண்டிக்கும் உரிமை எமனுக்கு இல்லை என்றும், அந்த மண்ணை மிதித்தவர்களிடம் அவன் நெருங்கவே கூடாது என்றும் கட்டளையிடுகிறார்.

திரிபுரசுந்தரி அம்மன் (உற்சவ மூர்த்தி)

திரிபுரசுந்தரி அம்மன் (உற்சவ மூர்த்தி)

பாவக சேத்திரமான திருக்கோடிக்காவில் ஸ்நான, ஜப, தப, தியானங்கள் செய்கிறவர்களை நான் எதுவுமே செய்ய முடியாது என்று யமதர்மராஜன், எமலோகத்தில் முழக்கமிடுகிறான். லோககாந்தா என்ற அந்தப் பெண்மணி இத்தலத்தில் சம்பந்தப்பட்டுவிட்டதால், எமனிடமிருந்து விடுபட்டு, பின் முக்தி அடைகிறாள். எனவே, காசியைப் போல இத்தலத்தில் வாழ்பவர்களுக்கும் எமபயம் கிடையாது.

இந்தக் கோயிலையும் தரிசிக்கலாமே: திருமணத்தடை நீக்கும் திருவேதிக்குடி வேதபுரீசுவரர் திருக்கோயில்

ஜென்மம் ஜென்மமாய் செய்த பாவங்கள் அனைத்தையும் தீர்க்கும் ஒரே தலம் கோடீஸ்வரர் திருக்கோயில். 1008 ஈஸ்வரர்களால் சூழப்பட்ட தலம். சனி பகவானும் எமனும் எதிரெதிர் சன்னதியில் அருள்கின்றனர். அதேபோல் சித்திரகுப்தனும் துர்வாச முனிவரும் எதிரெதிர் சன்னதியில் உள்ளனர். இங்குள்ள சனி பகவான் பாலசனி என அழைக்கப்படுகிறார். இவரது தலையில் சிவலிங்கம் உள்ளது. காக வாகனத்துக்குப் பதில் கருட வாகனம் உள்ளது.

ஸ்ரீ பால சனீஸ்வரர்

மங்கு, பொங்கு, மரணச் சனி மூன்றுக்கும் வழிபடக் கூடிய சனி பகவான் இவர். இவ்வூரை ஒட்டி காவிரி நதி, "உத்தரவாஹினியாக" அதாவது தெற்கிலிருந்து வடக்காகப் பாய்கிறது. இங்குள்ள உத்தரவாஹினியில் கார்த்திகை ஞாயிறன்று அதிகாலையில் நீராடினால் எல்லாப் பாவங்களும் தொலையும் என்பது பூர்வ நம்பிக்கை. 

இத்தலத்தில் நவக்கிரகம் கிடையாது. விதியின் பயனை யாராலும் மாற்ற முடியாது. ஆனால் மதியால் குறைக்க முடியும். விதியினால் கஷ்டப்படுபவர்கள் இத்தலம் வந்து தரிசித்தால் அதன் பாதிப்பு வெகுவாகக் குறையும்.

வடுக பைரவர்

ஒரு சமயம் கைலாசத்தையும், திருக்கோடிக்காவையும் ஒரு தராசில் வைத்துப் பார்த்த போது, இத்தலம் உயர்ந்து, கைலாசம் கீழே போய்விட்டது. இறைவனின் திருமேனிக்குச் சமமான பெருமை கொண்ட பூமி இது. இங்கே கணபதியின் மகிமையும் கூடியுள்ளது. இந்த இடத்தில் செய்யும் தியானம், ஹோமம், ஜபம் எல்லாம் மும்மடங்காகப் பலிக்கிறது.

இக்கோயிலில் ஆழ்வார்களுக்கு அம்பாள் பெருமாளாகக் காட்சி கொடுத்த வரலாறு உண்டு. அத்துடன் எடைக்கு எடை பக்தர்கள் காணிக்கை வழங்கும் துலாபாரம் இக்கோயிலில் இருப்பது விசேஷமானது. மேலும் இக்கோயில் திரிபுரசுந்தரி அம்பாள் சன்னதியில்தான் மகான் பாஸ்கராச்சாரியார் லலிதா சகஸ்ரநாமத்துக்கு பாஷ்யம் எழுதினார்.

நால்வர்

திருக்கோயிலுக்கு எப்படி போகலாம்?

மயிலாடுதுறையிலிருந்து குத்தாலம், கதிராமங்கலம் வழியாகவும், கும்பகோணத்திலிருந்து ஆடுதுறை வந்தும் இத்தலத்தை அடையலாம்.

ஓம் நமசிவாய 

படித்து பகிர்ந்தது 

இரா இளங்கோவன் 

நெல்லிக்குப்பம். 

பிள்ளையார் விரும்பும் 'மோதகம்' நைவேத்தியம் என்றால் என்ன❓

பிள்ளையார் விரும்பும் 'மோதகம்' நைவேத்தியம்

மோதக் என்றால் உற்சாகம், மகிழ்ச்சி என்று பொருள். அகம் என்ற சொல்லுக்கு ‘வழங்கக் கூடியது’ என்று பொருள்.விநாயகருக்கு முதன்முதலில் மோதகம் படைத்து, அவரது அருளை பெற்றவர் அருந்ததி தேவி.

ஓம்கார வடிவமாகவும், ஞானத்தின் வடிவமாகவும் திகழ்பவர் விநாயகப் பெருமான். விநாயகர் வழிபாட்டில் அவருக்கு படைக்கப்படும் உணவுகள் தனித்த இடத்தை பிடிக்கின்றன. உண்மையான பக்தியுடன் எதை படைத்தாலும் விநாயகப் பெருமான் ஏற்றுக்கொள்வார். இருப்பினும் அவருக்கு பிடித்தமான உணவுகளை படைத்து வழிபட்டால் நற்பலன்கள் கிடைக்கும். அந்த வகையில் விநாயகர் வழிபாட்டில் கொழுக்கட்டை, மோதகம், லட்டு, அப்பம், அவல், பொரி, கடலை, சுண்டல் ஆகியவை தவிர்க்க முடியாத இடத்தை பிடிக்கின்றன.

பிள்ளையாருக்கு பல விதமான நைவேத்தியங்கள் படைக்கப்பட்டாலும், அதில் முதன்மை இடத்தை பிடிப்பது மோதகம் தான். வீட்டில் பூஜிக்கப்படும் விநாயகர் கையில் மோதகம் இருக்க வேண்டும் என்பார்கள். மோதகம் என்பது தேங்காய், வெல்லப்பாகு, அரிசி மாவு ஆகியவற்றை சேர்த்து செய்யப்படும் பதார்த்தம் ஆகும். விநாயகர் சதுர்த்தி அன்று விநாயகருக்கு மோதகம் படைத்து வழிபட்டால் விருப்பங்கள் அனைத்தும் நிறைவேறும் என்பது ஐதீகம். விநாயகருக்கு மோதகம் நைவேத்தியமாக படைப்பதற்கு முக்கியமான காரணம் உண என்றால் மோதக் + அகம் ஆகும். மோதக் என்றால் உற்சாகம், மகிழ்ச்சி என்று பொருள். அகம் என்ற சொல்லுக்கு 'வழங்கக் கூடியது' என்று பொருள். மகிழ்ச்சியையும், ஆனந்தத்தையும் வழங்கக் கூடிய பொருள் என்பதால் மோதகத்தை விநாயகருக்கு படைத்து வழிபடுவது சிறப்பானதாகும்.

ஒரு சமயம் அத்ரி ரிஷியின் மனைவியான அனுசுயா, சிவன், பார்வதி, விநாயகர் ஆகியோரை விருந்திற்காக அழைத்திருந்தார். எந்த உணவை கொடுத்தாலும் விநாயகரின் பசியை போக்க முடியாது என்பதை புரிந்து கொண்ட அனுசுயா, இனிப்பு கலந்த மோதகத்தை சாப்பிடக் கொடுத்தார். மொத்தமாக 21 மோதகங்களை விநாயகருக்கு அளித்தார். அதை சாப்பிட்டதும் விநாயகப் பெருமானின் பசி முழுவதுமாக நீங்கி, மகிழ்ச்சி அடைந்தார்.

இதைக் கண்ட பார்வதி தேவி, அனுசுயாவை போல் எவர் ஒருவர் விநாயகருக்கு மோதகம் படைத்து வழிபடுகிறார்களோ அவர்களின் விருப்பங்கள் அனைத்தையும் விநாயகப்பெருமான் நிறைவேற்றி வைப்பார் என வரம் அளித்தார். பார்வதி தேவி அளித்த வரத்தின் படி, பக்தர்கள் தாங்கள் விநாயகரிடம் முன்வைத்த கோரிக்கைகள் நிறைவேறுவதற்காக மோதகத்தை நைவேத்தியமாக படைக்கிறார்கள்.

விநாயகருக்கு முதன்முதலில் மோதகம் படைத்து, அவரது அருளை பெற்றவர் அருந்ததி தேவி என்று கூறப்படுகிறது. கற்புக்கு இலக்கணமாகத் திகழ்ந்து, வானில் இன்றும் விண்மீனாய் வலம் வருபவர் வசிஷ்டரின் மனைவியான அருந்ததி. புண்ணிய பலன் காரணமாக ஒருமுறை வசிஷ்டரின் ஆசிரமத்துக்கு விஜயம் செய்தார் விநாயகர். அவர் வருவதை அறிந்த அருந்ததி, அவருக்காக புதிய நைவேத்தியம் செய்ய விரும்ப பெருமான், அண்டத்தின் எல்லா இடங்களிலும் நிறைந்து இருப்பவர். இதனால் அண்டத்தை உணர்த்தும் விதமாக வெள்ளை மாவினால் 'செப்பு' எனும் மேல் பகுதியை செய்தார். அண்டத்தின் உள்ளே பூரணமாக நிறைந்திருக்கும் விநாயகரை உணர்த்தும் விதமாக, இனிப்பான பூரணத்தை மாவுக்குள்ளே வைத்து மோதகத்தை தயார் செய்தார். பின்பு வசிஷ்டரிடம் அதைக் கொடுத்து விநாயகருக்கு படைத்தார்.

அப்படி அவர் அளித்த பிரசாதத்தின் தத்துவச் சிறப்பை உணர்ந்த பிள்ளையார், அதை உலகுக்கு உணர்த்தும் விதமாக, மோதகத்தை எப்போதும் தன் திருக்கரங்களில் ஏந்திக் கொண்டிருக்கிறார். அருந்ததி மூலம் நமக்குக் கிடைத்த அந்த அருள் பிரசாதத்தைப் போன்றே, விநாயகர் சதுர்த்தியான இன்று நம் வாழ்வும் இனிப்பும் தித்திப்புமாகப் பூரணத்துவம் பெற பிள்ளையாரை வழிபடுவோம். 

ஓம் நமசிவாய

 படித்து பகிர்ந்தது 

இரா இளங்கோவன் 

நெல்லிக்குப்பம். 

விநாயகர் சதுர்த்தி விழா

விநாயகர் சதுர்த்தி!

முழு முதற் கடவுள், மூலப்பொருளோன் என்று சொல்லி அனை வரும் வணங்குவது விநாயகரையே. எந்த செயல்களை செய்யும் முன்பும் பிள்ளையார் சுழி போட்டுதான் ஆரம்பிக்கிறோம். கணபதியை வணங்கினால் காரிய தடைகள் யாவும் நீங்கும்.

விநாயகர் இச்சா சக்தி, கிரியா சக்தி, ஞானசக்தி என்ற மும்மதங்களை பொழிகின்றார். சந்தனம், களிமண், மஞ்சள், சாணம் இப்படி எளிதாகக் கிடைக்கக்கூடிய பொருளில் விநாயகரை செய்து வழிபடலாம்.

விநாயகருக்கு எளிதாக கிடைக்கக்கூடிய அறுகு வைத்து வழிபட்டால் பிறவிப் பிணி நீங்கி, இன்பம் பெருகும்.

சாணம், புற்றுமண், மஞ்சள், வெல்லம், எருக்கம் வேர், சந்தனம் ஆகியவற்றில் பிள்ளையார் உருவம் செய்து வழிபட்டால் அனைத்துவிதமான நலன்களும் பெற்று மோட்சம் அடைவர்.

தும்பை பூ, செம்பருத்தி மலர், சங்கு புஷ்பம், எருக்கம்பூ, மாவிலை, அறுகம்புல், வில்வ இலை ஆகியவை விநாயகருக்கு மாலையாக அணிவிக்க உகந்தவையாகும்.

வசிஷ்டரின் மனைவியான அருந்ததி முதன் முதலாக விநாயகருக்கு கொழுக்கட்டை படைத்து வழிபட்டார்.

வன்னி மரத்தடியில் இருக்கும் விநாயகரை மிருகசீரிஷம், சித்திரை, அவிட்டம் ஆகிய நட்சத்திர நாட்களில் வழிபாடு செய்து ஒன்பது கன்னிப்பெண்களுக்கு அன்னதானம், வஸ்திர தானம் அளித்து வந்தால் மாங்கல்ய தோஷம் அகலும், திருமணத்தடையும் நீங்கும்.

சொர்ண கணபதி மந்திரம் சொல்லி, வெள்ளெருக்கு விநாயகரை வழிபட்டால், துன்பம் விலகி இன்பம் பெருகும்.

விநாயகர் விரத முறை:தொழிலில் லாபம் வேண்டும் என்று விரதம் இருப்பவர்கள் குயவர் மண்ணால் செய்த மண் பொம்மையை பூஜை அறையில் வைத்து வணங்க வேண்டும்.

கடன் தீர விரதம் இருப்பவர்கள் சிறு தொகையை பூஜையில் வைத்த பிறகு உரிய நபருக்கு கொடுக்க முயற்சித்தால் அந்த ஆண்டிற்குள் படிப்படியாக கடன் அடைந்து விடும்.

கல்வியில் முன்னேற்றம், வேலை கிடைக்க வழிபாடு செய்பவர்கள் வலம்புரி கணபதியை பூஜையில் வைத்து வழிபட்டு மறுநாள் காலையில் அரச மரத்து விநாயகரை சுற்றி வந்து வணங்குதல் வேண்டும்.

திருமணமானவர்கள் விரத நாட்களில் பாயில் படுத்தல் கூடாது. காலையில் எழுந்து குளித்து விட்டு விநாயகரை நினைத்து தீபம் ஏற்றி ஒரு பொழுது விரதம், ஒரு வேளை உணவு உண்டு இருக்க வேண்டும்.

விநாயகர் விரதம் தொடங்குங்கள். 

படித்து பகிர்ந்தது 

இரா இளங்கோவன்

 நெல்லிக்குப்பம். 

ஆட்கொண்டார் என்றால் என்ன?

திருவையாறு ஆட்கொண்டார் 

தஞ்சாவூர் மாவட்டம், திருவையாற்றில் உள்ள புகழ்பெற்ற ஐயாறப்பர் திருக்கோயிலின் தெற்கு கோபுர வாயிலில் அருள்பாலிக்கும் சிறப்புமிக்க சிவ வடிவமாகும். 

இவரை எமபயம் நீக்கி அருள்பவர், காவல் தெய்வம் என்று பக்தர்கள் போற்றுகின்றனர். 

ஆட்கொண்டார் என்றால் என்ன?

“ஆட்கொண்டார்” என்பது பக்தர்களைத் தமது அருளால் ஆட்கொண்டு காப்பவர் என்ற பொருளைத் தருகிறது.

இங்கு ஆட்கொண்டார், எமனைத் தண்டித்து அடக்கிய திருக்கோலத்தில் காட்சியளிக்கிறார். அவரது திருவடிக்குக் கீழே எமன் இருப்பது போன்ற வடிவம், மரண பயத்தை வெல்லும் சிவ அருளின் அடையாளமாக பக்தர்களால் கருதப்படுகிறது. 

---

ஆட்கொண்டார் புராணக் கதை:

ஆட்கொண்டாருடன் தொடர்புடைய முக்கியமான தலபுராணக் கதை சுசரிதன் என்ற அந்தணச் சிறுவனைப் பற்றியது.

சுசரிதனின் பெற்றோர் அவன் சிறுவனாக இருக்கும்போதே இறந்துவிட்டனர். இதனால் மனம் வருந்திய அவன், பல புனிதத் தலங்களுக்குச் செல்லும் யாத்திரையைத் தொடங்கினான்.

அவன் திருப்பழனம் சென்றிருந்தபோது, ஒரு இரவு கனவில் எமதர்மன் தோன்றி, இன்னும் ஐந்து நாட்களில் அவனுக்கு மரணம் ஏற்படும் என்று தெரிவித்ததாக தலபுராணம் கூறுகிறது. இதனால் அச்சமடைந்த சுசரிதன், திருவையாற்றுக்குச் சென்று சிவபெருமானை வழிபட்டால் தன்னை காப்பாற்ற முடியும் என்று நம்பினான். 

திருவையாற்றில் அவன் சிவ தரிசனம் செய்து, பஞ்சாட்சர மந்திரத்தை ஜபித்து வழிபட்டு வந்தான்.

அவனுடைய நிலையை அறிந்த வசிஷ்ட முனிவரும் அவனுக்கு வழிகாட்டினார்.

ஐந்தாம் நாள் எமன் சுசரிதனின் உயிரைப் பெற வந்தபோது, சிவபெருமான் தமது தெற்கு வாயில் காவலராக விளங்கும் ஆட்கொண்டாரை அனுப்பி எமனைத் தண்டித்ததாக தலபுராணம் கூறுகிறது. 

அதன்பின், “எமபயம் தம்மை நாடுவோருக்கு ஏற்படாதபடி காத்தருள வேண்டும்” என்று ஆட்கொண்டாருக்கு சிவபெருமான் அருளியதாக ஐதீகம்.

இதனால் ஆட்கொண்டார் இன்றும் மரண பயம் நீக்கும் மூர்த்தியாக வழிபடப்படுகிறார்.

---

குங்கிலியம் வழிபாட்டின் சிறப்பு:

ஆட்கொண்டார் சன்னதியின் முன்பாக குங்கிலியம் இடும் வழிபாடு மிகவும் பிரசித்தமானதாகக் கூறப்படுகிறது.

குங்கிலியப் புகை எழுப்பி ஆட்கொண்டாரை வழிபடுவது இத்தலத்தின் தனிச்சிறப்புகளில் ஒன்றாகும். விஷ ஜந்துக்கள், தீய சக்திகள் போன்றவற்றின் பயம் நீங்கும் என்ற பக்தி நம்பிக்கை இவ்வழிபாட்டுடன் தொடர்புடையது. 

இதை நம்பிக்கையாகவே பார்க்க வேண்டும்; மருத்துவ அல்லது சட்டரீதியான பிரச்சினைகளுக்கு உரிய நிபுணர் உதவியைத் தவிர்க்கக் கூடாது.

---

எதற்காக ஆட்கொண்டாரை வழிபடுகிறார்கள்?

பக்தி மரபில் ஆட்கொண்டார் வழிபாடு குறிப்பாக:

எமபயம் நீங்க

நீண்ட ஆயுளுக்காக

குடும்பத்தினரின் நலனுக்காக

வாழ்க்கையில் ஏற்படும் அச்சங்கள் நீங்க

தீய சக்திகள் குறித்த அச்சம் நீங்க

மன அமைதி பெற

எனப் பல்வேறு வேண்டுதல்களுடன் செய்யப்படுகிறது.

சில பக்தி மரபுகளில் நீண்டகால நோய்கள் நீங்கவும் ஆட்கொண்டாரை வேண்டுவது வழக்கமாகக் கூறப்படுகிறது; இதை ஆன்மிக நம்பிக்கையாக மட்டுமே எடுத்துக்கொள்ள வேண்டும். 

---

சன்னதி அமைந்துள்ள இடம்:

ஆட்கொண்டார் சன்னதி, ஐயாறப்பர் திருக்கோயிலின் தெற்கு கோபுர வாயிலில் அமைந்துள்ளது.

அங்கு ஆட்கொண்டார் எமனைத் தமது காலின் கீழ் அடக்கிய திருக்கோலத்தில் அருள்பாலிக்கிறார். இவருடன் தொடர்புடைய இந்தச் சன்னதி, திருவையாற்றின் முக்கியமான ஆன்மிக அடையாளங்களில் ஒன்றாக விளங்குகிறது. 

---

காலாஷ்டமி சிறப்பு:

ஆட்கொண்டாரின் புராண நிகழ்வுடன் தொடர்புபடுத்தப்படும் கார்த்திகை மாத காலாஷ்டமி நாளில் சிறப்பு வழிபாடுகள் நடைபெறும் என்று தல மரபுகள் குறிப்பிடுகின்றன.

அந்நாளில்:

காவிரியில் தீர்த்தவாரி

ஆட்கொண்டாருக்கு சிறப்பு அபிஷேகம்

வடைமாலை சாத்துதல்

சிறப்பு பூஜைகள்

உற்சவர் திருவீதி உலா

போன்ற நிகழ்ச்சிகள் நடைபெறுவதாகக் குறிப்பிடப்படுகிறது. 

---

சாந்தி நிகழ்ச்சிகளுடன் தொடர்பு:

ஆட்கொண்டார் எமபயம் நீக்கும் மூர்த்தி என்ற நம்பிக்கையின் காரணமாக, திருவையாற்றில்:

சஷ்டியப்தபூர்த்தி, பீமரதசாந்தி, சதாபிஷேகம் போன்ற ஆயுள் தொடர்பான சாந்தி நிகழ்ச்சிகளை நடத்துவது சிறப்பானதாக பக்தர்கள் கருதுகின்றனர். 

---

திருவையாற்றின் பெரிய சிறப்பு:

ஆட்கொண்டார் சன்னதி அமைந்துள்ள ஐயாறப்பர் திருக்கோயில், காவிரி சார்ந்த திருவையாற்றின் மிக முக்கியமான சைவத் திருத்தலமாகும்.

இத்தலம் தேவாரப் பாடல் பெற்ற தலம். திருவையாறு கோயில் வளாகம் சுமார் 15 ஏக்கர் பரப்பளவில், பல பிரகாரங்களுடன் அமைந்துள்ளதாகக் குறிப்பிடப்படுகிறது. 

மேலும், அப்பர் சுவாமிகளுக்கு கயிலாயக் காட்சி கிடைத்த திருத்தலம் என்ற பெருமையும் திருவையாற்றுக்கு உண்டு. ஆடி அமாவாசை நாளில் அப்பர் கயிலைக் காட்சி விழா சிறப்பாக நடைபெறுகிறது. 

---

சுருக்கமாக:

திருத்தலம்: ஐயாறப்பர் திருக்கோயில், திருவையாறு.

சிறப்பு சன்னதி: ஆட்கொண்டார்.

இடம்: தெற்கு கோபுர வாயில்.

திருக்கோலம்: எமனை காலின் கீழ் அடக்கிய நிலையில்

முக்கிய சிறப்பு: எமபயம் நீக்கும் மூர்த்தி.

சிறப்பு வழிபாடு: குங்கிலியம் இடுதல்.

முக்கிய விழா: கார்த்திகை காலாஷ்டமி தொடர்பான சிறப்பு வழிபாடுகள்.

பக்தி நம்பிக்கை: ஆயுள், அச்சம் மற்றும் எமபயம் நீங்க அருள் புரிவார். 

எமனை வென்று பக்தனை காத்த சிவபெருமானின் அருள் வடிவமே திருவையாறு ஆட்கொண்டார்.

படித்து பகிர்ந்தது 

இரா இளங்கோவன் 

நெல்லிக்குப்பம். 

திருவிடைவாசல் புண்ணியகோடியப்பர் மர்மங்கள் தெரியுமா?

திருவிடைவாசல் புண்ணியகோடியப்பர் கோயிலின் ஆச்சர்ய மர்மங்கள் தெரியுமா?

தேவாரப்பாடல் பெற்ற தலங்கள் 274 என்று தான் அனைவருக்கும் தெரியும். ஆனால் திருவிடைவாய் தலத்திற்காக சம்பந்தர் பாடல்கள் 1917ல் கண்டுபிடிக்கப்பட்டு, தேவாரப்பாடல் பெற்ற தலங்கள் வரிசையில் கடைசியாக சேர்க்கப்பட்டு 275வது தலமானது. இத்தல இறைவன் சுயம்பு மூர்த்தியாக அருள்கிறார். இந்த கோயிலைப் பற்றிதான் நாம் தற்போது பார்க்கவிருக்கிறோம்.

வருடத்தில் இரண்டு மாதங்கள் மட்டும் சரியாக இறைவனின் மீது சூரிய ஒளி படுகிறது. இந்த நிகழ்வு வைகாசி மற்றும் மார்கழி மாதங்களில் நடைபெறுகிறது. இத்தலத்தின் பெருமை குறித்து

பாலசாஸ்தா

இத்தல சாஸ்தா குழந்தை வடிவில் பாலசாஸ்தாவாக அருளுகிறார்.

தட்சிணாமூர்த்தி

இத்தல தட்சிணாமூர்த்தி சிம்மாசன மண்டபத்தில் வீற்றிருக்கிறார்.

முற்றிலும் நீர் சூழ

கோயிலின் மேற்கே காவிரியின் கிளைநதியான வெண்ணாறு, தெற்கே வெள்ளையாறு, வடக்கே பாண்டையாறு, கிழக்கே கடல் சூழ இத்தலம் அமைந்துள்ளது.

மற்றொரு பெருமை

திருஞான சம்பந்தர் காலத்திற்கு முன்பிருந்தே இத்தலம் திருவிடைவாசல் என அழைக்கப்பட்டிருக்கிறது. எனவே தான் சம்பந்தர் தனது பாடலில் 'விடைவாயே' என குறிப்பிட்டு பாடியிருக்கிறார்.

பழமை

இத்தலம் 1000 முதல் 2000 வருடங்களுக்கு பழமையானது என்று பல குறிப்புகளின் மூலம் தெரியவருகிறது.

குலோத்துங்கன்

இக்கோயில் முதலாம் குலோத்துங்க சோழனால் கட்டப்பட்டிருக்கிறது. சோழர்களால் கட்டப்பட்ட கோயில் இது என்பதால் அதிக கட்டடக்கலை முக்கியத்துவம் வாய்ந்தது

பலன்கள்

திருமணத் தடை, குழந்தை பாக்கியம் வேண்டுபவர்கள் இந்த கோயிலுக்கு வந்தால் மிகுந்த பலன் கிடைக்கும் என்கின்றனர்.

சிறப்புக்கள்

இத்தல இறைவன் சுயம்பு மூர்த்தியாக அருள்கிறார். இவர்மீது வைகாசி, மார்கழி மாதங்களில் சூரிய ஒளி படுவது சிறப்பு.

வேறு தெய்வங்கள்

வேறு தெய்வங்கள்

கோயில் பிரகாரத்தில் விநாயகர், தட்சிணாமூர்த்தி, நர்த்தன விநாயகர், லிங்கோத்பவர், பிரம்மா, துர்க்கை, சண்டிகேஸ்வரர், நந்தி கஜலட்சுமி, வள்ளி தெய்வானையுடன் முருகர், பாலசாஸ்தா, நவகிரகங்கள், பைரவர், அய்யனார், சூரிய சந்திரர்கள் ஆகியோர் கோயிலில் உள்ள பிற கடவுளர்கள் ஆவர்.

தங்கள் வேண்டுதல் நிறைவேற பஞ்சமூர்த்திகளுக்கும் அபிசேகம் செய்து வழிபடுகின்றனர்.

எப்படி செல்லலாம்?

திருவாரூர் மாவட்டத்தில் உள்ள குடவாசல் பகுதிக்குட்பட்ட ஒரு சிறிய ஊர் தான் இந்த திருவிடைவாசல். பெரும்பாலும் அதிகம் பேர் அறியாத இடம். இங்குதான் அற்புத புண்ணியகோடியப்பர் கோயில் உள்ளது. கும்பகோணத்திலிருந்து திருவாரூர் செல்லும் வழியில் நாச்சியார்குப்பம் தாண்டியபிறகு வரும் இந்த ஊர். கும்பகோணம், திருவாரூர் போன்ற பகுதிகளிலிருந்து அடிக்கடி பேருந்து வசதிகள் உள்ளன.

ஓம் நமசிவாய 

படித்து பகிர்ந்தது 

இரா இளங்கோவன் 

நெல்லிக்குப்பம்.