வருடத்தின் 365 நாட்களும் சூரிய ஒளி சிவன் மீது விழும் அதிசயம் நிறைந்த ஆலயம்

கோவில்

இறைவனுக்கு முன்னரும் சட்டத்திற்கு முன்னரும் அனைவரும் சமம். 

எந்த கோவிலுக்கும் யார் வேண்டுமானாலும் போகலாம் என்று தான் நாம் பார்த்திருப்போம். அதற்காக வைக்கம் போன்ற இடங்களில் போராட்டம் நடத்தி கூட பார்த்திருப்போம். ஆனால் தமிழ்நாட்டில் ஒரு கோவிலின் இந்த நியதி மீறப்படுகிறது.

உங்களுக்கு மறுபிறவியே இல்லை என்று அந்த ஈசன் உங்கள் தலையில் எழுதியிருந்தால் மட்டுமே இந்த கோவிலுக்குள் உங்களால் அடி எடுத்து வைக்க முடியும் என்று கூறுகிறார்கள்! இல்லை என்றால் உங்களால் நுழைய முடியாதாம். 

வித்தியாசமாக இருக்கிறது தானே?இந்த கோவிலை பற்றி விரிவாக சொல்கிறோம்.

தஞ்சை மாவட்டம் கும்பகோணத்தில் இருந்து திருநாகேஸ்வரம் வழியாக சென்றால் 7 கி மீ தொலைவில் அமைந்துள்ள தேப்பெருமாநல்லூரை அடைவீர்கள். அந்த ஊரில் அமைந்துள்ள ராஜராஜ சோழனால் கட்டப்பட்ட வேதாந்த நாயகி சமேத விஸ்வநாத சுவாமி திருக்கோயில், மறுபிறவி இல்லாத மனிதர்களை கோவிலுக்கு வரவேற்கிறது.

பூமியில் மானிடராய் பிறந்து அனுபவிக்க வேண்டிய இன்ப துன்பங்களை எல்லாம் அனுபவித்து முடித்து, பாவ கணக்கும் புண்ணிய கணக்கும் சரி சமமாகி, கர்ம வினைகள் எதுவும் இல்லாத மானுடர்களுக்கே மறு பிறவி கொடுக்காமல் மோட்சத்தை அளித்து இறைவன் ஆட்கொள்கிறார் என்று புராணங்கள் கூறுகின்றன. 

அப்படி கணக்குகள் தீர்ந்த மக்கள் மட்டுமே மறுபிறவி இல்லாதவர்கள்.

மறுபிறவி இல்லாதவர்கள் மட்டுமே இந்த திருக்கோவிலில் நுழைய முடியும். மற்ற யார் நினைத்தாலும் இந்த ஆலயத்திற்கு செல்ல முடியாத அளவுக்கு அவ்வளவு தடைகள் வரும் என்று கூறுகிறார்கள். உள்ளே நுழைவதற்கு மட்டும் தடைகள் இல்லை, கிளம்பி வரும்போது. பயணமே தடைபட்டு போகும் என்று கூறப்படுகிறது. இதை வைத்தே நம் பாவகணக்குகள் தீர்ந்ததா இன்னும் பிறவிகள் எடுக்க போகிறோமோ என்று தெரிந்துவிடும். 

இதிகாசங்களில் பெரிய ஆளாக சொல்லப்படும் மகாமுனியான அகத்திய முனிவரே இந்த கோயிலுக்குள் செல்ல முடியாமல் திரும்பினாராம்.

அது மட்டும் அல்ல இந்த அக்கோவிலுக்கு இன்னொரு கதையும் இருக்கிறது. 

வருடத்தில் ஒருமுறை நாகப்பாம்பு வில்வ இலைகளை கொண்டு வந்த இத்தல ஈசனின் மீது தூவி பூஜை செய்யுமாம். அது மட்டும் இல்லாமல், பாம்பு தன்னுடைய தோலை உரித்து மாலையாக அணிவித்து ஈசனை வழிபட்டு செல்கிறதாம். அவ்வபோது பாம்பு சட்டைகளை லிங்கத்தின் மீது காண்பதாக பக்தர்களும் பூசாரிகளும் தெரிவிக்கின்றனர்.

கோயிலின் பிரதான தெய்வம் ஸ்ரீ ருத்ராக்ஷேஸ்வரர், நாகவிஸ்வநாதர் என்றும் அழைக்கப்படுகிறார். 

வருடத்தின் 365 நாட்களும் சூரிய ஒளி சிவன் மீது விழும் அதிசயம் நிறைந்த ஆலயம் இது. அம்பாள் ஸ்ரீ வேதாந்தநாயகி பிரதான தெற்கு நோக்கியவாறு வீற்றிருக்கிறாள். பிரதான கோவிலின் உள்ளே சிவலிங்கம் 22,000 ருத்திராட்சங்கள் கொண்ட கவசத்துடன், முழு ருத்திராட்சம் அலங்காரத்தில் காட்சி தருகிறார்.

பிரதோஷ தினத்தன்று இக்கோவிலுக்கு சென்று வழிபடுவது என்பது மிகவும் சிறப்பு வாய்ந்ததாம்.  

மற்ற கோவில்களின் விதிமுறைகளுக்கும், இந்த கோவிலின் விதி முறைக்கும் இடையே பல மாறுதல்கள் இருக்கின்றன. இந்த கோவிலில் எழுந்தருளியிருக்கும் தெய்வங்கள் அனைத்தும் வேறு எங்கும் காணமுடியாத மாறுபட்ட கோலத்தில் காட்சி அளிக்கின்றன.

தெய்வங்கள், கோவில் கட்டுப்பாடு, கோவில் நுழைவுகளில் மட்டும் அல்ல, பிரசாதத்தில் கூட இந்த கோவில் கொஞ்சம் வித்தியாசமானது தான்.  

சிவபெருமானின் 22000 ருத்ராட்சம் நிறைந்த ஆபரணத்திலிருந்து எடுக்கப்படும் ருத்ராக்ஷம் தான் இங்கு வரும் பக்தர்களுக்கு  பிரசாதமாக விற்கப்படுகிறது.

இந்த கோயில் வருடத்தின் எல்லா நாட்களிலும் காலை 8 மணி முதல் 11.30 மணி வரையிலும், மாலை 5 மணி முதல் 7.30 மணி வரையிலும் திறந்திருக்கிறது. 

இந்த கோயிலை அடைய திருநாகேஸ்வரம் சென்று அங்கிருந்தும், கும்பகோணத்திலிருந்தும் கோயிலை அடையலாம்.