Friday, September 5, 2025

அக்னீஸ்வரர் தீயாடியப்பர் திருக்காட்டுப்பள்ளி.

அருள்மிகு அக்னீஸ்வரர் திருக்கோயில், 
திருக்காட்டுப்பள்ளி 613104,                  தஞ்சை மாவட்டம்.    
*மூலவர்:
தீயாடியப்பர்
*அம்பாள்: செளந்தரநாயகி
*தல விருட்சம்:
வன்னி, வில்வம்
*தீர்த்தம்:
சூரிய தீர்த்தம், காவிரி, குடமுருட்டி ஆறு                        
*பாடல் பெற்ற தலம்: திருநாவுக்கரசர், திருஞானசம்பந்தர் இருவரும் தேவாரப் பதிகம் பாடியுள்ளனர்.   

*அக்கினி வழிபட்ட தலமாதலால் இக்கோயிலுக்கு 'அக்னீஸ்வரம்' என்று பெயர்.                    
அக்னி பகவானுக்கு யாகங்களால் உண்ட நெய்யால் வந்த வயிற்று நோயும், யாகத்தில் போடப்படும் பொருட்களை சுட்டெரித்த பாவமும் நீங்க வேண்டி திருக்காட்டுப்பள்ளியில் எழுந்தருளி உள்ள இறைவனை வேண்டியுள்ளார்.
இறைவன் கட்டளைப்படி அக்னி தீர்த்தம் என்ற தீர்த்தக் குளத்தை ஏற்படுத்தி, அந்த தீர்த்த நீரால் இறைவனை நீராட்டி வழிபட்டு தனது வயிற்று நோயும், பாவங்களும் நீங்க பெற்றுள்ளார். மேலும் அக்னி பகவான் இறைவனிடம் இத்திருத்தலத்துக்கு வருகை புரிந்து என்னால் தோற்றுவிக்கப்பட்ட அக்னி தீர்த்தத்தில் நீராடி சிவனை வழிபட்டால் அவர்களது பாவங்களையும், வயிற்று நோயையும் போக்கி அவர்களுக்கு சிறந்த வாழ்வை அளிக்க வேண்டும் என வேண்டிக் கொண்டார். இறைவனும் அக்னி தேவனின் வேண்டுகோளை ஏற்று வேண்டிய வரங்களை அளித்தார்.             
அன்று முதல் திருக்காட்டுப்பள்ளி சிவன் கோவில் அக்னீஸ்வரம் என்ற பெயர் பெற்றது. வயிற்று நோய் உள்ளவர்கள் இத்தல இறைவனை முறையாக வணங்கினால் நோயில் இருந்து விடுபடலாம் என்பது பக்தா்களின் நம்பிக்கை.            

*மூலவர் அக்கினீசுவரர், அழலாடியப்பர், தீயாடியப்பர், வன்னிவனநாதர், திருக்காட்டுப்பள்ளி உடையார் என்றும் அழைக்கப்படுகிறாா். 

 *மூலவர் அக்னீசுவரர் கருவறை, தரை மட்டத்திலிருந்து கீழே ஒரு தாழ்வான  பகுதியில் இருக்கிறது.      நான்கு  படிகள் இறங்கி தரிசிக்கவேண்டும். கருவறையை சுற்றி வலம் வரலாம்.  

*பிரம்மாவுக்கு ஏற்பட்ட சாபம் நீங்கிய தலம் இது. அக்கினீசுவரர் சந்நிதிக்கு இடது பக்கத்தில் பிரம்மாவுக்குத் தனி சந்நிதி அமைக்கப்பட்டிருக்கிறது. 

*மூலவரைச் சுற்றிவரும் பிராகாரத்தில் கோஷ்ட மூர்த்தமாக யோக தட்சிணாமூர்த்தி விளங்குகின்றார். சிவபெருமான் கயிலாயத்தில் அம்பிகைக்கு சிவாகமங்களை உபதேசித்த போது இருந்த அதே கோலத்தில், இங்கே யோக தட்சிணாமூர்த்தியாக எழுந்து அருளி இருப்பது தனிச்சிறப்பாகும்.   இவர் குரங்காசனத்தில் அமர்ந்து, இரண்டு திருக்கரங்களுடன் கழுத்தில் மகரகண்டி, ருத்ராட்சம் அணிந்து, திருச்சடையில் சூரிய, சந்திரன் அணிந்து, தன் கையில் சிவாகம நூல் ஏந்தி யோக குருவாகக் காட்சி தருவது சிறப்பு.  

*இவரை வாரந்தோறும் வியாழக்கிழமையில் ஐந்து  நெய்தீபம் ஏற்றி முல்லைப் பூவால் வழிபட்டால், திருமணம், கல்வி, செல்வம் யோகத்தை அடையலாம். வழக்குகளில் நம் பக்கம் நியாயம் இருந்தால், எல்லா தடைகளும் நீங்கி வெற்றி பெறலாம். 

*இரண்டாம் பிராகாரத்திலும் ஒரு தட்சிணாமூர்த்தி கோஷ்டத்தில் அருள்புரிகிறார்.   இரண்டு குரு பகவான்கள் எழுந்தருளி இருப்பதும் இத்தலத்தின் தனிச்சிறப்பாகும்.

*அம்பாள் சௌந்தரநாயகி என்றும் அழகமர்மங்கை என்றும் அழைக்கப்படுகிறார். அம்பாள் கொடிமரத்தருகே தனி சந்நிதியில் தெற்கு நோக்கி அருள்புரிகிறார். 

*ரோமரிஷி சித்தர்:
 சித்தர்களில் ஒருவரான ரோமரிஷி என்பவர் திருக்காட்டுப்பள்ளி அக்னீஸ்வரரை வழிபட்டு சித்தி அடைந்துள்ளார். கோவிலின் மூன்றாம் பிரகாரத்தில் ரோமரிஷி சித்தர் இறைவனை மலர் கொண்டு பூஜை செய்வது போன்ற விக்ரகம் அமைந்துள்ளது.  

*இதைப்போல பிரம்மதேவன் மகா சிவராத்திரி தினத்தன்று மூன்றாம் காலத்தில் எழுந்தருளி அக்னீஸ்வரரை வழிபட்டு இறையருள் பெற்றார் என்றும் கூறப்படுகிறது.

*இந்த கோயில் தீர்த்தமாக தற்போது திருக்காட்டுப்பள்ளி பஸ் நிலையம் அருகில் மிகச் சிறிய அளவில் ஒரு கிணறாக அக்னி தீர்த்தம் அமைந்துள்ளது. 
அக்னிதீர்த்தத்தில் கார்த்திகை மாத ஞாயிற்றுக்கிழமைகள், மாசி மாத மக நட்சத்திரம், பங்குனி மாத உத்திராட நட்சத்திரம், வைகாசி மாத பவுர்ணமி திதி ஆகிய நாட்களில் நீராடி அகனீஸ்வரரை வழிபடுபவர்கள் இந்த பிறப்பில் எல்லா செல்வங்களும், மறு பிறப்பில் நற்பிறப்பும் பெற்று குற்றம் எல்லாம் தீர்ந்து பெருமையுடன் வாழ்வார்கள் என்பது அக்னி தீர்த்த சிறப்பாக குறிப்பிடப்படுகிறது.

*இக்கோயிலிலுள்ள நவக்கிரக சந்நிதியில், எல்லாக் கிரகங்களும் சூரியனைப் பார்த்தவாறே அமைந்துள்ளன.

*உறையூரை தலைநகராகக் கொண்டு ஆண்டு வந்த மன்னன்,  நந்தவனத்தில் இறைவனது பூசைக்காக பூத்து வந்த செவ்வந்தி மலர்களைப் பணியாளன் பறித்து வந்து தர அவற்றைத் தன் இரு மனைவியருக்கும் தந்தான். 
மூத்த மனைவி அம்மலர்களைத் தான் சூடிக்கொள்ளாமல் சிவபெருமானுக்கு அணிவித்து வந்தாள், இளைய மனைவி தான் சூட்டி மகிழ்ந்தாள். இதனால் இளையவள் இருந்த உறையூர் மண் மாரியால் (மழை) அழிந்தது. மூத்தவள் இருந்த திருக்காட்டுப்பள்ளி மட்டும் அழியாமல் பிழைத்தது என்று சொல்லப் பட்டுவருகிறது.

*முதல் ஆதித்திய சோழனின் காலத் திருப்பணியைப் பெற்ற கோயில். 

*பள்ளி என்ற சொல் இவ்வூரில் ஒரு காலத்தில் சமணர்கள் வாழ்ந்திருந்ததற்கான சான்று என்று கருதப்படுகிறது. அதற்கேற்ப 24-ஆவது தீர்த்தங்கரரின் சிலை இத்தலத்தில் கிடைத்துள்ளது.

*இத்தலம் மேலைத்திருக்காட்டுப்பள்ளி என்று வழங்குகிறது. 
(காவிரியின் வடகரையில் உள்ளது கீழைத் திருக்காட்டுப்பள்ளி எனப்படும் தலம். இது திருவெண்காட்டிற்கு அருகில் உள்ளது.)

*திருச்சி, தஞ்சை, திருக்கண்டியூர், திருவையாறு, கல்லணை முதலிய இடங்களிலிருந்து இத்தலத்திற்கு பேருந்துகள் உள்ளன. திருவையாறு - கல்லணை சாலையில் இத்திருக்காட்டுப்பள்ளி உள்ளது. தஞ்சை பழைய பஸ் நிலையத்திலிருந்து  பஸ் மூலம் திருக்காட்டுப்பள்ளிக்கு சென்று பஸ் நிலையம் அருகில் உள்ள அக்னீஸ்வரர் கோயிலை அடையலாம்.

ஓம் நமசிவாய 
படித்து பகிர்ந்தது
 இரா இளங்கோவன் 
நெல்லிக்குப்பம். 

ஒரே கோவிலில் நான்கு திவ்ய தேசங்கள்

*ஒரே கோவிலில் நான்கு திவ்ய தேசங்கள் எந்த கோவிலில்?*
பன்னிரு ஆழ்வார்களால் மங்களாசாசனம் செய்யப்பட்ட வைணவத் தலங்கள் திவ்ய தேசங்கள் என அழைக்கப் படுகின்றன. இந்தியாவின் பல பகுதிகளிலும் திவ்ய தேசங்கள் அமைந்துள்ளன. காஞ்சிபுரத்தில் ஒரே கோவிலில் நான்கு திவ்ய தேசங்கள் அமைந்துள்ளது சிறப்பு. அது எந்த கோவில் என்பதையும் அதில் அமைந்துள்ள திவ்ய தேசங்களைப் பற்றியும் நாம் இந்த பதிவில் தெரிந்து கொள்ளலாம்.

காஞ்சிபுரம் பேருந்து நிலையத்திற்கு அருகில் அமைந்துள்ள கோவில் அருள்மிகு ஆரணவல்லித் தாயார் சமேத உலகளந்த பெருமாள் திருக்கோவில். இக்கோவிலில் திருஊரகம், திருகாரகம், திருநீரகம் மற்றும் திருகார்வானம் என்ற நான்கு திவ்ய தேசங்கள் அமைந்துள்ளன.

மூலவர் ஸ்ரீஉலகளந்த பெருமாள் திரிவிக்ரமனாய் நின்ற திருக்கோலத்தில் புஷ்பகோடி விமானத்தின் கீழ் சேவை சாதிக்கிறார். இத்தலத்தில் பெருமாள் மேற்கே திருமுக மண்டலத்துடன் திரிவிக்ரம அவதார வடிவத்தில் நின்ற திருக்கோலத்தில் தோற்றமளிக்கிறார். தனது இடது கரத்தினை நீட்டி அதில் இரண்டு விரல்களைக் காட்டி தனது இரண்டு அடிகளால் மண்ணையும் விண்ணையும் அளந்து முடித்ததை உணர்த்தி வலது கரத்தில் மீதம் உள்ள ஓரடிக்கு இடம் எங்கே என்று கேட்பது போல ஒரு விரலைக் காட்டியும் மகாபலியின் திருமுடி மீது வலது திருவடியைச் சாத்தியும் இடது திருவடியை ஆகாயத்திற்கும் பூமிக்குமாய் அளந்து விட்டது போல உயர்த்தியும் பெருமாள் கம்பீரமாக உலகளந்த திருக்கோலத்தில் சேவை சாதிக்கிறார்.

பகிரபடும் பகிர்வுகள் பிறர் அறிந்துக் கொள்வதற்காக தவிர பிறர் பிரதி உரிமையை மீறும் எண்ணம் இல்லை..அசல் பதிவேற்றியவருக்கு நன்றி.

ஸ்ரீ ஆரணவல்லித் தாயார் (மகாலஷ்மி) ஒரு தனி சன்னிதியில் எழுந்தருளியுள்ளார். தாயாரை பிரதி வெள்ளிக்கிழமைகளில் அர்ச்சனை செய்து சேவித்தால் சகல சௌபாக்கியங்களையும் அருளுவார். இத்தலத்தில் ஸ்ரீஆண்டாள், ஆழ்வார் மற்றும் ஆசாரியார்கள், விஷ்வக்சேனர், மணவாளமாமுனிகள், கருடன் முதலான சன்னிதிகள் அமைந்துள்ளன. திருக்கோவில் இராஜகோபுரத்திற்கு வெளியில் எதிரில் சதுர்புஜ ஆஞ்சநேயர் சன்னிதி அமைந்துள்ளது. இங்கு ஆஞ்சநேயர் நான்கு திருக்கரங்களுடன் சேவை சாதிக்கிறார்.

இனி இக்கோவிலில் அமைந்துள்ள நான்கு திவ்ய தேசங்களைப் பற்றிப் பார்ப்போம்.

ஸ்ரீ ஊரகத்தான் : பெருமாள் இச்சன்னிதியில் ஆதிசேஷன் ரூபமாக சேவை சாதிக்கிறார். தெற்கே திருமுக மண்டலம்.

ஸ்ரீ காரகத்துப் பெருமாள் : பெருமாள் ஆதிசேஷனில் வீற்றிருக்கும் திருக்கோலம். வடக்கே திருமுக மண்டலம்.

ஸ்ரீ நீரகத்துப் பெருமாள் : இங்கு பெருமாள் நின்ற திருக்கோலம். தெற்கு திருமுகமண்டலம்.

ஸ்ரீ கார்வானப் பெருமாள் : பெருமாள் ஸ்ரீதேவி பூதேவியருடன் நின்ற திருக்கோலம். வடக்கே திருமுகமண்டலம்.

இத்தலத்தில் உள்ள நான்கு திவ்ய தேசங்களையும் திருமங்கையாழ்வார் ஒரே பாசுரத்தில் மங்களாசாசனம் செய்துள்ளனர்.

நீரகத்தாய் நெடுவனரயினுச்சி மேலாய்

நிலாத் திங்கள் துண்டத்தாய் நிறைந்த கச்சி

ஊரகத்தாய் ஒண்துறைநீர் வெஃகாவுள்ளாய்

உள்ளுவார் உள்ளத்தாய் ! உலகமேத்தும்

காரகத்தாய் கார்வானத்துள்ளாய் கள்வா

காமருபூங் காவிரியின் தென்பால் மன்னு

பேரகத்தாய் பேராதென் னெஞ்சினுள்ளாய்

பெருமான் உன் திருவடியே பேணினேனே.

- திருமங்கையாழ்வார்

கச்சி ஊரகம் என்று அழைக்கப்படும் இத்தலத்தின் புஷ்கரணி வாமன புஷ்கரணி என அழைக்கப்படுகிறது. இத்தலத்தில் பாஞ்சராத்ர முறைப்படி பூஜைகள் நடைபெற்று வருகின்றன.

திருமணத்தடைகள் நீங்க, புத்திர பாக்கியம் கிடைக்க, ராகு கேது தோஷங்கள் விலக திருஊரகத்தானுக்கு வெள்ளி மற்றும் ஞாயிறுகிழமைகளில் சிறப்பு திருமஞ்சனம் மற்றும் பால்பாயாசம் நைவேத்யமும் செய்து வழிபடும் பிரார்த்தனை ஸ்தலமாகும்.

உலகளந்த பெருமாள் திருக்கோவிலில் வைகாசியில் வசந்த உற்சவம், ஆவணியில் திருபவித்ரோத்ஸவம், திருஅவதார உற்சவம் (ஓணம் பண்டிகை), புரட்டாசியில் நவராத்திரி உற்சவம், கார்த்திகையில் திருக்கார்த்திகை உற்சவம், மார்கழியில் வைகுண்ட ஏகாதசி மற்றும் அத்யாயன உற்சவம், தை மாதத்தில் பத்து தினங்கள் பிரம்மோற்சவப் பெருவிழா, பங்குனியில் பங்குனி உத்திரம் திருக்கல்யாண மஹோத்ஸவம் முதலான உற்சவங்கள் வெகு விமரிசையாகக் கொண்டாடப்படுகின்றன.

காலை ஆறு மணி முதல் பகல் பனிரெண்டு மணிவரையிலும் மாலை நான்கு மணி முதல் இரவு எட்டு மணி வரையிலும் இத்தலத்திற்குச் சென்று பக்தர்கள் வழிபடலாம்.

காஞ்சிபுரம் பேருந்து நிலையத்திலிருந்து பதினைந்து நிமிட நடை தூரத்தில் இத்தலம் அமைந்துள்ளது. இத்தலத்திற்கு மிக அருகிலேயே காஞ்சி காமாட்சி அம்பாள் திருத்தலம் அமைந்துள்ளது.

ஓம் நமசிவாய
 படித்து பகிர்ந்தது
 இரா இளங்கோவன் 
நெல்லிக்குப்பம். 

Thursday, September 4, 2025

ஓணம் திருவிழா திருவோணம் திருநாள்

திருவோணம் திருநாள்
எலியாக பிறந்து சக்கரவர்த்தியாக உயர்ந்த மகாபலி சக்கரவர்த்தியின் கதை...

உலகையே உங்கள் பாதங்களால் அளக்கும் பரந்தாமனே! உங்களுக்கு என்னையே தருகிறேன். 

மூன்றாவது அடியை என் தலையில் வைத்து அளந்துகொள்ளுங்கள் என்று சொல்லி சிரம் தாழ்த்தி நின்றார் மகாபலி. 

அவரது தலையில் தன் பாதத்தை வைத்து அழுத்தி பாதாள லோகத்துக்கு அனுப்பினார் மகாவிஷ்ணு. 

மகாபலியின் தியாகம் அந்த பரந்தாமனை மகிழ்ச்சியில் ஆழ்த்தியது. ஆண்டுதோறும் ஒருநாள் மக்களை காண மகாபலிக்கு அனுமதி அளித்தார். 
ஓணம் பண்டிகை நாளில் மக்கள் ஆடிப்பாடி மகிழ்ச்சியோடு தங்களை காண வரும் சக்கரவர்த்தி மகாபலியை வரவேற்கின்றனர்!

ஓணம் திருவிழா அறுவடைத் திருவிழாவாகவும் கேரளாவில் கொண்டாடப்படுகிறது. 

உலகம் முழுவதிலும் உள்ள மலையாள மொழி பேசும் மக்களால் உற்சாகமாகக் கொண்டாடப்படும் திருவிழா ஓணம் பண்டிகை.

எலி செய்த காரியம்:
---------------------------------------------------------------------------------
சிவன் கோயில் விளக்கு அணையும் நிலையில் இருந்தது அப்போது, கோயிலுக்குள் புகுந்த எலி ஒன்று எதேச்சையாக விளக்கில் ஏறியது. அதன் வால், திரி மீது பட்டது. 

திரி தூண்டப்பட்டு விளக்கு பிரகாசமானது. தன்னையறியாமல் எலி செய்த அந்த காரியம் அதற்கு புண்ணியத்தை தந்தது. 

அடுத்த ஜென்மத்தில் எலிக்கு சக்கரவர்த்தி யோகத்தை தந்தருளினார் சிவபெருமான் அந்த எலிதான் அடுத்த பிறவியில் மகாபலி சக்கரவர்த்தியாக அவதரித்தது. 

தெரிந்தோ, தெரியாமலோ புண்ணிய காரியம் செய்தாலும் பலன் உண்டு என்பதற்கு உதாரணம் இந்த புராண நிகழ்வு.

வாரி வழங்கும் வள்ளல் மகாபலி:
---------------------------------------------------------------------------------
மலையாள தேசம்தான் மகாபலி சக்கரவர்த்தியின் ஆளுமைக்கு உட்பட்ட பகுதியாக இருந்தது. 

முப்பத்து முக்கோடி தேவர்களும் அதிசயப்படும்படியும், பொறாமை கொள்ளும் வகையிலும் நல்லாட்சி செய்தார் மகாபலி மகாபலியின் புகழ் பலதிசை எங்கும் பரவியது. 

தன்னை நாடி வந்தவர்களுக்கு எல்லாம் கேட்டதை வாரி வாரி வழங்கியும் பொற்கால ஆட்சி நடத்தி வந்தார். 

அவரை அசுர குரு சுக்கிராச்சாரியார் வழிநடத்தி வந்தார் தேவர்கள் பொறாமைப்பட்டு தேவேந்திரனிடம் முறையிட்டனர் அவர் மகா விஷ்ணுவிடம் கூறினார்.

வாமன அவதாரம் எடுத்த மகாவிஷ்ணு:
---------------------------------------------------------------------------------
மகாபலியின் புகழுடன் பல யுகங்களுக்கும் நிலைத்திருக்குமாறு செய்ய முடிவு செய்தார். 

குள்ளமான வாமனனாக அவதாரம் எடுத்து பூலோகம் வந்தார் மகாவிஷ்ணு. மகாபலியிடம் சென்று தானம் கேட்டார் வாமனன். 

விஷ்ணுதான் வாமன அவதாரம் எடுத்து வருகிறார் என்பதை ஞான திருஷ்டியில் தெரிந்துகொண்டார் சுக்கிராச் சாரியார். 

வாமனனாய் வந்திருப்பது சாட்சாத் மகாவிஷ்ணு, அவசரப்பட்டு எந்த வாக்கும் கொடுத்துவிடாதே. 

அது உன் ஆட்சி, அதிகாரம் மட்டுமின்றி ஆயுளுக்கும் ஆபத்தாய் முடியும் என்று மகாபலியை எச்சரித்தார்! 

பகவானுக்கு தானம்:
---------------------------------------------------------------------------------
மகாபலி மகிழ்ச்சியடைந்தார் என்னுடைய நல்லாட்சியை அகில உலகமும் பாராட்டுகிறது. 

இதைக் கேள்விப்பட்டு பகவானே இறங்கி வருவது நான் செய்த பாக்கியம் எல்லோரும் கடவுளிடம்தான் கேட்பார்கள். 

அந்த கடவுளே இறங்கிவந்து என்னிடம் கேட்கப் போகிறார் என்றால், அவருக்கு கொடுப்பதைவிட வேறு என்ன புண்ணியம் இருக்கப் போகிறது என்று மகிழ்ச்சியுடன் தயாரானார் மகாபலி. 

மகாபலியிடம் வந்த வாமனன் தனக்கு மூன்றடி நிலம் தேவைப்படுவதாக கூறினார்.

சுக்கிரன் செய்த செயல்:
---------------------------------------------------------------------------------
குள்ளமான உருவத்துடன் வந்த வாமனனை மகாபலி விழுந்து வணங்கினார் மூன்றடி நிலம்தானே.. தாராளமாக எடுத்துக் கொள்ளுங்கள் என்றார். 

நிலம் தருவதாக தாரை வார்த்துக் கொடு என்றார் வாமனன். இடையே புகுந்தார் சுக்கிராச்சாரியார் தடுத்தார். 

மகாபலி கேட்கவில்லை தாரை வார்ப்பதற்காக கமண்டல நீரை சாய்க்கத் தொடங்கினார் வண்டாக மாறி கமண்டலத்தின் துளையை அடைத்துக் கொண்டார் சுக்கிரன்.

மகாபலி கமண்டலத்தை எவ்வளவு சாய்த்தும் தண்ணீர் வரவில்லை உடனே வாமனன் தனது கையில் இருந்த தர்ப்பையை எடுத்து கமண்டல துளையில் குத்தினார். 

வண்டாக இருந்த சுக்கிராச்சாரியாரின் கண்ணில் குத்தியதால் பார்வையை இழந்தார். 

கமண்டலத்தில் இருந்து நீர் வெளியேற, அதை தன் கையில் பிடித்து மூன்றடி நிலத்தை தாரை வார்த்துக் கொடுத்தார் மகாபலி.

தலையை கொடுத்த வாமனன்:
---------------------------------------------------------------------------------
குள்ள வாமனனாக இருந்த மகாவிஷ்ணு, ஓங்கி உலகளந்த உத்தமனாக விண்ணுக்கும், மண்ணுக்குமாக உயர்ந்து நின்றார். 

ஒரு பாதத்தை பூமியிலும் இன்னொரு பாதத்தை ஆகாயத்திலும் வைத்தார். ‘மூன்றடி கொடுப்பதாக சொன்னாய். 

இரண்டு அடி அளந்துவிட்டேன். மூன்றாவது அடிக்கு இடமில்லையே என்று வாமனன் கேட்க, இதோ எடுத்துக்கொள்ளுங்கள் என்று தலைகுனிந்தார் மகாபலி. 

உடனே அவரது தலையில் பாதத்தை வைத்து அழுத்தி பாதாள லோகத்திற்கு அனுப்பினார் வாமனன் கொடை வள்ளலாக திகழும் மகாபலியின் புகழ் என்றென்றும் நிலைத்திருக்கவும் அருள் செய்தார்.

மகிழ்ச்சியோடு கொண்டாடும் பண்டிகை:
---------------------------------------------------------------------------------
மகாவிஷ்ணுவிடம் ஒரு வேண்டுகோள் வைத்தார் மகாபலி என் நாட்டு மக்களை நான் பிரிந்து செல்வது வருத்தமாக உள்ளது. ஆண்டு தோறும் ஒருநாளில் அவர்களை நான் சந்திக்க வரம் அருள வேண்டும் என வேண்டினார். 

அவ்வாறே நடக்க அருள் செய்தார் மகாவிஷ்ணு. தன் நாட்டு மக்கள் வளமாக, சந்தோஷமாக இருக்கிறார்களா என்று பார்ப்பதற்காகவே ஓணம் திருநாளில் மகாபலி சக்கரவர்த்தி இந்த பூவுலகுக்கு வருவதாக ஐதீகம். 

நம் வீட்டிற்கு வரும் விருந்தினரை வரவேற்க நாம் தயாராவது போல மகாபலியை வரவேற்கும் விதமாக வண்ண மலர்களால் அத்தப்பூ கோலமிட்டு தோரணங்கள் கட்டி அழகுபடுத்துகிறார்கள். 

விருந்துகளை தயார் செய்து உறவினர்களுடன் சாப்பிட்டு மகிழ்கின்றனர். 

திருவோணம்:
---------------------------------------------------------------------------------
அஸ்வினி தொடங்கி ரேவதி வரை 27 நட்சத்திரங்கள் இருந்தாலும் இரு நட்சத்திரங்களுக்குத்தான் 'திரு' என்ற அடைமொழி உண்டு. 

ஒன்று சிவபெருமானுக்குரிய திருவாதிரை நட்சத்திரம். மார்கழியில் இந்த நட்சத்திர நாளில் ஆருத்ரா தரிசனம் நடைபெறும். இன்னொன்று பெருமாளுக்குரிய திருவோணம். 

ஆவணி மாதத்தில் வரும் திருவோணம் நட்சத்திரம்தான் கேரள மக்களால் ஓணம் பண்டிகையாக கொண்டாடப்படுகிறது.

பெருமாள் தரிசனம்:
---------------------------------------------------------------------------------
ஹஸ்தம், சித்திரை, சுவாதி, விசாகம், அனுஷம், கேட்டை, மூலம், பூராடம், உத்திராடம், திருவோணம் ஆகிய 10 நட்சத்திரங்கள் வரும் 10 நாட்களும் ஓணம் பண்டிகை விமரிசையாக கொண்டாடப்படுகிறது. 

திருவோணம் திருநாள் வாமன அவதார தினமாகவும் கொண்டாடப்படுகிறது மகாவிஷ்ணுவின் பத்து அவதாரங்களில் வாமன அவதாரம் ஐந்தாவது அவதாரமாகும். 

பெருமாளின் நட்சத்திரம் திருவோணம். இந்த நாளில் பெருமாள் கோயிலுக்கு சென்று வழிபட்டால் தடைகள், இடையூறுகள் நீங்கி சுபயோக வாழ்வு கிடைக்கும். 

திருவோண நட்சத்திரத்தில் பிறந்தவர்கள், சந்திர திசை நடப்பவர்கள் திருவோணம் நட்சத்திர நாளில் பெருமாள் கோவிலுக்கு சென்று வணங்கலாம்.
ஓம் நமசிவாய 
படித்து பகிர்ந்தது 
இரா இளங்கோவன் 
நெல்லிக்குப்பம். 

Tuesday, September 2, 2025

தஞ்சை ஈச்சங்குடி காசிக்கு நிகரான வைரவன் கோயில்

*பைரவர் ஆலயங்கள்*

*காசிக்கு நிகரான*
*வைரவன் கோயில்* *காலபைரவர் தலம்*!
தஞ்சாவூர் மாவட்டம், திருவையாறு அருகே கும்பகோணம் சாலையில் 5 கி.மீ. தொலைவில் வைரவன்கோயிலில் அமைந்துள்ள காலபைரவர் கோவில், காசி காலபைரவருக்கு இணையான தலமாகப் போற்றப்படுகின்றது. 

இத்தலத்தில் காலபைரவர் எழுந்தருளி இருப்பதின் பின்னணியில் ஒரு புராண வரலாறு உள்ளது.

தென் கயிலாயம் என்று அழைக்கப்படுவது திருவையாறு. 

இங்கிருந்து சுவாமி மலைக்கு சிவபெருமான் புறப்பட்டார்.

‘ஓம்’ என்னும் பிரணவத்தின் உட்கருத்தை உபதேசமாக பெறுவதற்காகத் தான், சிவபெருமான் இந்தப் பயணத்தை மேற்கொண்டார். 

அவரோடு மற்ற தெய்வங்களும் புறப்பட்டார்கள். 

வழியில் வைரவன் கோவில் என்னும் இத்தலத்திற்கு வந்த போது, பைரவரிடம் அங்கேயே தங்கியிருந்து அருள்புரியும் படி சிவபெருமான் கட்டளையிட்டார். 

அதன்படி பைரவர், வைரவன் கோவில் தலத்தில் காவிரி நதியின் வடகரையில் தெற்கு நோக்கி அமர்ந்தார். 

பழமையான இந்த ஆலயத்தின் வலதுபுறம் ஒரு வாய்க்கால் உத்திரவாகினியாக ஓடுகிறது. 

பைரவர் நோக்கிய தெற்கு முகத்தில் மயானம் உள்ளது. 

இது காசிக்கு சமமான பெருமையைப் பெற்ற இடமாகும்.

காசியில் உள்ள காலபைரவரின் அத்தனை அம்சங்களையும் இவரும் கொண்டிருக்கிறார். 

இங்கு பைரவரை பிரதிஷ்டை செய்த ஈசன் தங்கிய இடம் ஈசன் குடியாகி, அதுவே ஈச்சங்குடியானது. 

தேவர்கள் நின்று வழிபட்ட இடம் தேவன்குடியானது. 

கணபதி பூஜித்த இடம் கணபதி அக்ரஹாரம் ஆனது. 

தேவி உமையாள் புரத்திலும், நந்தி மதகிலும், கங்கை கங்காபுரத்திலும் நின்று பைரவரை வழிபட்டார்கள் என்கிறது தலபுராணம்.

ஆலய அமைப்பு:

முன் முகப்பைத் தாண்டியதும் விசாலமான மகா மண்டபம் உள்ளது. 

நடுவே நந்தியம்பெருமான் வீற்றிருக்கிறார். 

அடுத்துள்ள அர்த்த மண்டபத்தை அடுத்து கருவறை உள்ளது. 

காசியில் உள்ள கால பைரவரின் அத்தனை சக்திகளையும் உள்ளடக்கியவராக இங்குள்ள பைரவர் அருள்கிறார். 

இத்தனை பெருமைகள் கொண்ட இத்தலத்தில் ஒவ்வொரு தேய்பிறை அஷ்டமி நாளிலும் நடைபெறும் பைரவ ஆராதனைகள் விசேஷமானவை. 

சிவபெருமானால் ஸ்தாபிதம் செய்யப்பட்ட இத்தல கால பைரவருக்கு, ஒவ்வொரு மாத தேய்பிறை அஷ்டமியிலும் அர்த்த ஜாமத்தில் உலக நலன் கருதி சுவர்ண ஆகர்ஷண பைரவ மூலமந்திரம் ஜபித்து சிறப்பு ஹோமம் நடைபெறுகிறது. 

அத்துடன் அன்று 
108 வலம்புரி சங்காபிஷேகமும் கலசாபிஷேகமும் நடக்கிறது. 

இந்த ஹோமத்தில் 
கலந்து கொண்டு அர்த்த ஜாமத்தில் காலபைரவரை வழிபட அஷ்டலட்சுமிகளின் ஆசியும், கால பைரவரின் வரங்களும் ஒருங்கே கிடைக்கும் என்கின்றனர் பக்தர்கள்.

இரவில் 7 மணிக்குத் தொடங்கி நள்ளிரவு வரை நடைபெறும் இந்த பூஜையில் கலந்து கொண்டால் வேண்டியவை யாவும் நிறைவேறும்; தடைகள் யாவும் தகரும் என்பது நம்பிக்கை.

மேலும் அஷ்டமி நாளில் பைரவரை சிவப்பு நிற அரளியால் வழிபட்டால் நல்ல மக்கள் செல்வங்களைப் பெறலாம். 

மேலும், அஷ்டமி திதி, திருவாதிரை நட்சத்திரம், ஞாயிறு, வியாழக்கிழமை நாள்களில் உச்சிக்காலத்தில் வணங்குவது நல்ல பலனைத் தரும். 

ஞாயிறு, செவ்வாய், வெள்ளி ஆகிய நாள்களில் ராகு காலத்தில் வணங்குவது மிகவும் சிறந்த பலனைத்தருகிறது. 

இந்தத் தலத்தில் நவகிரகங்களையும் தன் நெஞ்சுப் பகுதியில் தாங்கி இருக்கும் ஶ்ரீகாலபைரவரை பூஜிப்பது நவகிரக தோஷங்களின் நிவர்த்திக்காக தனித்தனியே நவகிரகங்களை பூஜிப்பதற்கு நிகரானது. 

இங்கு ஶ்ரீகாலபைரவரை பூஜை செய்து வணங்கினால், நவகிரகங்களின் தோஷங்கள் நிவர்த்தி செய்யப்படும்.

ராகுகால நேரத்தில் பைரவருக்கு நடைபெறும் அபிஷேக ஆராதனைகளில் கலந்து கொண்டு, அவரை வணங்கினால் பல நன்மைகள் கிடைக்கும். 

வர வேண்டிய பணம் வந்து சேரும். தர வேண்டிய பணத்தை திருப்பித் தர வேண்டிய சூழ்நிலை உருவாகும். 

சனியின் தாக்கம் தீரும். கடுமையான கர்மவினைகள் தீர்ந்து விடும். 

திருமண தடைகள் விலகும். 

புத்திரபாக்கியம் கிட்டும். பைரவரை பஞ்ச தீபம் ஏற்றி வழிபட்டால் காலத்தினால் தீர்க்க முடியாத தொல்லைகள் தீரும்.

பஞ்சதீபம் என்பது இலுப்பை எண்ணெய், விளக்கெண்ணெய், நல்லெண்ணெய், பசு- நெய் ஆகியவை ஆகும். இவற்றை தனித்தனி தீபமாக ஏற்ற வேண்டும். அகல் விளக்கில் ஏற்றலாம். 

ஒன்றிலிருந்து ஒன்றை ஏற்றாமல் தனித்தனி தீபமாக ஏற்றி வழிபட்டால் எண்ணிய காரியங்கள் நிறைவேறும். 

இந்த ஆலயம் காலை 11 மணி முதல் 12 மணி வரையிலும், ஞாயிறு மட்டும் மாலை 4 மணி முதல் 6 மணி வரையிலும் திறந்திருக்கும்.

ஆலய அமைவிடம் 

தஞ்சாவூர் மாவட்டம் திருவையாறு- கும்பகோணம் சாலையில் திருவையாறில் இருந்து 
5 கி.மீ. தொலைவில் உள்ளது வைரவன் கோவில். 

இந்த சிற்றூரில் சாலை ஓரத்திலேயே ஆலயம் இருக்கிறது. 


திருமால்பூர் மணிகண்டீசுவரர்

*திருமால்பூர் மணிகண்டீசுவரர் திருக்கோவில்*
*வேறு எங்குமே காண இயலாத ....ஈசனை திருமால் வணங்கி வழிபட்டு நிற்கும் அபூர்வ காட்சி*

*பெருமாளின் கருட சேவை நடைபெறும் ஒரே சிவத்தலம் *

காஞ்சீபுரத்திலிருந்து 15 கி.மீ தொலைவில் உள்ள தேவாரத்தலம் திருமால்பூர். இறைவன் திருநாமம் மணிகண்டீசுவரர். இறைவியின் திருநாமம் அஞ்சனாட்சி. 

திருமால் வழிபட்டு பேறு பெற்ற தலம் என்பதால், இத்தலம் 'திருமாற்பேறு' என்றானது. அதுவே மருவி நாளடைவில் திருமால்பூர் என்றானது.

திருமால், சிவபெருமானிடமிருந்து சக்கராயுதம் பெறுவதற்காக இத்தலத்திற்கு வந்து, சக்கர தீர்த்தம் ஏற்படுத்தி, பாசுபத விரதம் பூண்டு, திருநீற்றை உடல் முழுவதும் பூசி ருத்ராட்சம் அணிந்து, அம்பிகை பூஜித்த ஈசனை முறைப்படி பூஜை செய்து வந்தார்.

தினமும் ஆயிரம் தாமரை மலர்கள் கொண்டு, ஆயிரம் நாமங்கள் சொல்லி ஈசனை அர்ச்சித்து வந்தார். ஒருநாள் பூஜையின்போது, ஈசனின் திருவிளையாடலால் ஒரு மலர் குறைந்தது..வழிபாட்டில் குறையேற்படலாகாது என்றெண்ணி, தன் கண்ணைப் பறித்து, கண் மலரால் ஈசனை வழிபாடு செய்தார். 

திருமாலின் ஆழ்ந்த பக்திக்கு ஈசன் உளம் மகிழ்ந்து காட்சி கொடுத்தார். தனக்கு காட்சி தந்த சிவபெருமானை மும்முறை வலம்வந்து வணங்கினார் திருமால். 

பின்னர் ஈசன் திருமாலைப் பார்த்து, 'நாராயணரே! தாமரை மலருக்காக உம் கண்ணை எடுத்து அர்ச்சித்தமையால், உள்ளம் மகிழ்ந்து உமக்கு தேன் மருவிய தாமரை மலர்க்கண்ணை அளித்தோம். 

இனி நீ தாமரைக்கண்ணன், பதுமாஷன் என்று பெயர்பெற்று விளங்குவாய். நீ பேறு பெற்றதால், இத்தலம் உன் திருப்பெயரால் 'திருமாற்பேறு' என விளங்கப் பெறும். இச்சக்கரத்தால் வெல்லற்கரிய பகைவரையும் வெல்க' என்று கூறி சுதர்சன சக்கரம் வழங்கி ஆசீர்வதித்தார்.

பெருமாளின் கருட சேவை நடைபெறும் ஒரே சிவத்தலம் 

மூவருக்கு தீபாராதனை காட்டியபின், எதிரில் இருக்கும் திருமாலுக்கும் தீபாராதனை காட்டப்படுவது சிறப்பாகும்.

 திருமால் பூஜித்த காரணத்தால் இக்கோவிலுக்கு வரும் பக்தர்களுக்கு தீர்த்தம் வழங்கி, சடாரி சாற்றப்படுகிறது. இது இத்தலத்தின் தனிச்சிறப்பாகும்.

 சிவன் கோவில் என்றாலும், பெருமாள் அருள் பெற்ற தலம் என்பதால் பிரம்மோற்சவ காலத்தில் கருடசேவை இங்கு வெகு விமரிசையாகக் கொண்டாடப்படுகிறது. பெருமாளின் கருட சேவை நடைபெறும் ஒரே சிவத்தலம் என்பது வியப்புக்குரியதாகும். 

இத்தலத்தில் ஒரு கண நேரம் தங்கியவர்களுக்கும் முக்தியளிக்க வேண்டும் எனவும், 

இங்கு வழிபட்டால் அனைத்துக் கோயில்களிலுள்ள லிங்கங்களையும் வழிபட்ட பலன் கிடைக்க வேண்டும் எனவும் வரம் பெற்றார். சிவன் மகிழ்ந்து திருமால் கேட்ட வரம் தந்தருளியதாக வரலாறு.

பார்வதிதேவியால் விருதசீர நதிக்கரையில் மணலால் சுயம்புவாக அமைக்கப்பட்ட லிங்கம் இங்கு மூலவராக உள்ளது. அது கரைந்து விடாமல் இருக்க லிங்கத்தின் மீது, குவளை (செம்பால் செய்யப்பட்ட கவசம்) சாத்தியே அபிஷேகம் செய்யப்படுகிறது.

ஓம் நமசிவாய 
படித்து பகிர்ந்தது 
இரா இளங்கோவன் 
நெல்லிக்குப்பம். 

பிராது கட்டினால் வேண்டுதலை நிறைவேற்றும் முருகன்.

*பிராது கட்டினால் வேண்டுதலை நிறைவேற்றும் முருகப்பெருமான்*
விருத்தாச்சலம் அருகே மணவாளநல்லூரில் அமைந்துள்ளது கொளஞ்சியப்பர் கோவில். இத்தலத்தின் நாதன் முருகப்பெருமான் தனது பக்தர்களுக்கு, மகா நீதிபதியாய் இருந்து நல்ல தீர்ப்பும் நல்வாழ்வும் வழங்கி அருள்வதாக ஐதீகம். இதற்காக இத்தலத்தில் பிராது கட்டுதல் என்ற ஒரு வழிபாடு இருக்கிறது. பிராது கட்டுவதற்காக கோவில் பிரகாரத்தில் முனீஸ்வரன் சன்னதி அருகே ஒரு இடமும் இருக்கிறது.

அதாவது மேலதிகாரிகளுக்கு நாம் எழுதும் ஒரு முறையீட்டு மனுவின் நடைமுறை போன்று இந்த நேர்த்திக்கடன் அமைந்துள்ளது. கோவில் அலுவலகத்தில் கொடுக்கப்படும் காகிதத்தில் மணவாளநல்லூர் கொளஞ்சியப்பர் அவர்களுக்கு.... நான் இந்த ஊரிலிருந்து வருகிறேன். இன்னாருடைய மகன், என் பெயர் இது... என்பன போன்ற முழுமையான விவரங்களை எழுதி, தனது குறை, கோரிக்கைகள் என்ன என்பதையும் குறிப்பிட வேண்டும். பின்பு அதை கொளஞ்சியப்பர் சன்னிதியில் உள்ள சிவாச்சாரியாரிடம் கொடுக்க வேண்டும்.

பகிரபடும் பகிர்வுகள் பிறர் அறிந்துக் கொள்வதற்காக தவிர பிறர் பிரதி உரிமையை மீறும் எண்ணம் இல்லை..அசல் பதிவேற்றியவருக்கு நன்றி.

அதை அவர் கொளஞ்சியப்பரின் பாதத்தில் சமர்ப்பித்து, அர்ச்சனை செய்து, மனுவை விபூதி சேர்த்து, பொட்டலமாக்கி ஒரு நூலால் கட்டித் தருவார். அதை முனியப்பர் சன்னிதியின் முன்பு நிறுத்தப்பட்டுள்ள வேல் அல்லது சூலத்தில் கட்டவேண்டும். நியாயமான கோரிக்கைகளை முருகப்பெருமான் 3 நாட்கள் அல்லது 3 வாரங்கள் அல்லது 3 மாதங்களில் நிறைவேற்றி வைப்பார் என்பது பக்தர்களின் நம்பிக்கை.

இவ்வாறு பிராது கட்டி வழிபடுவதற்கு கட்டணமும் வசூலிக்கப்படுகிறது. நாம் எந்த ஊரில் இருந்து வருகிறோமோ அந்த இடத்திற்கும், கோவிலுக்கும் இடையே உள்ள தூரத்தை கணக்கிட்டு, ஒரு கிலோமீட்டருக்கு 25 பைசா வீதம் கட்டணம் வசூலிக்கப்படுகிறது. பக்தர்கள், தங்கள் கோரிக்கைகள் நிறைவேறிய பிறகு, மீண்டும் இந்த கோவிலுக்கு வந்து, ‘‘இந்த தேதியில் நான் வைத்த பிராது கட்டுதல் வேண்டுதல் நிறைவேறியதால், அதை நான் திரும்ப பெற்றுக் கொள்கிறேன்’’ என கூறி நேர்த்திக்கடனை நிறைவேற்றுகிறார்கள்.

குழந்தை வரம் கிடைக்க, கடன் தொல்லை தீர, திருடு போன பொருள் மற்றும் ஏமாற்றப்பட்ட பணம் கிடைக்க, வேலை மாறுதல் கிடைக்க, குடும்ப கஷ்டம் தீர, பிரிந்திருக்கும் கணவன் - மனைவி ஒன்று சேர, தீராத வியாதிகள் விலக என பல்வேறு வேண்டுதல்களை முன்வைத்து இங்கு பக்தர்கள் பிரார்த்தனை செய்து பிராது கட்டுகின்றனர்.
ஓம் நமசிவாய 
படித்து பகிர்ந்தது
 இரா இளங்கோவன் 
நெல்லிக்குப்பம். 

Monday, September 1, 2025

நரசிம்மரும், சுவாதி நட்சத்திரமும்

நரசிம்மரும், சுவாதி நட்சத்திரமும்
நரசிம்மரை வழிபட்டால் பரமேஸ்வரன்-பார்வதியை வழிபட்டது போன்ற உயர்ந்த பலன் கிடைக்கிறது.

சுவாதி நட்சத்திரம் வாயுவின் நட்சத்திரம். வாயுதேவர் எவ்வளவு வேகத்தில் வருகிறாரோ அதே வாயுவேகத்தில் வந்து நம்மைப் பாதுகாத்து அருள் புரிவார் இந்த நரசிம்மர்.

சுவாதி நட்சத்திரத்திற்கு தோஷம் கிடையாது.

நரசிம்மரை வழிபடுவதினால் ஜாதகத்தில் ராகுவினால் ஏற்படும் தடைகள், பிரச்சினைகள் நீங்கி நன்மை உண்டாகும். மேலும் பில்லி, சூனியம், எதிரிகளின் தொல்லைகளிலிருந்து விடுபடலாம்.

சுவாதி நட்சத்திரத்தில் நரசிம்மரை தொடர்ந்து வழிபாடு செய்தால் “ருண விமோசனம்’ என்னும் கடன் தொல்லைகள் நீங்கும் பேறு ஏற்படும்; செல்வச் செழிப்பு உண்டாகும். வியாபாரம் அபிவிருத்தியாகும்.

நரசிம்மர் அவதாரம் எடுத்தது மாலை வேளையில் (பிரதோஷ காலம்). ஆதலால் சுவாதி நட்சத்திரத்தில், மாலை வேளையில் நரசிம்மரை வழிபாடு செய்வது சிறந்த பலனைத் தரும்.

ஓம் நமசிவாய 
படித்து பகிர்ந்தது
 இரா இளங்கோவன்
 நெல்லிக்குப்பம். 

Followers

திருவண்ணாமலை அஷ்ட லிங்கங்கள்

திருவண்ணாமலை அஷ்ட லிங்கங்கள் பலன் திருவண்ணாமலை கிரிவலப் பாதையில் அமைந்துள்ள எட்டு திசை லிங்கங்களே (அஷ்ட லிங்கங்கள்) நவகிரக தோஷங்...