Saturday, December 6, 2025

சிவாலயத்தில் சிவனுக்கு முன் துவாரபாலகர்கள் இருவர் ஏன்❓

சிவாலயத்திற்கு செல்லும்பொழுது எல்லோரும் மூலவரான சிவலிங்கத்துடன் வேண்டுகிறோம். நான் பிரார்த்தனை என்று நம்புகிறோம். இது தவறு.
மூலஸ்தானத்திற்கு நுழையும் முன்பாக துவாரபாலகர்கள் இருவர் இருப்பர். அந்த இருவரில் யாராவது ஒருவரிடம் நாம்
அவரது முகம் பார்த்து பின்வருமாறு நாம் நினைக்க வேண்டும்.

நம்முடைய பெயர் 

நம்முடைய பிறந்த நட்சத்திரம் 

நம்முடைய பிறந்த ஊர்

 நம்முடைய கோத்திரம் நம்முடைய தொழில் இவை அனைத்தையும் நினைக்க வேண்டும்.

 பிறகு நம்முடைய கோரிக்கைகளை வரிசையாக கூற வேண்டும். 

என் மகளுக்கு நல்ல வாழ்க்கை துணை அமைய வேண்டும். 

எனது கடன் இன்னும் ஒரு வருடத்திற்குள் தீர வேண்டும்.

எதிரிகளும் துரோகிகளும் செய்யும் எந்த ஒரு மாந்திரிக தாக்குதலும் என்னையும் எனது குடும்பத்தையும் எனது தொழிலையும் சிறிதும் பாதிக்காத அளவுக்கு நான் ஆத்மா பலத்தோடு இருக்க வேண்டும்.

இந்தக் கோரிக்கைகளை உள்ளே இருந்து அருள்பாலிக்கும் அப்பாவிடம் தெரிவித்து விடுங்கள். என்று வேண்ட வேண்டும்.

 அப்படிச் செய்தால் அன்று நள்ளிரவு 3 மணிக்கு துவாரபாலகர் உள்ளே இருந்து அருள்பாலிக்கும் சிவலிங்கத்துடன் முறைப்படி தெரிவிப்பார். 

(ஒவ்வொரு ஆலயத்திலும் நள்ளிரவு 3 மணிக்கு எல்லா தெய்வீக சன்னதியில் இருந்தும் சிற்பங்கள் உயிர் பெற்று எழுந்து வரும்.மூலஸ்தானத்திற்கு சென்று அன்று முழுவதும் அந்த ஊரில் என்ன நடந்தது என்பதை மூலவரிடம் தெரிவிக்கும். இதை நாம் யாரும் பார்க்க முடியாது.)

இந்த பிரார்த்தனையில் யாரையும் சபிக்க கூடாது. 

நமக்கு என்ன வேண்டும் என்பதை மட்டுமே கேட்டுக் கொள்ளவேண்டும் வேண்டிக் கொள்ள வேண்டும்.

சித்தர்கள் அருளிய பிரார்த்தனை முறை இதுதான். 

ஓம் நமசிவாய
 படித்து பகிர்ந்தது 
இரா இளங்கோவன் 
நெல்லிக்குப்பம். 

Thursday, December 4, 2025

சிதம்பரேஸவரர் நவபுலியூரின் ஏழாம் தலம் அத்திபுலியூர்.



நவபுலியூரின் ஏழாம் தலம் அத்திபுலியூர், நாகபட்டினத்தில் இருந்து திருவாரூர் செல்லும் சாலையில் அமைந்துள்ளது அந்த அத்திபுலியூர், கடுகை ஆற்றின் வடகரையில் நாகபட்டினத்துக்கு மேற்கே 15 கிமீ தொலைவில் அமைந்துள்ளது அந்த ஆலயம்
இங்கே சிவபெருமான் சிதம்பரேஸவரர் என அழைக்கபடுகின்றார், இந்த ஆலயம் காலத்தால் மிக மிக மூத்தது, எவ்வளவுக்கு மூத்தது என்றால் அகத்தியர் காலத்துக்கும் பழமையானது

சத்ய யுகத்தில் ரோமசனாம ரிஷி என்றொருவர் இருந்தார் அவருக்கு கேதரர், பேரளர் என இரு மகன்கள் உண்டு

பாடலிபுத்திரம் அருகே பேராளர் தங்கிவிட, கேதரர் சில சாதுக்களோடு தெற்கு நோக்கி வந்தார்

குருந்தமரம் நிரம்பிய இந்த பக்கம் அவர்கள் வந்தபோது கேதரர் அங்கே தவமிருக்க தொடங்கினார், அப்போது அவர் கண்டெடுத்த லிங்கமே இந்த சுயம்புலிங்கம்

இதனால் இந்த தலத்துக்கு கேதாரம் என்றும் பெயர், தென்னக கேதாரம் என அழைப்பாரும் உண்டு, அந்த சிவனுக்கு கேதாரீஸ்வரர் எனும் பெயரும் உண்டு

இப்படி மிக மிக பழமையான ஆலயம் அகத்தியரால் மீண்டும் அடையாளம் காட்டபட்டது, அகத்திய மாமுனி காலத்தால் மிக தொன்மையானவர், அவர தென்னகத்துக்கு வந்து ஏகபட்ட ஆலயங்களுக்கு அடிதளமிட்டார், பல ஆலயங்களை அடையாளம் காட்டினார்

சுமார் 170க்கும் மேற்பட்ட ஆலயங்கள் அவரால் ஸ்தாபிக்கபட்டன அதற்கு மேல் அடையாளமிட்டு காட்டபட்டன‌

கேதர முனிவர் கண்டெடுத்து பிரதிர்ஷ்டை செய்த லிங்கத்தை பலகாலம் கழித்து உலகறிய செய்தவர் அகத்திய பெருமான்
அந்த ஆலயத்தில்தான் சிவபெருமான் அகத்தியருக்கு மணக்கோலகாட்சியுடன் சிவன் காட்சியளித்தார், அந்த கல்யாணசுந்தர கோலத்தில்தான் அந்த ஆலயம் இன்றும் விளங்குகின்றது

அப்படி அகத்திய பெருமானால் அடையாளம் பெற்ற இந்த ஆலயம் , மாண்டவிய முனிவரால் இன்னும் பிரசித்தியாயிற்று

மாண்டவிய முனிவர் பிரசித்தியான முனிவர்களில் ஒருவர், அந்த முனிவர் தன்னை அவமானபடுத்திய கேசேரித்துவஜ பாண்டியன் எனும் மன்னனை யானையாக போகும்படி சபித்தார், அப்படியே அவன் யானை வடிவம் அடைந்தான்

அவன் சாபம் தீர இந்த சிவனை வணங்க சொல்லி அனுப்பினார் முனிவர், அந்த யானையும் இந்த தலத்துக்கு வந்து கடுகை ஆற்றின் நீரால் சிவனுக்கு அபிஷேகம் செய்து தன் சாபம் தீர்த்தது, சாபம் நீங்கிய மன்னன் மீண்டும் ராஜ்ஜியத்தை அடைந்தான்
அப்படி சாபம் தீர்த்து வைத்த தலம் அது, எவ்வகை சாபம் என்றாலும் இங்கு தீரும்

அத்தி அல்லது ஹஸ்தி என்றால் யானை என்றொரு பொருள் உண்டு, யானை வடிவ பாண்டிய மன்னன் வணங்கிய ஆலயம் என்பதால் இது அத்தி வணங்கிய ஆலயமானது

பின்னாளில் புலிக்கால் முனிவர் வணங்கியதால் புலியூர் என்றானது , அதுவே அத்தி புலியூர் என்றானது
இப்படி தொடங்குகின்றது இந்த ஆலயத்தின் வரலாறு

இன்னும் விசுவாமித்திரர் பிரம்மரிஷி பட்டம் பெற தவமிருந்த இடம் என்றும், அமிர்த குடத்தின் துளி விழுந்த இடம் என்றும் பெரும் வரலாறு இத்தலத்துக்கு உண்டு

மிக மிக தொன்மையும் மாபெரும் பழமையும் "தட்சன கேதாரம்", "தட்சன கயிலாயம்" என்றெல்லாம் கொண்டாடபடும் அந்த ஆலயமும் அந்த கல்யாணசுந்தரர் கோல சிவனும், சிதம்பரேஸ்வரர் எனும் சுயம்பு லிங்கமும் பெரும் பிரசித்தி

சோழ மன்னர்கள் இந்த ஆலயத்தை கொண்டாடினார்கள், சம்பந்தபெருமான் இங்கே வந்து வழிபட்டிருக்கின்றார்
இது தேவார வைப்பு தலமாகவும் இருந்திருக்கின்றது, அப்படி வெகு சிறப்பான ஆலயம் இது

இந்த ஆலயம், இந்த  தட்சன கேதார ஆலயம்தான் வியாக்ரபாதரரால் வணங்கபட்டது, சிவன் உத்தரவுபடி பதஞ்சலியும் அவரும் வந்து வணங்கினார்கள்

ஆலயத்தின் தீர்த்தம் இன்றும் வியாகரபாதரர் தீர்த்தம் என்றே வழங்கபடுகின்றது

இந்த ஆலயத்தின் பிரசித்தி அல்லது மகா சிறப்பு தெற்கு நோக்கி அமைந்திருப்பது, வேறு எந்த ஆலயமும் இப்படி அமைந்திருந்து யாரும் பார்த்திருக்க முடியாது

ஏன் தெற்கு நோக்கி அமைந்திருக்கின்றது என்றால், வடக்கே கேதாரம், கயிலாயம் இருப்பதை சொல்லி அந்த திசை நோக்கி இந்த தட்சன கேதாரத்தில் இருந்து வணங்க வேண்டும், இது அந்த கயிலாய சாயல் ஆலயம் என்பதை சொல்லும் ஆலயம் இது
தெற்கு நோக்கி அருள்பாலிக்கின்றார் சிவபெருமான்

கயிலாயத்தை நோக்கி வணங்க வேண்டும் என்பது ஒரு தத்துவமாகவும், தெற்கு என்பது எமதிசை என்பதால் எமனை விரட்டி பலமும் காவலும் ஆரோக்கியமும் சிவன் தருகின்றார் என்பது இன்னொரு தத்துவமாகவும் சொல்லபடுகின்றது

இந்த ஆலயத்தின் சிறப்பு சாபம் தீரும், முன் ஜென்ம வினை அகலும், மிக முக்கியமாக வாழ்விற்கு எதெல்லாம் அவசியமோ அது வழங்கபடும் , வாழ்வில் எது தடையோ அது அகலும்

மணகோலத்தில் சிவன் நிற்பதன் தத்துவம் அதுதான், மணவாழ்வு என்பது ஒருவனின் குடும்ப வாழ்வு பூலோக வாழ்வை குறிப்பது, அந்த வாழ்வுக்கான எல்லா வரங்களையும் அருளும் ஆலயம் இது

நவகிரகங்களில் இது சுக்கிரனின் தலமாகும்

சுக்கிரன் எல்லா இன்பங்களையும் அனுபவிக்க வாய்பளிக்கும் கிரஹம், உண்மையில் இந்த பூமியில் மனிதன் இன்பம் துய்த்து வாழ்ந்து செல்லத்தான் ஆனந்தமாக வாழ்ந்து செல்லத்தான் வருகின்றான் ஆனால் மாய மயக்கமும் முன் ஜென்ம வினையும் இன்னும் பலவும் அவனை அப்படி இருககவிடுவதில்லை

சுகங்களுக்கு அதிபதி சுக்கிரன், எல்லா வகை சுகங்களும் செல்வாக்கும் தன்பெரும் மரியாதையும் அந்த கிரகத்தின் அருளாலேதான் கிட்டும்

சுக்கிரன் அருள் இருந்தாலே உடல் நலம் முதல் எல்லா நலமும் சேர்ந்து இன்பங்களை அனுபவிக்கும் வாய்ப்பை தரும், இல்லையேல் எல்லாம் இருந்தும் அனுபவிக்கும் யோகம் இராது அல்லது எதுவுமே இராது ஆசைமட்டும் எஞ்சியிருக்கும்
சுக்கிரன் எல்லா இன்பங்களையும் ஆனந்தங்களையும் அனுபவித்து கடக்கும் பெரும் யோகம் அருள்வார்

சுக்கிரன் கலை உணர்வின் அதிபதி, அறிவுக்கும் ஞானத்துக்கும் புதனும் குருவுமே காரஹர்கள் என்றாலும் கலைவடிவத்துக்கும் ரசனைக்கும் சுக்கிரனே காரணகர்த்தா

சுக்கிரன் அருள் இருந்தால் தனி கலை உணர்ச்சி பெருகும், அது அவர்களுக்கு தனி அங்கீகாரம் கொடுக்கும், பெரும் ஈர்ப்பும் செல்வாக்கும் கூட்டமும் சேர்த்து கொடுக்கும்

புகழ்பெற்ற கலைஞர்கள் அனைவருக்கும் சுக்கிரனின் பரிபூரண அனுக்கிரஹம் இருப்பதை உணரமுடியும்

அதே கூர்மையினை பலருக்கு பொருளீட்டும் அறிவுக்கும் கொடுப்பார் சுக்கிரபகவான், இதனாலேதான் அந்த தொழிலதிபர்களிடம் தனிபெரும் அறிவும் ஈர்ப்பும் இருப்பதை காணலாம்

சுக்கிரன் அருள் இருந்தாலே பலரை ஈர்க்கமுடியும், பலரை வசபடுத்த முடியும், சொல்லும் சொல்லும் செய்யும் செயலும் வெற்றிபெற வைக்க முடியும்

அதனாலேதான் பூலோக லவுகீக வாழ்வில் சுக்கிரனின் அருள் அவசியம், அது இன்றி மானிட வாழ்வு பூர்த்தியாவதில்லை
வாழ்வில் மிக மிக முக்கிய விஷயம் நல்ல துணை அமைவது, அந்த துணையினை அருள்வது சுக்கிர பகவான்
சுக்கிரனின் அருளாலே நல்ல துணை அமையும், அந்த அருள் மிக மிக முக்கியம். 

இதனாலேதான் சிவன் மணக்கோலத்தில் இந்த ஆலயத்தில் காட்சியளிக்கின்றார், அந்த வரம் இங்கே அருளபடும் என்பதை சொல்கின்றார்

சுக்கிரன் எனும் கிரகமே ஒருவனுக்கு நல்ல சுகங்களை வழங்கும், சுகங்களை நிம்மதியாக தடையின்றி அனுபவிக்கும் வரத்தை அருளும்

நல்ல சூழலை குடும்பம் முதல் தொழில் வரை அதுதான் அருளும்

ஒவ்வொருவர் கர்மாவின் மூலம் என்ன என்பதையும் எது ஒருவனின் பலம் மற்றும் பலவீனம் என்பதையும் சரியாக அடையாளம் காட்டி தருவதும் சுக்கிரனே

வாழ்வில் ரசனை, மகிழ்ச்சி , ஆனந்தம், சுகம், தனவரவு என எல்லாவற்றுக்கும் சுக்கிரபகவானின் தனி அருள்தான் மூலதனம், சுக்கிரன் சரியாக அமையாத அல்லது அதற்கு பரிகாரம் செய்யாத வாழ்வு சிறக்காது

எவ்வளவுக்கு சுக்கிரன் பலமோ அவ்வளவுக்கு ஆபத்தும் அதிகம்

மழை இல்லாவிட்டாலும் சிக்கல் பெரிதாக பெய்து வெள்ளமாக வந்து அடித்து சென்றாலும் சிக்கல் என்பது போல, நெருப்பு இல்லாவிட்டால் குளிர் அதிக நெருப்பு கடும் வெப்பம் என்பது போல சுக்கிரன் அருளும் ஒரு கட்டுபாட்டுக்குள் இருந்தாக வேண்டும்
இல்லையேல் அது மனிதனை வீழ்ச்சிக்கு இழுத்து செல்லும்

இதனால் சுக்கிரன் அருள் இல்லாவிட்டாலும் அதிகமாக இருந்தாலும் மூல தெய்வமான சிவபெருமானை சரணடைதல் நன்று, அவரை வழிபட்டு நிற்றல் சால சிறந்தது

அதைத்தான் இந்த ஆலய தத்துவம் சொல்கின்றது

புதிய புதிய சிந்தனைகள், காலத்துக்கு ஏற்ற சிந்தனைகள், எல்லோரும் ஏற்கும் ரசனைகள், ஈர்ப்பான விஷயங்கள் அது கலையோ தொழிலோ எதுவோ என்றாலும் அந்த சிந்தனைகளை கொடுத்து நல்ல பலன்களை  கொடுப்பது சுக்கிரபகவானே

இந்த பூமியில் வாழ சில விஷயங்கள் அவசியம், மானுடன் தனித்து சிந்திக்க வேண்டும் தன்னை நிலை நிறுத்த வேண்டும், தன்னால் பிறருக்கு பயன்படும்படி வாழவேண்டும்

யார் ஏராளமான மக்களுக்கு பயனுள்ள காரியங்களை ஏதோ ஒரு வகையில் செய்கின்றானோ, ஏராளமான மக்களால் கவனிக்கபட்டு ஈர்க்கபட்டு கொண்டாடபடுவானோ அவன் தனிவெற்றி பெறுவான்

அந்த சக்தியினை ஆற்றலை வழங்குபவர் சுக்கிரன்

நல்ல குடும்ப சூழலை, நல்ல வாய்ப்பை வசதிகளை நிம்மதியினை ஆனந்தத்தை தருபவரும் அவரே

போகத்துகுரியவன் என அவரை எளிதில் தள்ளிவிட முடியாது, சுக்கிரன் என்றால் உற்சாகம், சுக்கிரன் என்றால் விடாத உழைப்பு, சுக்கிரன் என்றால் புதிய புதிய சிந்தனை, சுக்கிரன் என்றால் எல்லாவற்றையும் நிறைவாக கடந்து செல்ல உதவும் நிலை
வாழ்வின் முடிவில் தன் ஒவ்வொரு பக்கத்தையும் திரும்பிபார்க்கும் மனிதன் எல்லாம் நிறைவாய் உணர்ந்தான் என்றால் அதுதான் சுக்கிரனின் ஆசி

ஒருவன் முழுமையான வாழ்வு வாழ சுக்கிரனின் அருள் மிக அவசியம்

இந்த முழுமைதான் இந்த நிறைவுதான் வாழ்வின் அடுத்தகட்டத்தில் இறைவனை நோக்கி மனதை திருப்ப சொல்லும், அந்த நிறைவுதான் கடைசியில் இறை ஞானத்துக்கு சாவியாகி வாசலை திறக்கும்

எதையும் அனுபவிக்காமல் எல்லாவற்றின் மேல் ஏக்கம் கொண்டிருப்பவனுக்கு ஞானம் வாய்க்காது, அப்படியே மனதை அடக்கி ஞானத்தை தொடமுயன்றாலும் இறைவனை அறிய முயன்றாலும் அடக்கி வைத்த ஆசைகள் பிரமாண்டமாய் எழுந்து மிரட்டி வீழ்த்தும்

பலர் பாதியிலிலே திசைமாறி செல்வது இப்படித்தான்

அவித்த நெல் முளைக்காது என்பதுபோல் ஆசைதீர அனுபவித்துவிட்டபின் அந்த எண்ணம் எழாது வெறுமையே மிஞ்சும்
இதனாலே எல்லாம் அனுபவித்து கடந்தபின் வரும் ஞானம் நிலைக்கும், கெட்டபின்பு ஞானி என்பது அதனாலேதான்
பட்டினத்தாரும், பத்ருஹரியாரும் அதற்கு பெரும் சான்றுகளாய் நின்றார்கள், ரிஷிமூலம் பார்க்காதே என இந்துக்கள் சொன்னதன் காரணமும் அதுவே

ஆம், சுக்கிரன் வாழ்வினை மகிழ்வாய் ரசனையாய் நிறைவாய் ஆனந்தமாய் சுகமாய் வாழசெய்யும் கிரஹம், அதன் பலன் மிக அவசியம்

நிறைவான வாழ்வே பின் நிலையான ஞானத்தையும் வீட்டுபேற்றையும் கொடுக்கும்

அந்த சுக்கிரனின் அருள் ஒவ்வொருருக்கும் அவசியம், அதை தருவதற்குத்தான் திருஅத்திபுலியூர் ஆலயம் காத்துகொண்டிருக்கின்றது

உங்கள் ஜாகதகத்திலோ இல்லை வாழ்வின் விதி அமைப்பிலோ சுக்கிரனின் சம்பத்து சரியாய் நிறைவாய் முழுமையாய் அமைய அங்கு வழிபட்டால் நல்லது

பாண்டிய மன்னன் சாபம் தீர்த்து விலங்கு நிலையில் இருந்து இழந்த ராஜபோகத்தை மீட்டது போல நீங்களும் இழந்த ஆனந்த நிலையினை அடைவீர்கள்

ஆத்மா ஆனந்தமானது ஆனால் மாயைகளினால் அது அலைகழிக்கபட்டு தன் மகிழ்ச்சியினை இழந்து தவிக்கின்றது

அதை மீட்டெடுத்தவர்கள் ரிஷிகள், அந்த மயக்கத்தில் சிக்காமல் இருப்பவர்கள் குழந்தைகள். இந்த இருவரிடமும் அந்த ஆத்மத்தின் தெயவீக முழுமையினை உற்சாகத்தை காணமுடியும்

சுக்கிரனின் பலம் உங்களுக்கு வாய்த்தால் அது கொடுக்கும் நிறைவால் காலத்தால் இதே கனிந்த உற்சாகத்தை, முழுமையான உற்சாகத்தை எல்லாம் கடந்து வந்த உற்சாகத்தை ஞானத்தை நீங்களும் பெறமுடியும்

கர்மம் ஆற்றவும், காரியம் முடிக்கவும், கடமையினை செய்து வந்தவேலையினை நிறைவாய் செய்யவும் சுக்கிரனின் பலம் அவசியம்
இதனை மகாபாரத காட்சியில் சொன்னவன் அர்ஜூனன், அவனுக்கு சுக்கிரபலம் இருந்தது தொட்டதெல்லாம் துலங்கியது அந்த நிறைவில் கடைசியில் கீதை கேட்டு ஞானியாகி கடைசியில் ஆட்சியினை விடுத்து இமாலயம் செல்லும் அளவு அவனுக்கு நிறைவு வந்தது

இதுதான் சுக்கிரனின் பூரண பலம், இதுதான் பட்டினத்தார் வாழ்விலும் நடந்தது இன்னும் பல ஞானியர் வாழ்விலும் நடந்தது
சுக்கிரன் உங்களுக்கு நீங்கள் யாரென புரிய வைப்பார், எதற்காக படைக்கபட்டீர்கள், கர்மா என்ன கடமை என்ன? அதை செய்ய என்ன வழி, செய்யும் நோக்கமென்ன என எல்லாமும் புரியவைத்து வழிநடத்துவார்

இந்த ஆலயம் சுக்கிரனின் தனி அருளை தரும் ஆலயம், சிவபெருமான் சன்னதியில் அந்த கல்யான சுந்தரர் கோலத்தில் , வாழ்வு தொடங்கும் அந்த கோலத்தில் நின்று சிவன் உங்களுக்கும் பெரும் அதிசயங்களை செய்வார்

கல்யாண சுந்தரர் கோலம் என்பது சுக்கிரனின் இன்னொரு அம்சத்தை தன்மையினை போதிக்கும் கோலம்
இந்துமதம் பெண்களுக்கு தனி இடம் கொடுத்தமதம்,  பெண்களை கொண்டாட சொன்ன மதம், பெண்களை போற்றி பெரும் இடத்தில் வைக்க சொன்னமதம்

பெண்ணே இயங்கு சக்தி, என்பதால் எதெல்லாம் இயக்குமோ எதெல்லாம் உருவாக்குமோ அதற்கெல்லாம் பிரபஞ்சம் முதல் நீர், மண் என எல்லாவற்றுக்கும் பெண் பெயரை இட்ட மதம் இந்துமதம்

இயக்கு சக்தியினை பெண் என கொண்டாடிய மதம் இந்துமதம், அந்த ஞானமதம் எங்கும் நிம்மதியும் மகிழ்வும் சந்தோஷமும் பெருக, தனிபெரும் சந்தோஷமும் நிம்மதியும் நிறைவும் அமைதியும் சூழ பெண்களை நன்முறையில் நடத்துதல் அவசியம் , அவர்களை மகிழ்ச்சியாய் வைத்திருந்தல் அவசியம் என்பதை சொன்னது

இந்துமதம் அப்படித்தான் பெண்ணை வைத்திருந்தது, ஆண் ஞானமடைய ஆயிரம் வழிகளை சிரமங்களை சொன்ன இந்துமதம் பெண் தன் கணவனை போற்றினால் போதும் எனும் ஒரே வரியில் அறிவுரை சொன்னது

அதன் பொருள் போற்றபடும்படி கணவன் தன் மனைவியினை நடத்தவேண்டும் என்பது

அக்கால இந்துஸ்தானில் பெண்கள் கொண்டாடபட்டனர், கோவிலும் இலக்கியமும் அக்கால சமூகமுகம் பண்டிகையும் அதனை காட்டுகின்றன‌

ஆனால் அந்நியபடையெடுப்பின் குழப்பங்களில் எல்லாம் மாறிற்று, அதே நேரம் இன்றும் உலகின் முன்னணி நாடுகளை செழுமையான நிறைவான நிம்மதியான நாடுகளை பாருங்கள், அங்கே பெண்கள் மகிழ்வோடும் முழு உரிமையோடும் நடத்தபடுவதை காணமுடியும்

இதுதான் பிரபஞ்ச சக்தி

இதன் பொருள் என்னவென்றால் பெண்கள் மதிக்கபடுமிடம் சுக்கிரனின் அருள் பிரதானமாகும் என்பது, இதனாலே சுக்கிரனின் அருள் பெற்ற கலைஞர்கள், கலையில் கரை கண்டவர்கள், இதர தனி திறமையால் வென்றவர்கள், ஏன் அதிசயிக்கதக்க விஞ்ஞானிகளிடம் கூட பெண்கள் மேல் ஒரு பரிவினை காணமுடியும்

அது மயக்கம் என பல இடங்களில் சொல்லபட்டாலும் உண்மையில் அதன் பெயர் பரிவு

இந்த பரிவு இருக்குமிடத்தில் சுக்கிரனின் அருள் தானாக துலங்கும், எல்லா நிறைவும் ஆனந்தமும் அங்கு வாய்க்கும்
இதைத்தான் தன் துணைவியான பார்வதியோடு நின்றபடி கல்யாண கோலத்தில் நின்றபடி கல்யாணா சுந்தரபெருமானாக போதிக்கின்றார் சிவபெருமான்

இந்த தத்துவ போதனையினை எல்லோருக்கும் தெரிவிக்கும் பொருட்டு எல்லா மக்களும் வந்து சுக்கிர பலம் பெற்று செல்லும்பொருட்டே கேதார முனிவர், அகத்தியர், மண்டவி முனி, புலிக்கால் முனிவர் என எல்லோரையும் அழைத்து நிறைவும் முழுமையும் கொடுத்து நிறைவாய் மகிழ்வாய் அனுப்பிவைத்தார்

அந்த முழுமை, அந்த நிறைவு, அந்த ஏகாந்த ஆனந்தம் உங்களுக்கும் கிடைக்கும், அங்கே சுக்கிரனின் அருள் , அந்த சுக்கிர தன்மை பரிபூரணமாகும்

அத்திபுலியூர் சென்று வணங்குங்கள், சுக்கிர தன்மை சுக்கிர அம்சம் குறைபாடால் இதுவரை அரைகுறையாக ஏதோ பெயருக்கு உருவற்று இருந்த உங்கள் வாழ்வு , கவலையும் கலக்கமும் குழப்பமும் நிறைந்திருந்த வாழ்வு அப்படியே மாறும்
ஆனந்தமும் மகிழ்வும், சரியான உணர்வும் தெளிவும் செய்யவேண்டிய காரியமும் கடமையும் கர்மமும் அதற்கான பாதையும் உங்களுக்கு சரியாக தெரியும்

அதன் பின் நீங்க்ள் தொட்டதெல்லாம் துலங்கும், உங்கள் வாழ்வே மாறும் , முழுமையும் பூரணமும் நிறைவினை நோக்கி அது உங்களை அழைத்து சென்று ஞானத்தின் சாவியினை கொடுக்கும்

கடமைகளும் கர்மாவும் முடிக்க வழிசெய்தபின் முழு ஞானமும் நிம்மதியும் உங்களை தேடிவரும்

மன்னன் இழந்ததை மீட்டான், கேதரர் கர்மாவினை உணர்ந்தர், விஸ்வாமித்திரர் பிரம்மரிஷியானார் என எல்லாவற்றையும் கவனியுங்கள்

எல்லோரும் அங்கு முழுமை அடைந்த ரகசியத்தை சொல்லும், அகத்தியரும் சிவனின் மணக்கோலம் கண்டு ஜென்மபுண்ணியம் அடைந்த , முழு நிறைவினை அடைந்த தலம் இது

அந்த வரத்தை பெற உங்கள் வாழ்வை நீங்களே சரிசெய்து கொள்ள தெற்கு நோக்கி வீற்றிருக்கும் அந்த சிதம்பரேஸ்வரரை தரிசிக்க அத்திபுலியூர் செல்லுக்கள், வியாக்ரதீர்த்தத்தில் நீராடி கல்யாண சுந்தர கோலத்து சிவனை வணங்கி சுக்கிரனின் பரிபூரண அருளை பெற்று நல்வாழ்வினை தொடங்குங்கள்

ஒருமுறை சென்று தரிசித்துவந்தால் அந்த மகா சிறப்பினை நீங்களே உணர்வீர்கள், வாழ்வு அதன்பின் எப்படி மாறுகின்றது என்பதை உணர்ந்து நவபுலியூர் மகிமைகளையும், புலிக்கால் முனி பதஞ்சலி முனி வழியாக சிவன் காட்டிய அதிசய வழிமுறைகளையும் உணர்ந்து சாட்சியாய் நிற்பீர்கள் இது சத்தியம்.

ஓம் நமசிவாய 
படித்து பகிர்ந்தது 
இரா இளங்கோவன் 
நெல்லிக்குப்பம். 

சிறுநீரக கோளாறு குணமடைய பஞ்ச நதன நடராஜர்" ஸ்தலம் ஊட்டத்தூர்.

உங்களுக்கு கிட்னி  பழுதா? சிறுநீரக கோளாறா? குணமடைய வேண்டி சென்று தரிசிக்க  வேண்டிய கோயில்.
பஞ்ச நதன நடராஜர்" ஸ்தலம் ஊட்டத்தூர்.

திருச்சி To  பெரம்பலூர் சாலையில்  பாடாலூர் என்ற ஊரிலிருந்து  வலதுபுறமாக திரும்பி 6 கி.மீ சென்றால் ஊட்டத்தூர் கிராமத்தில் இருக்கும் பஞ்ச நதன நடராஜரை தரிசிக்கலாம். சிறுநீரக நோயை போக்கி கொள்ளலாம்.

அந்தக நரிமணம் என்கிற வேர் பல கோடி கற்களில் ஒன்றை பிளக்கும். அப்படி பிளக்கக்கூடிய கற்கள்தான் பஞ்சநதன பாறை. ஆசியாவிலேயே மிகவும் அரிதான, பஞ்சநதன கல்லில், ஒரே கல்லால் செய்யப்பட்ட நடராஜர் திருமேனி. ஆதலால் இவர் பஞ்சநதன நடராஜர் என்று அழைக்கப்படுகிறார். இந்த கற்கள் சூரியனில் இருந்து வெளிவரும் ஆரோக்கிய கதிர்வீச்சினை சேமித்து வைத்துக் கொள்ளும் ஆற்றல் உடையன. ஆதலால் நாம் இவரை என்ன நினைத்து வணங்குகின்றோமோ அது அப்படியே நடக்கிறது. இந்த வகை தெய்வ சிலை தற்போது வேறு எங்குமே கிடையாது

சிறுநீரக நோய்கள் தீர்க்கும் அரிய தலம் ...

சிறுநீரகம், மற்றும் சிறுநீரக கல் தொடர்பான நோய்களுக்கு இந்த நடராஜர் மருந்தாக திகழ்கிறார். சுமார் ஒரு கிலோ வெட்டி வேரினை 48 துண்டுகளாக எடுத்துக் கொண்டு அவற்றை ஒரு மாலையாக கட்டி இந்த நடராஜருக்கு சாற்றி அர்ச்சித்து பின்னர் அந்த 48 துண்டுகளை நாளொன்றுக்கு ஒன்று என்ற விகிதத்தில் ஒரு கோப்பை நீரில் இரவு ஊற வைத்து அதிகாலையில் வெறும் வயிற்றில் உட்கொள்ள நோய் தீர்வது இன்றும் நடைபெறும் அதிசயமாக உள்ளது.

இந்திரன் பதவி இழந்தவுடன் இந்த நடராஜ பெருமானை தரிசித்து வணங்கி மீண்டும் இந்திர பதவியை பெற்றார்.

பதவியை இழந்தவர்கள் இந்த கோவிலுக்கு வந்து வழிபாடு செய்தால் மீண்டும் இழந்த பதவியை பெறலாம் என்பதை கல்வெட்டு செய்திகள் தெரிவிக்கிறது.

பிரம்மாவுக்கு இந்த ஊரில்தான் சாப விமோசனம் கிடைத்தது. ஆதலால் சிவன் எதிரில் பிரம்ம தீர்த்தம் உள்ளது. வேறு எந்த கோவிலிலும் சிவன் சந்நிதிக்கு முன் பிரம்ம தீர்த்தம் கிடையாது.

அருள்மிகு அகிலாண்டேஸ்வரி சமேத ஸ்ரீசுத்தரத்தினேஸ்வரர் திருக்கோயில்!

ஊட்டத்தூர், திருச்சி மாவட்டம்.

திருச்சியில் இருந்து 30 கிலோ மீட்டர் தொலைவில் திருச்சி-சென்னை தேசிய நெடுஞ்சாலையில் பாடாலூரில் இருந்து புள்ளம்பாடி வழித்தடத்தில் உள்ளது

மூலவர் : சுத்தரெத்தினேஸ்வரர்

அம்பாள் : அகிலாண்டேஸ்வரி

நடை திறக்கும் நேரம்: காலை 7 மணி முதல் 12 மணி வரை,

மாலை 4 மணி முதல் இரவு 8 மணி வரை திறந்திருக்கும்.

ஸ்தல வரலாறு......

பழங்கால வரலாற்று சிறப்பு மிக்க ஊட்டத்தூர் சுத்தரத்தினேஸ்வரர் திருக்கோவில் ராஜராஜ சோழ மன்னரால் கட்டப்பட்டது. முற்காலத்தில் ஊற்றத்தூர் என கல்வெட்டில் குறிக்கப்பட்ட இவ்வூர் தற்போது ஊட்டத்தூர் என்று அழைக்கப்படுகிறது.

ராஜராஜ சோழ மன்னர் ஊட்டத்தூரின் மேற்கு பகுதியில் சோலேச்சுவரர் என்ற மேட்டுக்கோவில் ஒன்றை எழுப்பினார். வில்வ வனமாக இருந்த அப்பகுதிக்கு ராஜராஜ சோழ மன்னரின் வருகை அவ்வப்போது நிகழ்வது உண்டு.

ஒருமுறை அவரது வருகையையட்டி மன்னர் செல்லும் வழியில் இடையூறுகளை நீக்க வேண்டி புல் செதுக்கும் பணி நடைபெற்றது. அந்த தருணத்தில் ஓரிடத்தில் எதிர்பாராது ரத்தம் பீறிட்டெழுந்தது. உடனே பணியாட்கள் மன்னரிடம் செய்தியை தெரிவித்தனர். மன்னர் வந்து பார்த்தபோது ரத்தம் பீறிடுவது நின்று தடைபட்ட தழும்போடு கூடிய ஒரு சிவலிங்கம் காட்சியளித்தது.

அந்த சிவலிங்கம் காணப்பட்ட இடத்திலேயே கோவில் கட்ட நிர்மாணம் செய்யப்பட்டது. இதன் காரணமாக ராஜராஜ சோழனால் குறிப்பிட்ட இடத்தில் எழுப்பப்பட்டதே ஊட்டத்தூர் அருள்மிகு சுத்தரத்தினேஸ்வரர் திருக்கோவில் ஆகும்.

இன்றும் லிங்கத்தின் தலைப்பகுதியில் பார்த்தால் மண்வெட்டி பட்ட காயம் தெரியும். கோவில் மூலஸ்தானத்தில் தீபாராதனை நடை பெறும்போது கற்பூர ஜோதி லிங்கத்தில் பிரதிபலிக்கும். இக்காட்சி மூலவர் ஜோதி வடிவானவர் என்றும், சுத்தரத்தினேஸ்வரர் தூயமாமணி என்றும், மாசிலாமணி என்றும் அழைக்கப்படுகிறார்.

அப்பர் பெருமான் தனது ஆன்மிக சுற்றுப்பயணத்தின் போது ஊட்டத்தூருக்கு செல்ல நினைத்து 5 கிலோ மீட்டர் எல்லையிலேயே திகைத்து மகிழ்ந்து நின்று விட்டார். காரணம், அந்த எல்லையில் இருந்து பார்த்தபோது வழியெல்லாம் சிவலிங்கங்கள் இருப்பதாக உணர்ந்தார். சிவலிங்கத்தின் மீது அவரது பாதங்கள் படுவது சிவ குற்றம் என எண்ணி, எல்லையில் நின்றபடியே ஊட்டத்தூர் பெருமானை நினைத்து பதிகம் பாடியருளினார். இவ்வாறு எல்லையில் இவர் பாடியதால் அந்த இடம் பாடலூர் என அழைக்கப்பட்டது. இந்த பாடலூர் சென்னை - திருச்சி தேசிய நெடுஞசாலையில் உள்ளது.

(இந்த எல்லையின் பெருமை தெரிந்தும், வணங்காமல் உதாசீனம் செய்து பாடாலூரை கடக்கமுயலும் வாகன ஓட்டிகளில் பலர் விபத்தில் சிக்கிக்கொள்கிறார்கள். நெடுஞசாலை துறையினரால் சென்னை - திருச்சி தேசிய நெடுஞசாலையில் பாடலூருக்கு சில கிலோமீட்டர் முன்பே "விபத்துப்பகுதி; எச்சரிக்கையாக செல்லவும்" என்ற எச்சரிக்கை அறிவிப்பு பலகைகள் தொடர்ச்சியாக வைக்கப்பட்டுள்ளது.)

ஒவ்வொரு ஆண்டும் மாசி மாதம் 12, 13, 14 ஆகிய மூன்று நாட்களிலும் சூரிய ஒளி கர்ப்பகிரகத்தில் உள்ள லிங்கத்தின் மேல் படுகிறது. இதேபோல் வைகாசி மாதம் விசாக திருவிழாவின் போதும் சூரியனின் கதிர்கள் சுத்தரத்தினேஸ்வரர் மீது 3 நிமிடங்கள் பட்டு வழிபடுகிறது.

மேற்கூரையில் நவக்கிரகங்கள்:

ஊட்டத்தூர் சுத்தரெத்தினேஸ்வரர் கோவிலில் உள்ள இன்னொரு சிறப்பு அம்சமும் உள்ளது. அது கோவில் கொடி மரம் அருகே மேற்கூரையில் 12 ராசிகள், 27 நட்சத்திரங்கள் செதுக்கப்பட்டு அவை பூமியை நோக்கி பார்க்கும்படி உள்ளது. அதன் அருகிலேயே 9 கிரகங்களும் வடிவமைக்கப்பட்டு உள்ளன.

பொதுவாக கோவில்களில் நவக்கிரகங்கள் மற்றும் ராசிகளின் அதிபதிகள் தனித்தனி சன்னதியாக தான் இருக்கும். ஆனால் ஊட்டத்தூர் கோவிலில் இவை அனைத்தும் பூமியை நோக்கி இருப்பதால் அதன் அடியில் வைத்து செய்யப்படும் யாக பூஜைகள் அனைத்திற்கும் உடனடி பலன் கிடைக்கும். எந்த ராசியை சேர்ந்தவர்களும் இதன் மூலம் முழு பயன் அடைய முடியும்.

இக்கோவிலில் சுத்தரத்தினேஸ்வரர், அகிலாண்டேசுவரி, பரிவாரங்கள், விநாயகர், சூரியன், தட்சிணாமூர்த்தி, ஐந்து நந்திகேஸ்வரர், வள்ளி தெய்வானையுடன் கூடிய சுப்ரமணியர், 63 நாயன்மார்கள், கோடி விநாயகர், இரட்டை லிங்கம், அதிகார நந்தி, கஜலட்சுமி, லட்சுமி, சரஸ்வதி, கோரப்பல்லுடன் கூடிய துர்க்கை, விஷ்ணு, சண்டிகேஸ்வரர், நடராஜர், சிவகாமசுந்தரி, வீரபத்திரர், பைரவர், நவக்கிரகங்கள் மற்றும் மிக அழகான தோற்றம் உள்ள பல தெய்வங்களின் சிலைகளும் மிக சிறப்பாக அமைந்துள்ளது.

மற்ற சிவ தலங்களில் இல்லாத விசேஷமாக இங்கு நந்திதேவர் கிழக்கு முகமாக படுத்து உள்ளார்.

கங்கை, யமுனை, சரஸ்வதி, நர்மதை, காவிரி, சிந்து, துங்கப்பத்திரா ஆகிய நதிகளில் யார் பெரியவர்? என்ற தகராறு ஏற்பட்டு இங்கு வந்து சிவபெருமானிடம் முறையிட்டனர். அவர்களது கோரிக்கையை நிறைவேற்றும்படி சிவ பெருமான் நந்திதேவருக்கு கட்டளையிட்டார்.

அதன்படி நந்திதேவர் 7 நதிகளையும் விழுங்கி விட்டு கிழக்கு நோக்கி படுத்து இருந்ததாகவும் அப்போது கங்கை மட்டும் வெளியே வந்ததாகவும், கர்ண பரம்பரை கதைகள் கூறுகின்றன.

இதனால் கோவில் அருகே ஓடும் சிறிய ஆறு நந்தியாறு என்று அழைக்கப்படுகிறது.

இங்கு உள்ள தட்சிணாமூர்த்தி சக்திமிக்க தெய்வங்களில் ஒன்று.

அபூர்வ நடராஜர்......

இந்த கோவிலில் உள்ள துர்க்கை கோரைப்பற்கள் வெளியில் தெரியுமாறு காட்சி அளிக்கிறார். இந்த துர்க்கைக்கும், விஷ்ணு துர்க்கைக்கும் 11 வாரங்கள் எலுமிச்சம்பழ மாலை அணிவித்து நெய்தீபம் ஏற்றி, வடைமாலை சார்த்தி, சர்க்கரைப் பொங்கல் அல்லது பாயாசம் வைத்து வழிபட்டால் திருமணம் ஆகாத பெண்களுக்கு திருமணம் கைகூடும் என்பது ஐதீகம்.

இந்த சிவாலயத்தில் ஒரு தடவை பிரதோஷ வழிபாடு செய்பவர்களுக்கு ஒரு கோடி புண்ணியம் கிடைப்பதாக அகஸ்தியர் பெருமான் தெரிவித்துள்ளார்.

அகிலாண்டேஸ்வரி காலபைரவர் சுரங்கப்பாதை:

ஊட்டத்தூர் சிவன் கோவில் அருகிலேயே பெருமாள் கோவில் ஒன்றும் உள்ளது. இந்த கோவிலுக்கு பிரம்ம தீர்த்தத்தில் இருந்து தண்ணீர் எடுத்து சென்று பூஜைகள் செய்யப்பட்டதாகவும் கோவில் வரலாறுகள் கூறுகின்றன. இதற்காக சிவன் கோவிலில் இருந்து பெருமாள் கோவில் வரை சுரங்கப்பாதை அமைக்கப்பட்டு இருந்ததாகவும், தற்போது அந்த சுரங்கப்பாதை மூடப்பட்ட நிலையில் இருப்பதாகவும் கூறப்படுகிறது.

நோய் தீர்க்கும் தீர்த்தம்:

உலகின் உள்ள அனைத்து தீர்த்தங்களையும் பிரம்மா ஊட்டத்தூருக்கு கொண்டு வந்து பிரம்ம தீர்த்தத்தில் சேர்த்து உள்ளார். இதனால் இந்த பிரம்ம தீர்த்த நீரை எடுத்துச்சென்று நோயுற்றவர்களின் உடலில் தெளித்தால் அவர்கள் குணமடைவதாக கர்ண பரம்பரை கதைகள் கூறுகின்றன.

இதற்கு சான்றாக ராஜராஜ சோழன் உடல்நலம் இல்லாமல் இருந்தபோது ஊட்டத்தூர் வந்து பிரம்ம தீர்த்தத்தை உடலில் தெளித்து இறைவனை வழிபட, தனது ஆயுட்காலம் வரை நோய் நொடியின்றி வாழ்ந்ததை சான்றாக தெரிவிக்கின்றனர்.

தற்போதும் கோவில் மூலஸ்தானத்தில் இறைவனை வழிபட நிற்கும்போது தீபாராதனைக்கு முன்பாக, பக்தர்களின் கையில் பிரம்ம தீர்த்த நீரை ஊற்றி கையை கழுவிய பின்னரே கோவில் குருக்கள் வழிபாடு நடத்தும் வழக்கம் நடைமுறையில் உள்ளது.

சக்தி வாய்ந்த காலபைரவர்:

இந்த கோவிலில் உள்ள காலபைரவர் சக்திவாய்ந்த தெய்வங்களில் ஒருவராக மதிக்கப்படுகிறார். கால பைரவருக்கு 11 வாரங்கள் தொடர்ந்து சகஸ்ரநாம வழிபாடு செய்தால் சிறு குழந்தைகளின் மன பயம் நீங்குவதாகவும், மாடுகளுக்கு வியாதிகள் தீர்வதாகவும் ஐதீகமாக கூறப்படுகிறது.

சந்தன காப்பு அலங்காரம்:

மேலும் அஷ்டமி திதியன்று கால பைரவருக்கு யாகம் நடத்தி, அபிஷேகங்கள், சந்தன காப்பு அலங்காரம் செய்து காலாஷ்ட மந்திரம் ஓதி வழிபாடு செய்தால் மரண பயம் நீங்குவதாகவும் கூறப்படுகிறது. இதனால் தீராத நோயினால் அவதிப்படுபவர்கள் இந்த சன்னதியில் சிறப்பு பூஜைகள் செய்து வழிபட்டு வருகிறார்கள்.

ஓம் நமசிவாய
 படித்து பகிர்ந்தது
 இரா இளங்கோவன் 
நெல்லிக்குப்பம். 

சிவனே வந்து சாட்சி சொன்னதால் அவர் சாட்சிநாதர்.

 அவளிவண‌நல்லூர் சாட்சிநாதர் ஆலயம்
தேவாரம் பாடபட்ட 163ம் தலமான இந்த ஆலயம் தஞ்சாவூர் பாபநாசம் அருகே முதல் ஆரண்ய தலமான திருகாவூரை அன்மித்து அமைந்துள்ளது, இந்த தலம்

"பதிக இன்இசை பாடிப்போய், பிறபதி பலவும்
நதிஅ ணிந்தவர் கோயில்கள் நண்ணியே வணங்கி,
மதுர முத்தமிழ் வாசகர் அணைந்தனர் மன்றுள்
அதிர்சி லம்புஅடி யார்மகிழ் அவளிவ ணல்லூர்"
என சம்பந்த பெருமான் பாடிய தலம் இது, இந்த தலத்தின் தொன்மை யுகங்களை தாண்டியது  பாதிரி மரங்கள் நிறைந்த இப்பக்கம் பாதிரிநாதராக அமைந்த சிவன் தொன்மையானவர் என்றாலும் இங்கு அவர் சாட்சிநாதனாய் வந்ததில் இருந்து இதன் பெருமை துவங்குகின்றது

காலத்தால் முந்தைய இந்த ஆலயத்துக்கு காசிபர் உள்லிட்ட பலர் அப்போதே வந்தார்கள், சிவனிடம் தங்கள் துன்பத்தை சொல்லி வேண்டி விடுதலைபெற்றார்கள் வாழ்வு பெற்றார்கள், பாதிரி மரத்தடியில் இருந்த லிங்கம் பின்னாளில்  ஆலயம் கண்டது, சோழ மன்னர்கள் இதனை கொண்டாடினார்கள், நம்பியவரெல்லாம் காக்கபட்டார்கள்

அந்த வரிசையில் ஒரு அர்ச்சகர் வாழ்வில் நடந்த அற்புத்தத்தோடு இந்த வரலாறு பிணைந்திருக்கின்றது

இக்கோவிலில் அர்ச்சகராக இருந்தவர்க்கு இரு மகள்கள்,  பார்ப்பதற்கு இருவரும் ஏறகுறைய ஒரே தோற்றம் கொண்டவர்களாகவும் இருந்தார்கள்,  அவர்களில் மூத்தவளை ஒரு அந்தணர்க்கு மணமுடித்துவைத்தார் அர்ச்சகர்

அந்தணர் வாழ்வு நாடோடி வாழ்வு, யாத்திரை உள்ளிட்ட பல காரியங்களுக்காக, பெரிய மன்னர்கள் நடத்தும் யாகங்கள் ஹோமங்கள் முதல் பல காரணங்களுக்காக, வேத வகுப்புகள் அவர்கள் எங்காவது சென்றுகொண்டே இருக்கவேண்டும் இது அவர்கள் விதி

பல இடங்களுக்கு செல்வோர் பல விஷயம் கற்றுகொள்ளமுடியும், பல நாடுகளை சுற்றிவந்தால் பெரும் அனுபவமும் அறிவும் கிடைக்கும் எனும் ஏற்படும் இதில் இருந்தது

அப்படி மூத்தவள் கணவன் காசி யாத்திரை சென்றான், அக்காலங்களில் காசியாத்திரை மிகுந்த நாள் பிடிக்கும் ஒன்று வருடம் கூட ஆகலாம்

அப்படி அவன் சென்றிருக்கும் சமயம் அவன் மனைவியான மூத்தவளுக்கு அம்மை நோய் தாக்கிற்று இதனால் அவள் மிகுந்த வேதனைக்குள்ளாகி உருவம் குலைந்து போனாள், ஆளே அடையாளம் காணமுடியாபடி மாறிபோனாள்

காசி சென்றிருந்த கணவன் மீண்டும் வந்து அவளை சந்தித்தபோது குழம்பி போனான், அவன் இது தன் மனைவி அல்ல இளையவளே தன் மனைவி என வாதிட்டான், குழந்தை இல்லாததால் அங்கு சாட்சி பெரிதாக இல்லை

இது பெரிய விவகாரமானது, தங்கையினை காட்டி இவளே என் மனைவி என்றவன் குழப்பம் செய்தான், விவகாரம் வீட்டில் உள்ளவர் பேசி முடியாமல் சபை வரை வந்தது

அர்ச்சகரான அந்தணன் தன் வேதனையில் சொன்னான் "மருமகனே இவள்தான் உங்கள் மனைவி, அம்மை நோயினால் இப்படி பாதிக்கபட்டாள் , அவள் உருவம் அதனனால் மாறிவிட்டது ஆனால் நான் உங்களுக்கு துரோகம் நினைக்கவில்லை, அதையும் தாண்டி ஒரு பெண் தன் கவணன் அல்லாதவனை எப்படி உரிமை கொண்டாடுவாள்" என கேட்டார்

அவனோ பிடிவாதமாக மறுத்தான் "என் மனைவி அழகானவள்,  இப்போது இன்னொரு பெண்ணுக்கு அம்மை வந்தததால், அவளின் திருமணமும் தள்ளி சென்றதால் அவளை இப்போது எனக்கு கட்டி வைத்துவிட பார்க்கின்றீர்கள், நான் ஏமாறமாட்டேன், இவள்தான் என் மனைவி, அம்மை வந்தவளே இளையவள்" என வாதிட்டான்

சில விவாதங்களில் முடிவில்லை என்பதால் கடைசி பஞ்சாயது ஒன்றும் முடிவானது, பல ஆதாரங்களோடு பெண்ணையும் அவள் தகப்பனையும் வரசொன்னார்கள் சபையார்

ஒரு தகப்பனுக்கு தன் துயரை விட எது பெரிது? ஒரு பெண்ணுக்கு தன் கணவனே தன்னை தள்ளிவைப்பதை தவிர எது கொடிது? அதனால் இருவரும் அந்த சிவனிடமே தங்கள் வேதனையினை சொல்லி அழுதார்கள்

அன்றாடம் தனக்கு சேவகம் செய்யும் பக்தனுக்காக அவனோடு சேர்ந்து பல காரியங்களை செய்யும் பெண்ணுக்காக சிவனே இறங்கி வர சித்தமனார்

அபப்டி மறுநாள் சபை கூடிற்று, பெண் தரப்பிடம் தாலி தவிர வேறு பெரிய ஆதாரமில்லை, அவளும் அவள் தங்கையும் ஒருபோல இருந்ததால் எல்லோருக்கும் குழப்பமும் வந்தது

தன் தரப்பு வாதமெல்லாம் தோற்ற நிலையில் அந்த அர்ச்சகர் "சிவனே" என அழைத்தபோது அந்த அதிசயம் நிகழ்ந்தது, வானில் விடைமேல் பார்வதியுடன் அமர்ந்த சிவன் தோன்றினார், எல்லோரும் அறிய தோன்றியவர் சொன்னார் " இந்த பெண்ணே அவன் மனனைவி, அவள் இவளே" என காட்டி மறைந்தார்

அத்தோடு அவளுக்கு அம்மை நோயின் தாக்கம் மறைந்தது அவள் முன்னை விட அழகானவளாய் தோன்றினாள்

பரமனே வந்து சொன்னபின் என்ன இருக்கின்றது, அவனும் பாதிக்காப்ட்ட தன் மனைவியிடம் மன்னிப்பு கேட்டு ஏற்றுகொண்டான் அவர்கள் வாழ்வு காக்கபட்டது

சிவனே வந்து சாட்சி சொன்னதால் அவர் சாட்சிநாதர் என்றானார், அவரே "அவள் இவள்" என சொன்னதால் இந்த ஆலயமே "அவள் இவள் என்ற நல்லூர்" என்றானது, பின்னர் மருவி அவளிவநல்லூர் என்றாயிற்று

நம்புபவர்களை காக்கும் அருள்மிக்க தலம் இது,  இந்த பஞ்ச ஆரண்ய தலங்களும் சிவனின் ஐந்தொழிலை குறிப்பவை, திருகாவூர் தலம் அவ்வகையில் படைத்தல் தொழிலை குறிப்பது, அங்கே மானிட படைப்பினை உருவாக்கி கொடுத்த அதிசயத்தை சிவன் செய்தார்

இரண்டாம் தலமான இத்தலம் காத்தல் தொழிலை செய்கின்றது, இந்த பெண்ணின் வாழ்வின காத்து தந்த ஆலயம் அதற்கான சாட்சியாய் நிற்கின்றது

பெண்ணின் வாழ்வு என்பது அவள் ஒருத்திக்கான வாழ்வு அல்ல, அவளை சார்ந்தவர்கள் அவள் குலம் என பெரிய வம்சத்தையே காக்கும் காரியம் எனும் வகையில் இங்கு நம்பிய எல்லோரையும் சிவன் காத்து அருள்வார் என்பதை சொல்லும் தாத்பரியம் இது

இத்தலத்தின் விருட்சம் பாதிரி மரம்,  இவ்வகை மரத்தின் தன்மை கோடையில் மிக செழுமையாக நின்று எல்லா மக்களுக்கும்
உயிர்களுக்கும் நிழல் தந்து காப்பது

சிவனும் எல்லா பெரும் பிரச்சினைகளிலும் வேதனையிலும் தம் மக்களை காப்பார் , தன்னை நம்பியவர்களை காப்பார் என்பதை அழுத்தமாக சொல்லும் தத்துஅம் இது

கிழக்கு நோக்கிய இக்கோவில் உள்ளே நுழைந்தவுடன் வெளிச்சுற்றில் அம்பாள் சந்நிதி தெற்கு நோக்கியுள்ளது. அம்பாள் நின்ற திருக்கோலத்தில் காட்சி தருகிறாள். 

அதை தாண்டி வழிபட்டுச் சென்றால் விநாயகர் காட்சி தருகிறார்.  உள்ளே நுழைந்தால் நேரே மூலவர் சுயம்புலிங்க உருவில் கிழக்கு நோக்கி காட்சி தருகிறார். கருவறை வாயிலின் இருபுறமும் துவாரபாலகர்கள் உள்ளனர். 

இதற்கு அடுத்தே அப்பெண்ணுக்கு சாட்சி சொன்ன நிலையில் சாட்சிநாதராக சிவன் பார்வதி காட்சி தருகின்றனர்.

  உள்சுற்றில் விநாயகர், நால்வர் சந்நிதிகள், கண்வ முனிவர், வீரபத்திரர், சப்தகன்னியர், அறுபத்துமூவர் மூலத்திருமேனிகள் ஆகிய சந்நிதிகள் உள்ளன. சோமாஸ்கந்தர், விநாயகர், சிவகாமி, நால்வர், ஆறுமுகர், மகாலட்சுமி ஆகிய உற்சவத் திருமேனிகள் உண்டு

நடராஜர் சன்னதி இங்கு அழகானது,  அருகில்  குமாரலிங்கம், காசிவிசுவநாதர், விசாலாட்சி, தபஸ் அம்பாள் திருமேனிகள் உள்ளன. எதிரில் நவக்கிரக சந்நிதிகள் உள்ளது. 

கால பைரவர், சூரியன் சந்நிதிகள் உள்ளன. கோஷ்டமூர்த்தங்களாக அகத்தியர், தட்சிணாமூர்த்தி, லிங்கோத்பவர், பிரமன், துர்க்கை ஆகியோருக்கும் சன்னதிகள் உண்டு

இந்த ஆலயத்தில் காசிமுனி மட்டுமல்லாது அகத்தியர் முதல் பலர் வழிபட்டனர், விஷ்ணு வழிபட்ட ஆலயங்களில் இதுவும் ஒன்று

இந்த ஆலயம் வாழ்வின் எல்லா சிக்கலில் இருந்தும் காவல் தரும் அது தொழில் , குடும்பம், எதிரிகள், உடல்நிலை, வழக்குகள், சட்ட சிக்கல்கள்  என எதுவாக இருந்தாலும் எவ்வகை ஆபத்தாக இருந்தாலும் அதினின்று உங்களை காத்து நிற்கும்

இன்னும் நல்ல மணவாழ்வை தரும், தம்பதியர் இடையேயான சர்ச்சை எல்லாம் தீரும், உடலில் வந்த எல்லா பாதிப்புக்களும் அலங்கோலமும், இதர வியாதிகளும் இங்கு தீரும்

குறிப்பாக கண் சம்பந்தமான வியாதிகள் முதல் எல்லாமும் சிவனருளில் சரியாகும், தோல் சம்பந்தமான வியாதிகள் முழுக்க சரியாகும் தலமும் இதுதான்

அன்னை சவுந்தர்யநாயகி அருளில் இங்கு வழிபடுவோர்க்கு தேக சவுந்தர்யம் உண்டாகும், பொலிவான தோற்றம் அவள் அருளில் கிடைக்கும்

இந்த சிவன் உங்களை முழுக்க காப்பார், எல்லாவகை சிக்கலில் இருந்தும் உங்களை மீட்டெடுத்து காவல் இருப்பார், மிகபெரிய இன்னலில் யாருமற்ற சூழலில் நீங்கள் இருந்தாலும் , உலகமே உங்களை குற்றம்சாட்டினாலும் அந்த சாட்சிநாதர் சாட்சியாக வந்து உங்களை மீட்பார்

பஞ்ச ஆரண்ய தலத்தில் இரண்டாம் தலமான இத்தலத்தை தரிசிப்பவர்கள் மனம், உடல், குலம் என எல்லாவற்றிலும் பெரும் வாழ்வு வாழ்வார்கள், இது சத்தியம்

இந்த ஆலயம் ஞானியர் பலரால் பாடபட்டது, வள்ளலார் தன்  விண்ணப்பக் கலிவெண்பாவில்,  "சரதத்தால் ஏதும் அவள் இவள் என்று எண்ணாதவர் இறைஞ்சி ஓதும் அவளிவணல்லூர் உடையோய்" என்று போறறுகின்றார் 

"தோற்றினான் எயிறு கவ்வித் தொழிலுடை யரக்கன் தன்னைத்
தேற்றுவான் சென்று சொல்லச் சிக்கெனத் தவிருமென்று
வீற்றினை யுடையவனாகி வெடுவெடுத்து எழுந்த வன்றன்
ஆற்றலை அழிக்க வல்லார் அவள் இவள் நல்லூரே" அனைவரும் சென்று வழிபாட்டு வளமுடன் வாழ்க. 

படித்து பகிர்ந்தது
 இரா இளங்கோவன்
 நெல்லிக்குப்பம். 

Wednesday, December 3, 2025

சென்னையின் நவக்கிரகத் ஒன்பது தலங்கள்:

 சென்னையின் நவக்கிரகத் தலங்கள்: 
சென்னையைச் சுற்றியுள்ள இந்தப் புனிதமான ஒன்பது ஆலயங்கள் ஒரே நாளில் நவக்கிரகங்களின் அருளைப் பெற விரும்பும் பக்தர்களுக்கான ஒரு வரப்பிரசாதமாகும். தமிழ்நாட்டின் பாரம்பரிய நவக்கிரகத் தலங்களுக்குச் செல்ல இயலாதவர்கள், இந்த உள்ளூர் தலங்களைத் தரிசிப்பதன் மூலம், அந்தப் பலன்களை முழுமையாக அடையலாம் என்பது ஐதீகம்.

சூரியன்: இந்த நவக்கிரகச் சங்கிலியில் முதன்மையானது, கொளப்பாக்கம் அகஸ்தீஸ்வரர் கோயில். இங்குள்ள அகஸ்தீஸ்வரரை வழிபடுவதன் மூலம், சூரிய கிரகத்தின் அருளைப் பெற்று, சிறப்பான ஆரோக்கியம், அரசாங்கத் துறையில் முன்னேற்றம் மற்றும் தலைமைப் பண்பில் உயர்வு ஆகியவற்றை அடையலாம். இந்தத் தலம், உத்தியோக உயர்வுக்கு வழி வகுக்கும் நம்பிக்கையைக் கொண்டுள்ளது.
சந்திரன்: அடுத்ததாக, சோமங்கலம் சோமநாதீஸ்வரர் திருக்கோயில் சந்திர பகவானுக்குரிய தலமாக விளங்குகிறது. சந்திரனால் ஏற்படும் தோஷங்கள் நீங்கவும், மன அமைதி, தெளிவான சிந்தனை மற்றும் கல்வி மேம்பாடு ஆகியவற்றுக்காகவும் இத்தலத்தை வழிபடலாம். மனக் குழப்பங்களால் தவிப்பவர்களுக்கும், தாய்வழி உறவுகளில் சிக்கல் உள்ளவர்களுக்கும் இக்கோயில் ஒரு சிறந்த நிவர்த்தி தலமாகும்.

செவ்வாய்: செவ்வாய் கிரகத்தின் ஆதிக்கத்தில் உள்ள தலமாக, பூந்தமல்லி வைத்தீஸ்வரன் கோயில் திகழ்கிறது. தைரியம், வெற்றி, சகோதர உறவுச் சீரமைப்பு மற்றும் நிலம் வாங்கும் யோகம் ஆகியவை செவ்வாயின் அருளால் கிடைக்கின்றன. ரத்த சம்பந்தமான நோய்கள் மற்றும் கடன் தொல்லைகள் நீங்கவும் இத்தலம் உதவுகிறது.

புதன்: அறிவு, கல்வி, வியாபாரம் மற்றும் பேச்சாற்றலுக்கான கிரகமான புதனுக்குரியது, கோவூர் சுந்தரேஸ்வரர் கோயில். இங்குள்ள சுந்தரேஸ்வரரை வழிபடுவதன் மூலம், புதன் தோஷங்கள் நீங்கி, கல்வி மற்றும் வியாபாரத்தில் நல்ல வளர்ச்சி காணலாம். பேச்சுத் திறனை மேம்படுத்த விரும்புவோர் இத்தலத்தைத் தரிசிப்பது அவசியம்.

குரு (வியாழன்): செல்வம், ஞானம் மற்றும் சுப காரியங்களுக்கான அதிபதியான குரு பகவானுக்குரிய தலமாக, போரூர் ராமனாதீஸ்வரர் கோயில் உள்ளது. திருமணத் தடை, புத்திர பாக்கியமின்மை மற்றும் நிதிச் சிக்கல்கள் உள்ளவர்கள் இத்தலத்தை வழிபடுவதன் மூலம், குருவின் அருளைப் பெற்று நன்மைகளைப் பெறலாம்.

சுக்ரன் (வெள்ளி): கலை, காதல், திருமண வாழ்க்கை மற்றும் வசதியான வாழ்க்கையின் அதிபதியான சுக்ரனுக்குரியது, மாங்காடு வெள்ளீஸ்வரர் திருக்கோயில். சுக்ர தோஷம் நீங்கவும், இழந்த செல்வத்தை மீண்டும் பெறவும், திருமண வாழ்க்கையில் இன்பம் நிலைக்கவும் இத்தலத்தை வழிபட வேண்டும்.

சனி: நீண்ட ஆயுள், தொழில் மற்றும் நியாயத்தின் அதிபதியான சனியின் தலமாக, பொழிச்சலூர் அகஸ்தீஸ்வரர் கோயில் விளங்குகிறது. சனியின் ஏழரைச் சனி மற்றும் அஷ்டமச் சனியால் ஏற்படும் பாதிப்புகள் குறையவும், தொழிலில் ஸ்திரத்தன்மை மற்றும் வளர்ச்சி கிடைக்கவும் இக்கோயில் உதவுகிறது.

ராகு: நிழல் கிரகமான ராகுவுக்குரியது, குன்றத்தூர் திருநாகேஸ்வரர் திருக்கோயில். எதிர்பாராத அதிர்ஷ்டம், வெளிநாட்டு வாய்ப்புகள் மற்றும் திடீர் நன்மைகளுக்காக இத்தலத்தை வழிபடுகின்றனர். ராகு காலங்களில் ஏற்படும் தோஷங்கள் நீங்கவும் இக்கோயில் பிரசித்தி பெற்றது.

கேது: மற்றொரு நிழல் கிரகமான கேதுவுக்குரியது, கெருகம்பாக்கம் திருநீலகண்டேஸ்வரர் கோயில். இத்தலத்தை வழிபடுவதன் மூலம், ஆன்மீக அறிவு, ஞானம், மோட்சம் மற்றும் வாழ்க்கையின் தடைகளிலிருந்து விடுபடுதல் ஆகிய பலன்களைப் பெறலாம். தெளிவான இலக்கு தேடுபவர்களுக்கும் இக்கோயில் ஒரு சிறந்த ஆன்மீக வழிகாட்டியாக உள்ளது.

இந்த நவக்கிரகத் தலங்களின் தரிசனம், ஒரே நாளில் நவக்கிரகங்களின் சாந்நித்தியத்தை உணர்ந்து, அவர்களின் அருளை முழுமையாகப் பெற ஒரு சிறந்த வாய்ப்பை வழங்குகிறது.

ஓம் நமசிவாய 
படித்து பகிர்ந்தது 
இரா இளங்கோவன் 
நெல்லிக்குப்பம். 

Tuesday, December 2, 2025

திருவண்ணாமலை கார்த்திகைத் தீபம்



கார்த்திகைத் திங்களில், பெளர்ணமி என்கின்ற முழு மதியுடன் கார்த்திகை விண்மீன்(நட்சத்திரம்) கூடுகின்ற நன்னாளைக் கார்த்திகைத் திருநாள் என்கிறோம். தீபாவளியைப் போன்றே இதுவும் விளக்கு ஏற்றுகின்ற திருநாளே! தீபாவளியன்று விளக்குகளை வரிசை வரிசையாக ஏற்றி இறைவன் திருவருள் ஒளி வீடு எங்கிலும் நிறைவதாக எண்ணி மகிழ்கின்றோம். ஆனால் திருக்கார்த்த்கை அன்று விளக்குகளை ஏற்றிவைத்து அவற்றை இறை ஒளித்தோற்றமாக வழிபடுகின்றோம். இன்னொரு வகையில் கூறப்போனால் திருக்கார்த்திகையன்று இறைவனை ஒளி வடிவமாகக் கண்டு வழிபடுகின்றோம்.

“வானாகி, மண்ணாகி, வளியாகி, ஒளியாகி, ஊனாகி, உயிராகி, உண்மையுமாய் இன்மையுமாய், கோனாகியான் எனதென்று அவரவரைக் கூத்தாட்டு, வானாகி நின்றானை என்சொல்லி வாழ்த்துவேனே” என்பார் மாணிக்கவாசகர். இறைவன் விண், நிலம், காற்று, ஒளி, நீர், உயிர், நிலவு, கதிரவன் ஆகிய எட்டுப் பொருள்களில் கலந்து நின்று உயிர்களுக்கு அருள்கிறான் என்று சைவம் குறிப்பிடும். இவற்றில் இறைவனின் அருவுருவத்திருமேனியாய் சைவர்கள் வைத்துப் போற்றி வழிபடுவது ஒளி அல்லது தீயாகும். எனவேதான், “ஒளிவளர் விளக்கே” எனத் திருவிசைப்பாவில் திருமாளிகைத்தேவரும்,  “நொந்தா ஒண்சுடரே” என சுந்தரர் தமது திருப்பாட்டிலும் , “கற்பனைக் கடந்த சோதி” என சேக்கிழார் பெருமானும் இறைவனைப் போற்றி வழிபட்டு மகிழ்ந்தனர். “அருட்பெரும் சோதி அருட்பெரும் சோதி ” என்று சிதம்பர இராமலிங்க அடிகளும் வழிபட்டார்கள்.

திருக்கார்த்திகையைக் கோவில்களில் விளக்கீடு செய்து கோவில் கார்த்திகை என்றும் வீடுகளில் விளக்கீடு செய்து வீட்டுக் கார்த்திகை என்றும்  வழிபடுகிறோம். கோவில் கார்த்திகையில் ஐம்பூத தலங்கள் என்று அழைக்கப்படும் சிதம்பரம் (ஆகாயம்), திருக்காளத்தி (காற்று), திருவண்ணாமலை (தீ), திருவானைக்காவல் (நீர்) கச்சி ஏகம்பம் (மண்)  ஆகியவற்றில் மிகவும் பேர்போனது திருவண்ணாமலை என்ற தீ தலம். திருவண்ணாமலை கார்த்திகைத் தீபம் உலகப் புகழ் பெற்றதும்  பெறும் சிறப்பு உடையதாகும். திருக்கார்த்திகையன்று திருவண்ணாமலைத் திருக்கோவிலில் பரணி தீபம் ஏற்றப் பெற்று பின்பு திருவண்ணாமலை மலை உச்சியில் கார்த்திகைத் தீபம் ஏற்றப்படும். அதன் பிறகே சைவர்கள் தமது வீடுகளில் விளக்கீடுகள்  செய்து வழிபடுவார்கள்.

திருக்கார்த்திகை அன்று இதர சைவக் கோவில்களிலும் கோபுரங்கள் மீதும் கோவில் முழுவதிலும் தீபங்கள் ஏற்றி வழிபடுவார்கள். திருக்கார்த்திகையன்று திருக்கோவில்களில் சொக்கப்பனை கொளுத்துகின்ற நிகழ்வும் நடைபெறும். பனை ஓலைகளையோ அல்லது தென்னை ஓலைகளையோ ஒரு மரத்தோடு சேர்த்துக்கட்டி எரிப்பதுவே சொக்கப்பனை கொளுத்துதல் எனப்படும். சுடர்விட்டு எரிகின்ற பனை ஓலைகளைத் தீப்பிழம்பாக, சோதியாக, சொக்கனாக ( சிவபெருமானாக) பார்ப்பதே சொக்கப்பனை கொளுத்துவதன் நோக்கம்.

வீடுகளில் பூசனை அறை, வீட்டின் இதரப் பகுதிகள், தோட்டம், குப்பை மேடுகள் போன்ற இடங்களிலும் கூட விளக்கீடுகள் செய்வதனைக் காணாலாம். இறைவனை ஒளிவடிவில் கண்டு வழிபடுவதோடல்லாமல், கடலை எண்ணெய்யாலும் நெய்யினாலும் ஏற்றப்படும் விளக்கு ஒளி காற்றைத் தூய்மைபடுத்தி வீட்டையும் சுற்றுப்புரத்தையும் தூய்மை ஆக்குகின்றது.

#கார்த்திகையை_ஒட்டிய_புராணம்

இறைவன் இட்ட பணியைச் செய்கின்ற அதிதேவதைகளான பிரமனும் திருமாலும் ஒரு காலத்தில் தங்களுடைய அறியாமையினால், தாங்களே பரம்பொருள் என்று செருக்கினால் வாது செய்தனர். இவர்கள் இருவரில் உயர்ந்தவர் யார் என்று முடிவுக்கு வர முடியாமல் சிவபெருமானை அணுகி உதவுமாறு கேட்டனர். அவர்களுடைய அறியாமையைப் போக்கி அருள்புரிய இறைவனார் பேரொளிப்பிழம்பாகத் தோன்றி தமது அடிமுடியை கண்டு வருமாறு இயம்பினார். பிரமன் அன்னப்பறவை வடிவிலும் திருமால் பன்றி வடிவிலும் அடிமுடித் தேடி காண இயலாது தங்களது அறியாமையாகிய செருக்கு நீங்கித் தோல்வியை ஒப்பினர். இறைவன் சிவராத்தியன்று அவர்களுக்குச் சிவலிங்க வடிவிலே காட்சி தந்தருளினார். இறைவன் ஒளிப்பிழம்பாக நின்றதையே கார்த்திகைத் தீபமாக ஏற்றிக் கொண்டாடுகின்றோம். ஒளிப்பிழம்பு தணிந்ததே திருவண்ணாமலை மலை ஆகியது. இதனாலேயே கார்த்திகைத் தீபம் திருவண்ணாமலையில் சிறப்புற ஏற்றப்படுகிறது. அதை நினைந்தவாறே நாம் வீடுகளிலும் விளக்கு ஏற்றுகிறோம். இறைவன் சோதியாக நின்றதை எண்ணியே சொக்கப்பனை கொளுத்தி வழிபடுகிறோம்.

கந்தப்புராணத்தின்படி சரவணப் பொய்கையில் ஆறு தாமரைப் பூக்களில் ஆறுகுழந்தைகளாக இறைவனால் தோற்றுவிக்கப்பட்ட தமிழ்க் கடவுளான முருகப் பெருமானை ஆறு கார்த்திகைப் பெண்கள் பாலூட்டி வளர்த்தார்கள். கார்த்திகை விண்மீன்களாகிய (ஆறு நட்சத்திரங்கள்) ஆறு விண்மீன்களே ஆறு பெண்களாக முருகனை வளர்த்ததால் இக்கார்த்திகைத் திருநாள் முருகனுக்குரிய விழாவாகவும் அமைகிறது. இதனாலேயே முருகனுக்குக் கார்த்திகேயன் என்ற பெயரும் வழங்கப் பெறுகின்றது.

#திருக்கார்த்திகைச்_சிந்தனை

கல்விச் செருக்கினைக் கொண்டு படைத்தல் தொழிலைச் செய்த பிரமனும் செல்வச் செருக்கினைக் கொண்டு காத்தல் தொழிலைச் செய்த திருமாலும் தங்கள் அறியாமையினால் இறைவனின் திருவருள் என்ற திருவடியையும் இறைவனின் அறிவு என்னும் திருமுடியையும் காண இயலாது தோல்வியுற்றனர். பின்பு ஆணவமின்றி அன்பினால் வழிபட்டால் இறைவனைக் காணலாம் என்று உணர்ந்துக் கொண்டனர்.எனவே ஒளிவடிவாய் இருக்கின்ற இறைவனைக் கல்வியாலும் செல்வத்தினாலும் ஏற்படுகின்ற செருக்கினை விட்டு உண்மை அன்பினால் வழிபட்டால் இறைவனைக் காணலாம், அவன் திருவருளைப் பெறலாம் என்ற தெளிவினைக் கொண்டு விளக்கீடு செய்து இறைவனை ஒளியாக வழிபடுவதே கார்த்திகை விளக்கீட்டின் மெய்ப்பாடு.
ஓம் நமசிவாய 
படித்து பகிர்ந்தது 
இரா இளங்கோவன் 
நெல்லிக்குப்பம். 

Monday, December 1, 2025

அகத்தியருக்கு சிவன் திருமணக் கோலம் காட்டியருளிய தலம்.

திருவேற்காடு வேதபுரீஸ்வரர் கோயில் திருஞானசம்பந்தரால் பாடல் பெற்ற தொண்டை நாட்டுச் சிவாலயமாகும். நான்கு வேதங்களும் வேல மரங்களாய் நின்று சிவபெருமானை வழிபட்டதால் வேற்காடு எனப்பெயர் பெற்றது. 

திருவேற்காடு வேதபுரீஸ்வரர் கோயில் திருஞானசம்பந்தரால் பாடல் பெற்ற தொண்டை நாட்டுச் சிவாலயமாகும். நான்கு வேதங்களும் வேல மரங்களாய் நின்று சிவபெருமானை வழிபட்டதால் வேற்காடு எனப்பெயர் பெற்றது. 
அகத்தியருக்கு, இறைவன் திருமணக் கோலம் காட்டியருளிய தலம் என்பது தொன்நம்பிக்கை. அதாவது ஐதீகம். 

திருவேற்காடு வேதபுரீஸ்வரர் திருக்கோயிலின் மூலவர்:
வேற்காட்டு நாதர், வேதபுரீசுவரர்
தாயார் வேற்கண்ணி, பாலாம்பிகை இந்த ஆலயத்தின் தல விருட்சம்:
வெள் வேல மரம், தீர்த்தம்:
வேலாயுதத் தீர்தம்.

இத்த திருத்தலத்து சிவபெருமான் மனித உருவில் திருமணக் காட்சி தருகிறார்.

இத்த திருத்தலத்து அம்பிகையையும், பாடி திருவலிதாயம் பாலாம்பிகையையும், திருவொற்றியூர் வடிவுடையாம்பிகையையும், ஒரே நாளில் சென்று வழிபடுவோர், இம்மை மறுமை நலன்களைப் பெறுவர் என்று கூறப்படுகிறது.

இத்த திருத்தலத்து வேத தீர்த்தத்தில் ஞாயிறு தோறும் நீராடி, இத்த ஆலயத்து சிவபெருமானை வழிபட, நோய் நீங்கும் என்பது புராணத்தில் கூறப்பட்டுள்ளது.

 கருவறை மேற்குப் பிராகாரத்தில் உள்ள முருகன் சந்நிதியில், முருகனுக்கு முன்னால் ஒரு சிவலிங்கம் இருப்பதைக் காணலாம். இத்தகைய அமைப்பை வேறு எங்கும் காண முடியாது. முருகன் ஏற்படுத்திய தீர்த்தம் வேலாயுத தீர்த்தம் என்ற பெயரில் ஆலயத்தின் உள்ளே இருக்கிறது. இத்தலத்திலுள்ள முருகப்பெருமான், அருணகிரிநாதரால் திருப்புகழில் பாடப் பெற்றுள்ளார்.
திருப்புகழில் இத்தலத்து முருகன் மீது 2 பாடல்கள் உள்ளன. தொன்நம்பிக்கை. அதாவது ஐதீகம். 

திருவேற்காடு வேதபுரீஸ்வரர் திருக்கோயிலின் மூலவர்:
வேற்காட்டு நாதர், வேதபுரீசுவரர்
தாயார் வேற்கண்ணி, பாலாம்பிகை இந்த ஆலயத்தின் தல விருட்சம்:
வெள் வேல மரம், தீர்த்தம்:
வேலாயுதத் தீர்தம்.

இத்த திருத்தலத்து சிவபெருமான் மனித உருவில் திருமணக் காட்சி தருகிறார்.

இத்த திருத்தலத்து அம்பிகையையும், பாடி திருவலிதாயம் பாலாம்பிகையையும், திருவொற்றியூர் வடிவுடையாம்பிகையையும், ஒரே நாளில் சென்று வழிபடுவோர், இம்மை மறுமை நலன்களைப் பெறுவர் என்று கூறப்படுகிறது.

இத்த திருத்தலத்து வேத தீர்த்தத்தில் ஞாயிறு தோறும் நீராடி, இத்த ஆலயத்து சிவபெருமானை வழிபட, நோய் நீங்கும் என்பது புராணத்தில் கூறப்பட்டுள்ளது.

 கருவறை மேற்குப் பிராகாரத்தில் உள்ள முருகன் சந்நிதியில், முருகனுக்கு முன்னால் ஒரு சிவலிங்கம் இருப்பதைக் காணலாம். இத்தகைய அமைப்பை வேறு எங்கும் காண முடியாது. முருகன் ஏற்படுத்திய தீர்த்தம் வேலாயுத தீர்த்தம் என்ற பெயரில் ஆலயத்தின் உள்ளே இருக்கிறது. இத்தலத்திலுள்ள முருகப்பெருமான், அருணகிரிநாதரால் திருப்புகழில் பாடப் பெற்றுள்ளார்.
திருப்புகழில் இத்தலத்து முருகன் மீது 2 பாடல்கள் உள்ளன. அனைவரும் சென்று தரிசித்து வாருங்கள். 

ஓம் நமசிவாய 
படித்து பகிர்ந்தது 
இரா இளங்கோவன்
 நெல்லிக்குப்பம். 

Followers

திருவண்ணாமலை அஷ்ட லிங்கங்கள்

திருவண்ணாமலை அஷ்ட லிங்கங்கள் பலன் திருவண்ணாமலை கிரிவலப் பாதையில் அமைந்துள்ள எட்டு திசை லிங்கங்களே (அஷ்ட லிங்கங்கள்) நவகிரக தோஷங்...